Read Kiwapotai 19

Kiwapotai19

Sirio urubia ro Godi gemowabu-rimo

¹Kebase tanaro ta-gororosioidiro-rimo, ina mo ro nato nirorowai owera togo Adiri sabowa ato na-gotobowa-ro. Nedi urubia sirio ro kamade ri giaiauti-rimo ibo, ‘Iawe se memowabu-rimo! Auna masiro pupuwo korosa mutu Godi abato ba-miamotiti. Nimo ubauba aboudo nou ia ro niapopo-ro.²Mabu nou ia ro wisa kiaiwo ato, nou ro morobise mino to, ibose tuputupu mino to kimeiouti ie. Iawe Godi se memowabu-rimo! Mabu nou ro nedi auna era gabo orobo ro koto ta-gowai. Nou ro nedi duriomoro ro nato urubia sirio ubauba ta-giwaititi, nou edi ubauba durupi ubi tanaro ro neito. Nedi era gabo orobo ro Godi ro ubauba wisa ta-gomia mabu nou ro giopiauti Godi edi sowake urubia ro.’

³Tuturu to owamo pua owera togo urubia sirio aboudo ina nato gotobowa-ro kamade ri neio nato giaiauti-rimo, ‘Iawe memowabu-rimo! Nou aboudo era gahuta womu tato womu tato aise owiorotiti-die.’

⁴Taie iato 24 eputa urubia, 4 keremiro nakomu peteibi mutu aise giroruo-ibi kauhio to Godi neibi ro iato gemowabu-birimo. Nou ro imidirotiti ohu komidiro nakomu ato neibi ro nou gemowabu-birimo. Neibi kemowabu owera auna se ibo garo-birimo, ‘Ibose ba-mororosioidiro-mo! Iawe se memowabu-birimo!’

⁵Iato mo ro ata owera kodu ohu komidiro nakomu rido nato nirorowai ibo na-gutura-ro, ‘Nio etio ra nou sowake urubia Godi tere na-ematiti-dumo, nio arua awawo masiro na-irobidiro-dumo ina nio arua dorogora urubia ie, modobo ie nio ro Godi kemowabu.’

⁶Tuturu to owamo pua ina mo ro urubia sirio owera sosoro nimororowai, idaibo kadeidiro obo diamo sosoro, ibose gururu sosoro diamo aise geremohumo-ro. Iedi urubia sirio ro kamade ri aise giaiauti-rimo, ‘Iawe se memowabu-rimo! Mabu nimo Abera Naramu Godi imese pupuwo ia ie, imese namabu sirio nou ro iauri.⁷Nimo kamade ro auna ia se miwati-ro, nou masiro ohu ia to mowiourio-rimo. Mabu Sipisipi Dawade orobo kedea tau ta-gorobai-die, ina nu orobo ta-geremododiai nou ro kedea aboto.⁸Nedi orobo ro mea didiri marea tato obotama orori na ta-gomia-rimo.’ (Mea didirididiri marea tato obotama owapotaidiro-die meamea tanaro Godi edi tarena urubia ro neio ro na-isioidiro-dumo.)

⁹Iato mo sowake urio ro nedi owera ro nou nemowapotai-ro, ‘Nedi owera ro oro ro buka ato aise ba-disioidiro, Godi ro owera etio aboto gimerio Sipisipi Dawade marete soriomu aboto ou ri, nedi urubia ro neio ro Godi aboudo meana kiwia ie.’
Nou ro ibose nedi owera ro nou gadabuai-ro, ‘Nedi owera ro kebase na-naro nou morobise owera ie Godi aboudo ie.’

¹⁰Mo ro nedi owera ro na-nirorowai sowake urio sairo mabu ato egenabo nereteamoidiro nou emowabu rie. Kaupoti sowake urio ro mo aboto owera simara se gutura-ro ibo, ‘Idaibo tanaro osioidiro ate! Godi ia se ba-demowabu! Oro ie, mo ie, oro borubi kimibiria urubia mutu morobise owera Iesu sapuwo to na-imowauti-dumo, nimo imese Godi sowake urubia ie. Etio ro imowauti-dumo morobise owera Iesu sapuwo to, neio Godi ipusu owera urubia sosoro ie.’

