Mareko13
Aborabora tanaro amadimo-ororosioidiro-ri womu tau ato
1Iesu Tarena Moto na-gemeserai ata kowasoro dubu ro nato gutura. Nou ro ibo, ‘Kitamudiro dubu ma-diwia nedi nadi moto ro meana ia se gisioidiro-rimo!’2Taie Iesu na-girarowea nou ro ibo, ‘Nio ro tiauri-dumo iedi moto gebarigebari ro na-worowotoi-die, ido orowotoi-ri pua amadime-eresebuti-ri ata moto ata masiro ararasoro-ri pua.’3Ata tau Iesu Oribi Podo ohu ato na-gomidiro Tarena Moto sapuwo ato gotoi-ro. Taie Pita Iemisi Ioane daro Enduru neibi nou aboto iato gou-birimo nakara se. Neibi ro nou nato gemodowa-birimo,4‘Iesu neibi ma-dimowapotai-biro, beda tau ato ra idaibo sosoro tanaro namadimo-ororosioidiro-ri? Etou tanaro anama-imowawea-ri oro ro nimo umoro koi aboto ibo womu tau aupise ie?’5Iesu ro ibo gimowameai-bi, ‘Mea se ba-deremowotoi-bimo keremododiai modobo ie, oro ata dubu ro kegediai modobo pua,6mabu arua urubia tou-diomo, mo to amadima-aratigi-ri. Neio ro amadima-aro-ri ibo, “Mo Iesu nou se ie.” Neio ro urubia sirio sairo rudo amadimu-udidiro-ri.7Ina ibose nedi tau ro nato nio ro boso owera amadimi-irowidiro-ri amia duriomoro ato namadimo-ororosioidiro-ri, kaupoti nio tere oi ate nato. Iedi tanaro ro na-wororosioidiro-dumo nio ibo imaragoidiro ate womu tau to nereredea-diomo.8Ata duriomoro ata duriomoro mutu neitiro boso keremedea ie. Ibose ata sabowa ata sabowa mutu karado ie. Ibose sopu momuruwo arua duriomoro ato amadimi-iauri-ri. Ibose ie iedi tau ro nato erere duriomoro ato sogoi ama-araremo-ri ohona tato amadimo-oi-ri urubia sogoi ro ama-iwati-ri. Iedi tanaro ro namadimo-ororosioidiro-ri duriomoro gebari idaibo sosoro ie urubia orobo mere temeteme namadi-emowatumuti-ri keba se nedi tanaro ro neio ro amadimo-ororosioidiro-ri saro rido mibo sirio iato amadime-ereredea-ri.9Nio modobo ie nakara se keremododiai aboto mabu iedi tau ro nato urubia ro nio amadimi-irobo-ri, kerei to amadimi-ipesuti-ri karadabu moto ato, koto to amadimi-iworoho-ri gabamani sosoro gabo ato amadimi-iwotoburio-ri mo sapuwo to.Ibose nio ro amadimo-orowauti-ri mea owera mo sapuwo to. Nedi tanaro ro nou ri amadimo-ororosioidiro-ri nio aboto mabu nio mo kimibiria urubia ie.10Kaupoti nedi tanaro ro ido ama-ororosioidiro-ri nio aboto, tau keba se mea owera mo sapuwo to imese ama-orobodorouti-ri imese duriomoro gabogabo, owera erere bato iamo.11Ina nio gabamani ro kirobai ato koto aboto nio karo owera aboto imaragoidiro mamo, nio Tarena Urio ro kitamudiro ie beda owera to karo ra.12Ibose naramu dubu ro saiki ata simara neama ama-apoi-ri arua urubia aboto opia ri. Mabira ibose nou simara neama ama-apoi-ri arua urubia aboto opia ri. Ibose abeamio neio simara merebusere amadimi-iasouti-ri arua urubia aboto iopiauti ri. Merebusere ro atu sosoro tanaro amadimi-isioidiro-ri simara mamio abeamio aboto.13Urubia sirio ro nio masawe amadimi-iwia-ri mabu mo edi ubi tanaro ro nio ro tisioidiro-dumo.
