Read Mataio 6

Mataio6

Namabu tato urubia ibo gi-iwarebai-ri

¹Iesu ro urubia ina ibo gimowauti, ‘Mea se! Nio ro meamea tanaro kisioidiro ato, modobo pua nio ro urubia sosoro gabo ato kisioidiro, nio neio ro imowabu ri. Nio ro idaibo tanaro namadimi-isioidiro-ri urubia sosoro gabo ato, nio Abera Adiri sabowa ato na-omidiro-die nio nou ro wisa imowame-ri pua.

²Ina noudo ie nio ro namabu tato urubia beda tau ato iwarebidiro-dumo, aupi urubia ro umoro oi mamo. Piro se gi-isioidiro-ri nedi kiwarebai tanaro ro. Mabu karatigi urubia ro idaibo tanaro paea se isioidirotiti-dumo urubia ro iauri ri. Neio ro karadabu moto ato isioidirotiti-dumo, ibose auna gabo bara ato isioidirotiti-dumo urubia ro imowabu ri. Nio mo ro morobise owera mimowapotai-ro! Nedi urubia ro wisa urubia aboudo momuo se imese imade-dumo, ido pua ie.³Kaupoti oro ro namabu tato urubia kiwarebai ato, tumodi tu ro beda tanaro osioidiro, pere tu umoro oi mamo.⁴Ina oro Abera nou auna umoro ie oro ro piro se beda meamea tanaro kisioidiro ra. Ina oro nedi meamea tanaro ro nou kisioidiro sapuwo to, wisa nou ro kemowameai ie.’

Godi aboto kararatoro owera idaibo sosoro gi-aro-ri

⁵‘Ina nio Godi aboto kararatoro owera karo ato, karatigi urubia beda mino to iraratorotiti-dumo, ibo orowati mamo. Mabu neio auna ubi ie karadabu moto ato Godi aboto iato kararatoro ie urubia sirio ro iauri rie. Oro mo ro morobise owera memowapotai-ro! Nedi urubia ro wisa urubia aboudo momuo se imese imade-dumo, ido pua ie.⁶Kaupoti Godi oro ro kararatoro ato, nakara moro to gi-ou-ri taie magere aise gi-opai-ri. Taie kiauri tato Godi nou aboto nato gi-araratoro-ri. Ina nimo edi atu Abera ro nou nakara se auna umoro ie oro ro piro se beda kararatoro owera karo ra, wisa nou ro kemowameai ie.

⁷Ina ibose Godi aboto kararatoro owera karo ato, mabu tato kararatoro owera inaina aro mamo. Io Godi umoro tato urubia idaibo tanaro nou isioidirotiti-dumo. Mabu neio ibo imaragoidirotiti-dumo, tututu kararatoro owera karo ato neio Godi ro kimerewidiro ie.⁸Nedi urubia ro neio sosoro orowati mamo. Mabu nio edi Abera ro Godi kebase umoro koi ie nio abato beda nakomu ra modobo ato kiamo tato.

⁹Ina noudo ie nio Abera Godi aboto kararatoro owera karo ato, idaibo mino to gi-araratoro-ri. Nimo Abera Godi Adiri ato na-omidiro-die, oro masiro imese sirio urubia ro ba-memowabutiti-mo mabu oro masiro tarena ie.¹⁰Ina oro ro kiwaboi maumo ato imese urubia sirio ba-mirowomidirotiti. Oro ubi tanaro imese urubia ro ba-misioidirotiti-mo nedi sopu duriomoro ro nato, beda sosoro isioidirotiti-dumo Adiri sabowa ato.¹¹Saiki gabagabo ato oro ro modobo ie nimo ohona simara modobo ato kimio.¹²Nimo ia ro woki beda sosoro nimatiti-dumo ubauba, arua urubia ro na-isioidiro-dumo nimo aboto, io nimo ubauba na-nisioidiro-dumo oro ro modobo ie idaibo sosoro kimatopeamuti.¹³Koko kiwaibirio tanaro aboudo oro ro modobo ie nimo kiwagarewado, ibose ubauba mabu dubu aboudo, oro ro modobo ie nimo kiwasiouti.’
Iesu ro kowasoro urubia kararatoro owera ibo gitamudiro.

¹⁴‘Nio aboto ubauba etio ro isioidiro-dumo, neio edi ubauba ro nio ro namadimi-imatopeamuti-ri, ina nio Abera Adiri sabowa ato na-omidiro-die, nio edi ubauba ro nou ro kimatopeamuti ie.¹⁵Ina ubauba nio aboto etio ro isioidiro-dumo, nio ro kimatopeamuti tato, nio edi Abera ro nou ro nio edi ubauba ro imatopeamuti-ri pua.’

Ohona kiho tato korowomidiro ato, tanaro ibo ie

¹⁶‘Nio ohona kiho tato korowomidiro ato Godi kemaragoidiro aboto, kamade tato se orowomidiro mamo. Mabu karatigi urubia ro idaibo tanaro nou isioidirotiti-dumo, urubia umoro oi ri ibo neio ohona kiho tato diriwodiriwo se saiki tuturu orowomidiro-die, urubia ro imowabu rie. Nio mo ro morobise owera ibo mimowapotai-ro! Nedi urubia ro wisa urubia aboudo momuo se imese imade-dumo, ido pua ie.¹⁷Kaupoti oro ia nakara se ohona kiho tato komidiro ato, obo diowa, mea mino to deremede.¹⁸Idaibo oro urubia ro eibimai-ri pua ibo oro saiki tuturu omidiro-die kiho tato. Kaupoti oro ro kiauri tato Abera nu nakara se auna umoro ie oro ro piro se beda meamea tanaro kisioidiro ra. Ina oro ro nou aboudo mea wisa komidai ie.’