Iesu ro ta-giwamedei-ma ibisa nou ipusu owera dubu mutu

¹¹Toboro ohu to ina nato nawota ei! Adiri sabowa magere korodobura se nowea. Mo sosoro gabo ato keakea hosi se nowea na-gotoi. Hosi ohu ato edi dubu ro gomidiro-ro nu masiro ibo ie ‘Nou ro beda owera karo ra aise kosioidiro ie’. Nu ata masiro ‘Morobise’. Urubia nou ro wisa tuputupu mino to kimowame ie erere tanaro kisioidiro sapuwo to. Nou ro urubia boso kimowou ato, nou ro boso tuputupu mino to kisioidiro ie.¹²Nu idomari teibo era pina sosoro iriwaretiti-do, ibose nou eputa ato sirio eputa dubu hato ta-geremamiti. Nou durupi ato ata sosoro masiro ro giateidiro, urubia umoro pua, nu ia nakara umoro ie iedi masiro ro.¹³Nou ro tuturu sedo goroidiro, boso urubia nou ro na-giopiauti neio edi karima ro sedo nou ro aise gorobai. Edi dubu ro nu masiro ‘Godi Owera ie’.¹⁴Adiri sabowa rido erere patu boso koroho urubia nu saro rido aise gobodoro-rimo. Nedi boso urubia ro imese sirio ia ie, neio meamea keakea marea tato obotama neito geremeduti-rimo, neio ro ibose erere se keakea hosi to gou-rimo boso aboto.¹⁵Neio edi boso eputa dubu ro nou matagoro rido susura giri nou ro se gasomaidiro-ro, duriomoro urubia sirio iedi giri ro neito iopiauti rie. Sirio duriomoro saiki ata nou ro eputa dubu edi auri gamini ro urubia sirio nou ro neito koko muro to ama-iwaboi-ri. Nedi dubu ro nou ro gereipi iopu ama-ituti-ri, kituti moro rido karima obo isi ioudo amadimi-isuwoduti-ri. Iedi kituti moro ro nato Godi imese pupuwo ia dubu nu niro pupuwo kemagagai moro ie.¹⁶Nu sedo ato ina urumere ato nedi masiro ro nou ro gateidiro, Imese beda mutu eputa urubia sirio, Sipisipi Dawade neio eputa dubu e. Ina beda mutu abera naramu sirio, Sipisipi Dawade neio Abera Naramu e.

¹⁷Mo ro ata sowake urio nato nowea saiki ato na-gotoi-ro. Iedi sowake urio ro erere pawa sirio toboro ato na-gorowadaudiro neio nou ro nato gimowapotai auna owera to ibo, Godi ro auna soriomu ama-osioidiro-ri, nio nedi soriomu ro nou aboto ba-daradabuti-rimo!¹⁸Nio nou ri nirumai eputa urubia sirio, boso awawo urubia, boso abato pupuwo to koroho urubia, hosi neio simara kiwararioidiro urubia mutu, simara woko kisioidiro urubia, urubia wisa tato woko na-imesioidiro-dumo, masiro tato urubia, awawo masiro urubia, imese sirio urubia, neio pamo durupi nio ro amadimi-iho-ri.

¹⁹Mo iato na-nirarowea ibisa se nowea eputa urubia sirio mutu, erere duriomoro rido na-goroho-rimo, neio kaupoti moro to gorowoiriamuti-rimo. Neio simara boso koroho urubia mutu gou-rimo, keakea hosi ato edi na ro gomidiro boso nou aboto gowou-rimo nou simara boso urubia mutu.

²⁰Kebase, karasaubuti ipusu owera dubu ro sirio pupuwo korosa tanaro ta-gisioidiro oromo ibisa ubi maumo ato. Nedi pupuwo korosa tanaro ro neito urubia sirio nou ro ta-gigediouti. Nedi urubia ro ibisa edi isabuna ro na-gimade-rimo, ibose nou edi ota titi ro na-emowabutiti-mo, io nou ro neio se gigediouti. Kaupoti ibisa, nou karasaubuti ipusu owera dubu, ibose nou edi boso urubia sirio ro neio mutu, keakea hosi ato edi na ro gomidiro-ro neio nou pupuwo mutu modobo ia pua. Nou ro ibisa nato aise gorobai, karasaubuti ipusu owera dubu mutu. Ibisa ra karasaubuti ipusu owera dubu ra neitiro nou ro keremiro se giherai-ma era paruo to, agoago nadi era bato irewaretiti-die.²¹Neitiro edi boso urubia ro, keakea hosi ato edi na ro gomidiro-ro giri sapuwosapuwo susura nou matagoro rido na-gasumawado-ro, neio neito giopiauti. Neio edi pamo durupi sirio ro pawa sirio nato garageai-rimo, modobo pua neio ro kiho to kiporeai.