Kaupoti womu tau nama-orobai-ri beda urubia ro iwotoi-dumo koko se neio ro womu tato womu tato keremiro amadimo-owea-ri.’14Iesu ro ibo, ‘Nio ro amadimo-owea-ri ata nakomu iedi ubauba ia nakomu ro nou ro Tarena Moto ama-owaititi-ri ubauba. Nio ro namadimo-owea-ri nedi ubauba nakomu ro simara moro ato otoi-ri pua modobo pua nedi moro ro nato kotoi. (Oro etu ro ioputi nedi owera ro modobo ie oro ro maumo mea se umoro koi.) Iedi tau ro nato beda urubia ro orowomidiro Iudia ato neio modobo ie korowodau podo duriomoro to.15Etu ra moto tamu ato nama-omidiro-ri nou modobo pua moto goro to karatea namabu ata omidai ri, modobo ie nou aise kodau.16Beda mere ra pari to nama-amedei-ri, modobo pua moto to korowameai obotama komidai aboto, modobo ie nou pari rudo aise kodau.17Iedi tau ro nato niro ra mutu mamio ibose bamuai mutu mamio neio beda ito amadimo-orowati-ri? Nirimagare babio tanaro patu iedi mamio ro neio sapuwo to imese koko ia se ama-iamo-ri.18Modobo pua nedi tanaro ro daroho tau ato kororosioidiro nou mabu ato modobo ie Godi kararatoro aboto.19Mabu iedi tau ro nato auna ia ubauba ro ama-ereredea-ri tanaro patu imese ubauba ro ama-irobai-ri, imese ubauba ia tau ro ama-owamo-ri temeteme mutu. Keba se Godi ro duriomoro beda tau ato gosioidiro womu tato abora idaibo tanaro ata osioidiro pua abora ia se ama-ororosioidiro-ri, ina idaibo sosoro tanaro ata ororosioidiro-ri pua ido.20Iedi ubauba tau ro nato Abera naramu ro saiki komukere ama-owai-ri, mabu nou simara urubia ama-imaragoidiro-ri. Godi ro saiki komukere kimowai tato rasiri ata dubu ata omidiro-ri pua, imese urubia pamo kawakawa ie.21Iedi tau ro nato nio ata dubu ro ama-imowapotai-ri ibo “Iesu nou e! Godi ro kohodowa dubu nou e!” Nio ata dubu ro ibose ama-imowapotai-ri ibo “Urubia dubu nou se ie, nou ubi tanaro disioidiro-mo!” Kaupoti iedi dubu ro nou owera imibiria ate22mabu karasaubuti urubia amadidimo-ou-ri neio ro awawo korosa tanaro amadimi-isioidiro-ri. Arua ro amadima-aro-ri ibo “Mo Godi kohodowa dubu nou se ie.” Ina arua ro ibo “Mo Godi ipusu owera kemoworohuti dubu e.” Kaupoti neio owera imibiria ate, karasaubuti owera namadima-aro-ri. Neio neido amadimi-isioidiro-ri nedi tanaro ro mabu neio ubi ie Godi edi urubia ro neio ro iwatateai ri mea gabo rido,23ina noudo ie nio modobo ie kiraroweauti. Mabu nio mo ro keba se ta-nimowautiti nedi tanaro ro nou sapuwo to ido amadimo-ororosioidiro-ri.24Iedi tau ro nato duriomoro gebari ro iedi iona kio ro nou temeteme ama-waubere-ri. Saiki pina nato ama-iasoperai-ri duwoduwo ro ama-ahidimai-ri, sogomi idaibo sosoro na-niauri-dumo beneniobenenio idaibo sosoro otoi-ri pua,25kiboni toboro rudo amadidima-araubuti-ri. Namabu patu toboro ato na-iamo amadimo-orowararioidiro-ri.26Tuturu to pua nio ro iato amadimo-owea-ri Imese Urubia Kiauri Dubu tema ohu rudo mea ia sosoro namadi-orowapotai-ri, nou auna ia pupuwo mutu amadi-ou-ri.27Sowake koroho urio nou ro ama-imerio-ri duriomoro gabogabo to, neio ro amadimi-idabuti-ri edi urubia gihodowa keba se kaupoti moro to.28Dewao ota ro io nimo umoro ti-niwaititi-dumo. Neio puara korobiritai ato nimo umoro koi ie ibo saiki ama-otobowa-ri. Ibose orio puara na-isuwoduti-dumo bunio, gope mutu nimo umoro koi ie ibo surama aupise ie.29Nio ro namadimi-iauri-ri ata ata tanaro namadimo-ororosioidiro-ri nio umoro nato ba-doi-mo Imese Urubia Kiauri Dubu nou korowameai musomuso se owamo pua.30Urubia abora na-orowomidiro nedi duriomoro nato, nedi tanaro ro neio abato amadimo-ororosioidiro-ri.31Nedi duriomoro gebari ro toboro, sopu imese sirio namabu patu neio imese amadima-araseperai-ri, kaupoti mo beda owera naro araraseperai-ri pua ata ro ibose to ama-owamotiti-ri.32Nodi saiki ro Godi kohodowa dubu namadi-emeiriai-ri neito urubia sirio umoro oi-ri pua, nou ia mere dubu, Godi sowake urio sirio neio ibose ata umoro tato ie, Abera nakara umoro ie mo korowameai tau.33Ina nio kiraroweauti modobo ie, umoro umoro se gi-orowomidiro-ro mabu nio umoro pua mo korowameai tau.
Iedi tau ro namadi-apimaidiro-ri nio umoro pua.34Nou idaibo mino ie ata dubu ata sabowa to na-wou, tuturu tau to nama-omidiro-ri iato ata dubu nou ro kohodowa ie nou moto emeauri na. Urubia nou ro kimasouti ie beda sosoro woko amadime-emesioidiro-ri. Ata dubu aboto kutura ie “mo edi na nou ba-demesioidiro-ro.” Ata aboto kutura ie “oro ro magere ba-demotoi, oro modobo ie aise kirarowo.”35Nio umoro pua moto abera korowameai etu umoro ra adimo ato, duwo turi ato, omona kakaba owera ato o kowaroho duwoduwo ato.36Nio norou kirobu moro ato kiatuamo modobo pua.37Nio mo ro ta-nimowauti keba se norou tato se kirarowo modobo ie.’