Read Mataio 16

Mataio16

Iesu ina a-gowaibia-rimo

¹Parasi urubia Sadusi urubia mutu nato gou-rimo Iesu owaibia ri. Neio ro Iesu nato gowaibia-rimo ibo nou ro ata pupuwo korosa tanaro ata osioidiro ri, neio umoro koi sapuwo to ibo nou Godi ro gemeiriai-ro neito.

²Ina neio Iesu ro ibo gimowameai, ‘Koriodoi saiki karima se kowamo ato, nio umoro koi ie ibo kowaroho saiki modobo ato ama-owaroho-ri.³Ibose nio ro kowea ato daroho bubu tumu sapuwo rido kiwomi ato, nio umoro koi ie ibo daroho amadi-ou-ri. Nio umoro samo to koi ie toboro ato beda sosoro tanaro ro kororosioidiro ra. Ina mabu boira nio ro nedi tanaro ro abora na-ororosioidiro-dumo nio ro umoro koi tato?⁴Nio imese ubauba tanaro kisioidiro urubia ie nio abora nedi urubia ro na-orowomidiro, uramio upi ro mau beda sosoro isebo-dumo, nio ro idaibo tanaro isioidiro-dumo Godi aboto. Pupuwo korosa tanaro auna se iosora-dumo. Kaupoti nedi tau ro nato ata pupuwo korosa tanaro ata nio ro owea-ri pua. Iona abato iedi pupuwo korosa tanaro ro na-gororosioidiro, io nouse ie nio ro nou amadimo-owea-ri.’
Taie neio Iesu ro aise gimeserai nou imese gou ata moro to.

Karasaubuti kitamudiro nouse ba-diwaruwo-mo

⁵Taie Iesu kowasoro urubia mutu obo paruo ata sapuwo to na-gorowateai-rimo, neio ro parowa kimidai aboto woki ta-gemati-rimo. Nedi owera ro Iesu ro nou gimowapotai-bi, ‘Mea se, Parasi urubia Sadusi urubia mutu neio parowa kaupai meresini mutu oroho-dumo.’

⁷Neibi ro iedi owera ro na-girorowai-birimo, nakara se iato geremowauti-birimo ibo, ‘Nou ro nedi owera ro na-waro mabu neibi ro beredi imidai pua, beredi tato se niabu-diebimo.’

⁸Neibi edi owera to geremowauti-birimo Iesu umoro ta-goi. Taie neibi nou ro nato gimowapotai-ibi, ‘Nibi kimibiria imese kainai ia ie! Mabu boira nibi ibo na-waro-bimo neibi beredi imidai pua, beredi tato se niabu-diebimo?⁹Nibi umoro mea se iamo pua ra, idaibo owera noudo aro-bimo? Nibi ro woki a-gemati-bimo ra 5,000 dubu 5 beredi to na-niwoubua? Ina ohona mapapati nibi ia ro beda mutu gatere giodiawado-birimo?¹⁰Ibose 4,000 dubu ohona na-giho-rimo, 7 beredi aise na-gorowatuti-rimo neio ro nou giho-rimo. Ina ohona mapapati nibi ia ro beda mutu gatere giodiawado-birimo?¹¹Nedi tanaro sirio ro woki a-gimati-bimo ra? Mabu boira mo edi owera ro nibi ro mea se kimidai tato? Mo ro beredi sapuwo to aro pua. Abora nedi tau ro neido mea se ba-deremowotoi-bimo. Parasi urubia ro parowa kaupai meresini mutu oroho-dumo.’

¹²Iesu edi owera to garo neibi ro dese to umoro nato goi-birimo ibo pua parowa kaupai meresini ato karo. Nou ro Parasi urubia Sadusi urubia mutu neio edi karasaubuti kitamudiro ro nou sapuwo to garo.

Pita ro paea se ta-gowapotai ibo Iesu Godi mere ie

¹³Iesu kowasoro urubia mutu imese gidiai-birimo Siseria-Piripai duriomoro to. Taie nou ro kowasoro urubia nato gimodowai-bi, ‘Imese Urubia Kiauri Dubu mo nouse ie, urubia ro mo etu to nasoro-dumo?’

¹⁴Ina kowasoro urubia ro Iesu ibo gemowameai-birimo, ‘Arua urubia ro oro Ioane to asoro-dumo, obo to edi dubu ro iwarumiautiti. Ina arua ro ibo aro-dumo oro Eraia ie. Ina arua ro ibo aro-dumo oro Ieremaia ie, o Godi ipusu owera dubu ata ie.’

¹⁵‘Ina nibi beda sosoro to imaragoidiro-bimo, mo nibi ro etu to nasoro-bimo?’

