Read Kiwapotai 17

Kiwapotai17

Era gabo orobo ibisa ro gowai ubauba

¹7 nuku edi sowake urio ro girobidiro-rimo neibi ata ro gutura-ro mo aboto ibo, ‘Mo mutu mou-rido, oro mo ro anama-emowawea-ri edi auna masiro era gabo orobo ro, nou ro Godi aboudo beda sosoro ubauba wisa ama-imidai-ri. Nu sirio oromo ato namabu keremahudirio woko iworohutiti.²Erere duriomoro eputa urubia sirio nou aboto na-irohotiti-dumo, era gabo tanaro isioidirotiti-dumo. Ibose imese sirio urubia nedi sopu duriomoro ro nato na-irowomidiro, nou aboto irohotiti-dumo era gabo tanaro isioidiro ri. Ina nedi tanaro ro neio daradara nou ro iwaititi. Koko obo kidio ato daradara beda sosoro koroho ra, ibo irohotiti-dumo.’

³Ina iato Tarena Urio ro noworohuti, taie Godi edi sowake urio ro nou ro aise norobai-ro, imese newedei goto se duriomoro to. Mo ro iato kaupoti orobo se nowea, nu karima ia ibisa ato gomidiro. Iedi ibisa ro nato Godi masiro ubauba kowaititi owera sirio neio ro se giateidiro. Iedi ibisa ro nu 7 eputa mutu e ina 10 gaini neio ro giawotidiro-ro.⁴Iedi orobo ro nu meamea ia karima awawo mani obotama neito geremeduti. Nou ro nou giroidiro gorodi namabu, awawo mani nadi kainakaina, nu imese ta-gobodiai keremeduti. Nou ro gorodi panikere se gorobidiro, iedi panikere goro ro nou ato, erere mareamarea tanaro nou edi upo tanaro maumo ato na-iamo, imese sirio ia ubauba marea nibo mutu, neio ro giamo, edi ubauba nibo ro panikere neio ro kagomuti ie.⁵Ina nou witoro ato nedi piro masiro ro neio ro giateidiro, Babironi Sabowa Gebari, Era Gabo Tanaro Nou Aboudo Isuwoduti-dioumo, ina Mareamarea Korowaititi Tanaro Nou Aboudo Isuwoduti-dioumo.⁶Ina iedi orobo ro mo ro nato nowea, nu koko obo kidio sosoro goroho. Mabu Iesu edi tarena urubia ro na-owautiti-mo nou sapuwo to arua urubia ro ta-giopiauti-rimo, ina nedi orobo ro neio kiopiauti sapuwo to nou koko obo kidio sosoro nou kamade ro owatiti. Ina nu mo ro na-nowea mo iato na-niraroweauti, mo kimaragoidiro ro nopia.

⁷Ina mo sowake urio ro nato nemodowa-ro, ‘Oro kimaragoidiro ro etou ri opia? Oro mo ro piro owera anama-emowapotai-ri iedi orobo ro nou sapuwo to, ibose nu edi ibisa ato na-omidiro. Iedi atu ibisa ro nou se ie 7 eputa mutu e, 10 gaini na-giawotidiro-ro.⁸Iedi ibisa ro oro ro na-owea nu kebase ta-gomidiro, nu abora omidiro pua, ina ido auna ia bobo rido amadi-erereihai-ri. Kaupoti nu Godi ro era paruo to ama-eherai-ri. Duriomoro ido to gosioidiro, beda urubia ra keremiro namadimo-owea-ri, neio masiro Godi ro buka ato ta-gisioidiro. Kaupoti nedi urubia ro masiro kisioidiro tato, neio kimaragoidiro ro ama-iopia-ri ibisa neio ro namadimo-owea-ri. Mabu kebase nou ta-gomidiro, abora omidiro pua, ina nou ro ama-omidiro-ri.’

⁹Sowake urio ro ina ibo garo, ‘Modobo ie kimaragoidiro maumo mea se kiosora nedi owera ro nou sapuwo to. 7 eputa io 7 podo iwapotaidiro-die, iedi orobo ro iato imidirotiti.¹⁰7 eputa ibose 7 eputa urubia iwapotaidiro-die, io keba se 5 ta-gorowomidiro eputa urubia to, abora kaupoti ro omidiro, ina ata ido amadi-ou-ri. Nu nama-omidiro-ri, Godi ubi ato nou tuturu to omidiro-ri pua.¹¹Keba se edi ibisa ro gomidiro ina abora omidiro pua, nou ro ama-ararasoro-ri eputa dubu to. 7 eputa urubia beda sosoro gorowomidiro, nou ro ama-ararasororo-ri eputa dubu to taie, nou Godi ro nato ama-eherai-ri era paruo to.¹²Oro ro na-iwia 10 gaini iwapotaidiro-die ibo 10 eputa urubia neio eputa urubia to ido amadima-ararasoro-ri. Ina ibisa mutu neio komukere tau to eputa urubia to neito ama-orowomidiro-ri,¹³tanaro neio ro kaupoti ubi to amadimi-isioidiro-ri, iedi eputa urubia sirio ro neio edi pupuwo korosa ro ibisa tu to amadimi-iedea-ri, neio eputa dubu to ararasoro ri.¹⁴Taie nedi urubia ro atu se nato amadima-aradabuai-ri, boso nato amadimo-owou-ri Sipisipi Dawade aboto. Ina Sipisipi Dawade ro etio giapoi nou urubia to, ina morobise to na-wasorotiti-dumo, neio nou mutu amadima-aradabuai-ri. Iedi eputa urubia sirio ro ibisa mutu neio Sipisipi Dawade ro imese moro to ama-iwororuwo-ri. Mabu beda mutu abera naramu sirio, Sipisipi Dawade neio Abera Naramu e. Ina imese beda mutu eputa urubia sirio ra, Sipisipi Dawade neio eputa dubu e.’

¹⁵Sowake urio ro ibo mo aboto, ‘Iedi oromo sirio ro oro ro na-iwia, era gabo orobo namabu keremahudirio woko iato na-iworohutiti, iedi oromo sirio ro erere gu iwapotaidiro-die, erere tanaro urubia, erere duriomoro urubia, erere owera urubia io neio ie.¹⁶Ina iedi 10 gaini ro oro ro na-iauri ibisa mutu, neio ro edi era gabo orobo ro amadimo-ohoio-ri. Ibose nou edi namabu sirio ro neio ro amadime-emowadaudiro-ri, ina nou neio ro nakara se porose se amadime-emeserai-ri. Neio ro nou dao amadimo-ouho-ri, ina era to iato amadime-emosubuwa-ri,¹⁷mabu Godi ro nedi 10 eputa urubia ro neio eputa to ta-giedea nou ubi tanaro aise kisioidiro aboto. Neio ro ubi to nou mabu ato gomidai-rimo iedi eputa urubia sirio ro neio edi pupuwo korosa ro ibisa tu to amadimi-iedea-ri, womu tato Godi owera na-iarotiti-ro nedi tanaro ro nou sapuwo to morobise to nato amadimo-ororosioidiro-ri.¹⁸Iedi era gabo orobo ro oro ro na-owea nou auna sabowa gebari ie, imese duriomoro eputa urubia nou ro sopu to iauri-die.’