Ruti4

1Boasi na-godoro-ro sabowa to, nou mana moto ato aise gomi, Erimereki edi karima boinana ro ioudo gemasebidiro-ro.
Taie, iedi dubu ro na-gou-ro Boasi ro ibo, ‘Abona dubu oro neito ma-dou-ro.’
2Taie nou neido na-gou, nou aise gomi. Boasi ro sabowa kiauri urubia iato gidabuti-ro neitiro owera gare imedea-mari.3Nou ro ibo, ‘Oro Erimereki karima boinana ie. Nou orobo garamu Naomi ta-gorowameai-die Moabi duriomoro rido, abora tomidiro nato.4Erimereki edi sopu ro Naomi aboudo oro ro ba-diapopo-ro nedi urubia ro neio sosoro gabo ato. Oro nama-ereseiai-ri mo ba-demowapotai-ro, ina mo ro anama-iapopo-ri, mabu mo ata karima boinana nou se ie.’
Nou ro ibo, ‘Mo ro anama-iapopo-ri.’
5Boasi ro ibo, ‘Oro ro sopu namadi-iapopo-ri, ibose edi Moabi duriomoro orobo garamu ro oro ro ba-dedea, ina edi mere ro nama-arasomai-ri oro mere to ararasoro-ri pua, iedi karaburai dubu ro nou mere to ama-ararasoro-ri, iedi goto kere ro nou ro ama-irahidimai-ri.’
Karima boinana ro ibo, ‘Mo ro modobo pua kiapopo.
6Ina modobo pua iedi mere ro mo ro nama-arasomai-ri, nou ro mo simara goto kere namabu mutu kirahidimai. Oro ata nou se ie nou karima boinana ie, oro ro ba-diapopo-ro!’
7Iedi dubu ro tamaka iato gaubai, taie imese gaiwai Boasi aboto. Urubia ro ta-giauri-rimo ibo ie, tamaka na-waubai urubia ro na-iauri-dumo, iedi sopu ro imese kapopo ie ina owameai-ri pua, sabi ie. Isiraere urubia keba se idaibo tanaro isioidirotiti-mo, namabu kimade idaibo tanaro neito ioputiti-mo.
9Boasi ro ibo urubia sirio aboto, ‘Nio umoro ta-woi-mo, ta-irowidiro-mo abora iedi goto kere ro, imese namabu mutu, mo ro anama-iapopo-ri,10ina edi Moabi orobo garamu ro mo ro anama-edea-ri. Mo ro edi mere ro nama-arasomai-ri Maroni bobo nou ro ama-orobai-ri goto kere mutu, imese nou ro ama-irahidimai-ri. Ina Erimereki, Kirioni, Maroni neibi masiro kimaragoidiro sapuwo to iedi goto kere ro mo ro imese anama-iapopo-ri.’
11Beda urubia ro gorowotoi sabowa kiauri urubia mutu, neio ro ibo Boasi aboto, ‘Ria ra Rasere ra neitiro merebusere sirio beda sosoro girotuti-rido Isiraere urubia sipu ioudo garatamuai, iedi orobo ro nama-omidiro-ri oro mutu neitiro sosoro Iawe ro ba-mowai. Oro auna ia dubu to ama-ararasoro-ri Eparata ato, auna masiro ama-orobidiro-ri Beterehema sabowa ato.12Iuda ro ta-garasomai Tama ato nimo nasa Peresi. Ruti mere kirotuti gabo Iawe ro ba-memodobura-ro. Iato oro merebusere sirio nama-irasomai-ri nou ato, pupuwo ba-moi-mo, Peresi aramio merebusere neio sosoro.’
13Taie iato Boasi ro Ruti aise gedea, neitiro imese gou-rido Boasi edi moto ro neito iato imese imidirotiti-do. Iato ibo wimidirotiti-do, Ruti niro ti-gowea, iato dubu mere goroto. Iedi mere ro Godi ro gaiwai-ro neitiro aboto.
14Taie sabowa mamio iato gutura-rimo Naomi aboto, ‘Iawe ba-demowabutiti, oro aramu kainai nou ro omia-die. Nedi mere kainai ro saiki ata auna dubu to nou ro ama-ararasoro-ri Isiraere duriomoro ato.15Oro komidiro keremiro nou ro meana to ama-iwawoidiro-ri. Oro nou ro ama-iauri-ri oro abere ia nama-oi-ri, oro nou ro ama-oworohuti-ri. Ruti ro meamea tanaro ta-isioidirotiti oro aboto, idaibo sosoro 7 osio ro kisioidiro modobo pua oro aboto, kaupoti Ruti ro meamea kiwarebai tanaro ta-isioidirotiti oro aboto. Oro aramu kainai ta-emowahau.’
16Naomi ro nou aramu kainai aise gorobai-ro iato imese owoubuatiti.
17Ina sabowa mamio ro ibo Naomi aboto, ‘Nedi aramu kainai ro oro do ie, oro gemowahau Ruti ro.’
Taie neio ro masiro imese gemiditi-rimo edi mere kainai ro Obedi to, ina Obedi ro Iesi garasomai, ina Iesi ro Deibidi garasomai.
18Urubia sipu Peresi aboudo gosuruwo-rimo. Peresi ro Hesoroni garasomai.19Hesoroni ro Rama garasomai. Rama ro Aminadabi garasomai.20Aminadabi ro Nasoni garasomai. Nasoni ro Saromoni garasomai.21Saromoni ro Boasi garasomai. Boasi ro Obedi garasomai.22Obedi ro Iesi garasomai.
Ina Iesi ro Deibidi garasomai, nou ro gomidiro auna ia eputa dubu to Isiraere duriomoro ato.