¹⁶Ina Saimoni Pita ro ibo, ‘Oro Godi ro kohodowa dubu nouse ie. Godi keremiro mabu dubu oro nou mere ie.’

¹⁷Iesu ro Pita ibo gemowameai, ‘Oro Godi aboudo meana ta-gowea, Pita Iona, Godi edi umoro ro oro aboto ta-waiwai-ro. Nedi morobise owera ro mo sapuwo to, oro aboto ata sopu duriomoro dubu ata ro owapotai pua. Mo abera Adiri sabowa ato na-omidiro-die, nou aboudo ie.¹⁸Ina oro mo ia ro memowapotai-ro, oro masiro Pita ie maumo owamo ibo, Nadi. Nedi nadi ro nato, mo urubia nato anama-iwotoburio-ri. Pamo edi korosa ro mo edi urubia ro nou ro owaruria-ri pua.¹⁹Godi edi kiwaboi tanaro ro nou maumo ato beda roka ki ro iamo, neio oro aboto anama-iaiwai-ri. Nedi duriomoro ro nato oro ro ubi tato to beda tanaro ro ama-iapoi-ri, Adiri sabowa ato iedi atu tanaro ro Godi ro ubi tato to ibose to ama-iapoi-ri. Ibose sopu duriomoro ato oro ro ubi to beda tanaro ama-iadodorai-ri, Adiri sabowa ato Godi ro ubi to ibose to ama-iadodorai-ri.’

²⁰Taie Iesu ro kowasoro urubia koko owera iato gimia ibo, ‘Nio ro urubia imowauti ate ibo mo Godi ro kohodowa dubu nouse ie!’

Iesu simara pamo kowea sapuwo to geremabuti

²¹Nedi tau ro neido Iesu pamo kowea sapuwo to kowasoro urubia paea se keremabuti neido gatamuai. ‘Mo Ierusarema sabowa to anama-ou-ri. Mo ro sirio koko tanaro anama-iauri-ri sabowa kiauri urubia aboudo, Godi ra urubia ra turituri awawo urubia aboudo, ibose Mose sabi kitamudiro urubia aboudo. Mo neio ro anamadima-apoi-ri arua urubia aboto opia ri. Ina netewa didi saiki nama-orobai-ri, mo Godi ro pamo rido nato anamadi-owameai-ri.’

²²Pita ro nedi owera ro na-girorowai, Iesu nou ro nakara moro to aise gowou. Nou ro Iesu nato gemadowerai, ‘Godi ro gabo aise ba-mopai! Nedi tanaro ro oro aboto beda kororosioidiro pua!’

²³Iesu Pita aboto ketae se gapimaidiro, ‘Pita oro Satani sosoro ie. Mo aboudo neido daragare! Oro ubi ra mo ro Godi ubi tanaro kosioidiro tato? Oro edi kimaragoidiro ro Godi kimaragoidiro pua, duriomoro urubia kimaragoidiro iworohuti!’

²⁴Iesu owera ina iato gutura kowasoro urubia aboto, ‘Etu ra ubi na-iamo mo kowasoro aboto, nou simara ubi tanaro aise ba-mimeserai. Nedi dubu ro sirio saiki Godi ubi tanaro aise ba-misioidiro ina pamo kowea nou sapuwo to, io modobo ia ie.²⁵Etu ra keremiro simara ubi tanaro ato nama-owaboi-ri, io nou ro ama-asoperai-ri. Kaupoti beda dubu ro aseperai keremiro mo sapuwo to, nou ro orio keremiro Godi aboudo ama-owea-ri.²⁶Imese beda mutu namabu sirio ra nedi duriomoro ro nato na-iamo, urubia dubu simara na to na-wararasoro, kaupoti nou keremiro nato nama-asoperai-ri, ina iedi dubu ro ata meana ata ama-owea-ri ra? Morobise ie, iedi namabu sirio ro neio ro owarebai-ri pua. Morobise owera nou e, ata gabo ata owamo pua urubia dubu ro Godi wisa komia, keremiro kowameai aboto.²⁷Mabu etu Imese Urubia Kiauri Dubu neito namadi-orowameai-ri, Godi sowake urio mutu nou simara Abera nou woroworo ato amadi-orowameai-ri. Ina nedi tau ro nato nou ro erere urubia imese tanaro neio ro na-isioidirotiti-mo, neio sapuwo to wisa nato ama-imio-ri.²⁸Nio mo ro morobise owera mimowapotai-ro! Nio arua nato na-orowotoi nio ibose to ama-orowomidiro-ri, orowaburo-ri pua, tauo kebase nio ro Imese Urubia Kiauri Dubu amadimo-owea-ri, Godi ro kiwaboi tanaro maumo ato namadi-ou-ri.’