Meamea namabu Adiri sabowa ato gi-iaremo-ri

¹⁹‘Awawo mani namabu nedi sopu duriomoro ro nato na-iworohuti-dumo nakara se eremowoiriamuti mamo. Mabu kipiri genoho mutu neio ro ubauba aise kiwai ie, ibose neio esepa koititi ie. Ina piro urubia ro modobo se kowamo ie kiwopiro.²⁰Kaupoti nio ro simara ia sapuwo to meamea namabu modobo ie Adiri sabowa ato kiaremo. Mabu neio genoho ra kipiri ra ro iho-ri pua, ibose esepa oititi-ri pua. Ina piro urubia ro modobo pua kiwopiro.²¹Oro ro beda moro ato kiaremuti ra, oro edi giropu ro iato ibose to kowamo ie.’

Oro idomari teibo pina sosoro ie

²²‘Oro idomari teibo durupi sapuwo to pina sosoro ie. Oro ro idomari teibo mea se na-iworohuti-ma, oro durupi momuo se imese woroworo ia se koworohuti ie.²³Kaupoti oro idomari teibo duwoduwo se na-iworohuti-ma, oro edi durupi ro momuo se duwoduwo maumo ato ama-owamotiti-ri. Ina noudo ie beda woroworo ra oro durupi ato nou duwoduwo sosoro na-owamo, nedi duwoduwo ro imese sisibo ia ie!’

Godi ubi tanaro ina duriomoro namabu ubi tanaro

²⁴‘Ata dubu ro modobo pua netewa teibo eputa dubu teibo ubi tanaro kimesioidiro-ma. Nou ro ata eputa dubu owera se kirowidiro ie, ina ata eputa dubu owera kirowidiro tato. Ina idaibo sosoro ie, nio ro modobo pua Godi nio eputa dubu to kapoi, ibose duriomoro namabu nio eputa dubu to kapoi.’

Beda mutu namabu ro iamo keremiro kiwaboi sapuwo to neio sapuwo to modobo pua kimaragoidiro siriosirio kiworohuti

²⁵Iesu ro owera inaina aise gemoguwado. Nou ro ibo, ‘Ina noudo ie nio keremiro sapuwo to, ohona ra obo ra sapuwo to auna se imaragoidiro mamo, ibo beda ohona namadimi-iho-ri, beda obo namadimi-idio-ri, beda namabu namadimi-iroidiro-ri? Nio umoro ra ibo nio keremiro auna nakomu e. Kiho namabu, kiroidiro namabu awawo nakomu pua.²⁶Nio ro ma-diauri-mo pawa ohu ato na-irowadaudirotiti-dumo, neio ro kiho ota iopu nakara se keremobouti pua, ohona patu kisaubo pua, ibose neio ohona keremaremo moto tato ie. Kaupoti nio Abera Godi Adiri sabowa ato na-imidirotiti-die, neio ota iopu nou ro imiotiti-die. Auna nakomu etou ra, urubia ra o pawa ra?²⁷Ina nio kimaragoidiro siriosirio kiworohuti ato, nedi tanaro ro neito nio simara korowomidiro keremiro tuturu tau mere to kiwaboi ra? E e, idaibo gabo potoro ia ie!

²⁸Ina mabu boira nio durupi namabu aboto auna se na-imaragoidirotiti-dumo? Nio ro ma-dimaragoidiro-mo tumu kakamu na-isuwodutiti-dumo, neio woko kisioidiro pua, ibose neio obotama nakara se keremowaruwoidiro pua.²⁹Kaupoti nio mo ro nedi owera ro nou mimowapotai-ro, eputa dubu Soromoni nou egea namabu sirio dubu e. Kakamu idaibo sosoro na-imedutiti, Soromoni idaibo sosoro namabu to eremedutiti pua.³⁰Tumu kakamu na-isuwoduti-dumo, neio Godi ro mea sosoro imedutiti. Neio tuturu tau to korowotoi pua, pamo na-owoi-dumo, taie era to kiherai ie. Ina nio Godi ro ubauba se ama-imedutiti-ri ra? Nio kimibiria imese kainai ia ie!

³¹Ina noudo ie ohona ra obo ra aboto kimaragoidiro siriosirio iworohuti mamo. Idaibo beda ohona namadimi-iho-ri? Ina beda obo namadimi-idio-ri? Ina beda namabu namadimi-iroidiro-ri?³²Mabu Godi umoro tato urubia idaibo namabu aboto auna se imaragoidirotiti-dumo. Ina nio Abera Adiri sabowa ato na-imidirotiti-die, nu auna umoro ie nio keremiro kiwaboi namabu, nou ro kimio ie.³³Kaupoti auna tanaro nou e, nio ro Godi edi kiwaboi tanaro ro nio keremiro ato kebase nou kedea modobo ie, nou edi tuputupu tanaro ro nou kisioidiro mutu. Ina nio edi keremiro kiwaboi namabu ro nio Godi ro imese ama-imio-ri.

³⁴Ina noudo ie ata kowaroho saiki nou edi kimaragoidiro siriosirio mutu namadi-ou-ri, modobo pua abora iedi kimaragoidiro siriosirio ro nou aboto kidabuai. Ina mabu boira nio ro ohu rido kowaroho saiki sapuwo to na-eremotomo-dumo? E e, idaibo orowati mamo. Kowaroho saiki nou simara mibo mutu amadi-ou-ri.’