Read Ruka 16

Ruka16

Namabu kemeauri dubu kimaragoidiro mutu e

¹Iesu ro kowasoro urubia nedi totomu ro nou gimowauti, ‘Ata dubu besinisi mutu e. Taie nou edi namabu sirio ro ata dubu aboto nato giapoi emeauri ri. Taie iedi besinisi dubu ro ata tau ato urubia aboudo owera nato girorowai ibo, “Oro mani kemeauri dubu ro namabu ubauba mino to emeauri.”

²Taie nou besinisi dubu ro aise gorumai-ro ou ri nou aboto. “Mo ro oro sapuwo to owera ta-nirorowai. Oro ro etou tanaro gisioidiro? Abora oro ro peba titi dosioidiro nedi besinisi ro oro ro beda mino to gowaboi. Mabu oro mo ro woko rido anama-owagare-ri.”

³Taie edi kemeauri dubu ro nakara se iato gimaragoidiro, “Mo woko rido nama-owagare-ri ina mo ro beda woko nama-isioidiro-ri sabowa to nama-orowameai-ri? Mo aboudo modobo pua pari gowo bobo woko kimesioidiro, ibose namabu ri korowaro siripo ie amia urubia aboto.⁴Mo dese to umoro noti noi ibo mo ro beda tanaro nama-osioidiro-ri, ina noudo ie mo woko kaseperai ato, urubia ro mo anamadimo-owoiriamuti-ri.”

⁵Taie edi kemeauri dubu ro urubia nou ro iato girumai namabu doro to etio ro gimade-rimo besinisi dubu aboudo. Nou ro keba dubu iato gemodowa ibo, “Oro ro besinisi dubu aboudo doro to beda mutu namabu gimidai?”

⁶Nou ro ibo, “Mo ro 100 oribi isi doromu nou nimidai.”
Ina kemeauri dubu ro ibo, “Domi, doro peba ato disioidiro 50 oribi isi doromu.”

⁷Ibose ina kemeauri dubu ro ata dubu aboto iato gapimaidiro, “Oro ro beda mutu gimidai?”
Nou ro ibo, “Mo ro 100 parowa baiko nimidai.”
Ina kemeauri dubu ro ibo, “Domi, peba ato disioidiro 80 parowa baiko diatiti.”

⁸Besinisi dubu ro owera na-girorowai nou sapuwo to, nou ro iedi kerewai kerewai kemeauri dubu ro iato gemowabu edi tanaro ro na-gisioidiro. Mabu kemeauri dubu kimaragoidiro tututu mutu e.
Io, sopu duriomoro urubia auna umoro ie kimaragoidiro mutu tanaro kisioidiro aboto. Kaupoti etio ro orowotoi woroworo ato neio umoro auna se iamo pua idaibo tanaro nou kisioidiro aboto.

⁹Nio mo ro a-nimowapotai ibo, sabowa gabogabo urubia na-orowomidiro neio mutu aise gi-idabuti-ri, duriomoro namabu aise gi-iaiwo-ri namabu tato urubia aboto. Neio ido oro namuturubi to amadima-ararasoro-ri. Ina noudo ie oro Godi ro kamade mutu amadi-emaidodorai-ri womu tato womu tato keremiro aboto na-owamo-die Adiri sabowa ato.

¹⁰Ina etio ra kainakaina namabu mea se na-iauri-dumo ina ido auna sosoro namabu neio ro mea se amadimi-iauri-ri. Etio ra kainakaina namabu ubauba se na-iauri-dumo ina ibose auna sosoro namabu neio ro mea se iauri-ri pua.¹¹Oro ro sopu namabu nato mea se iauri tato, ina oro morobise keremiro namabu Godi ro etou sapuwo to ama-omia-ri kemauri aboto?¹²Ata dubu namabu oro ro emasogoro tato, ina oro simara sapuwo to namabu etio ro amadimo-omio-ri?

¹³Ata dubu ata ro modobo ia pua netewa teibo eputa dubu teibo ubi woko kimesioidiro-ma. Nou ro ata eputa dubu nirimagare kemati ie, ina ata eputa dubu aboto ubi tato koi ie. Ata eputa dubu owera se kirowidiro ie ina ata eputa dubu owera aise kemowabeouti ie. Nio ro modobo pua Godi ubi gabo ato koroho ina namabu ubi gabo ato koroho. Godi ra namabu ra nio ro eputa dubu teibo to iasoro-mari pua. Imese gabo tato ia ie.’

Iesu ro urubia arua owera gimowauti

¹⁴Iedi Parasi urubia ro na-gorowotoi Iesu ro beda tau ato gimowauti owera neio ro na-girorowai-rimo mani sapuwo to, nou neio ro sete to gedea-rimo mabu neio mani sogoi urubia ie.¹⁵Taie nou ro ibo Parasi urubia aboto, ‘Nio urubia sosoro gabo ato nakara se arasoro-dumo meamea urubia to. Kaupoti Godi umoro ie nio maumo beda sosoro iamo. Urubia ro meana to edi tanaro ro na-iasoro-dumo, isana iedi tanaro ro Godi ro ubauba ia to iasoro-die.

¹⁶Mose ro edi sabi giaiwai-ro ibose Godi ipusu owera urubia ro edi buka ro na-gisioidiro-rimo urubia neido gitamudiro-rimo womu tato Ioane neito ti-gorowapotai-ro. Ioane edi tau ato gou-ro womu tato abora Godi ro kiwaboi tanaro sapuwo to imowauti-dumo. Iedi tau ro nato urubia sirio pupuwo aise iasibowado-dumo Godi edi kiwaboi maumo ro neito odouti ri.¹⁷Kaupoti edi sabi sirio ro womu to ereredea-ri pua. Nedi duriomoro gebari ro, toboro mutu saiki ata womu to amadi-ereredea-ri. Kaupoti Mose edi sabi sirio ro nou aboudo ata kainai owera ata ararasoperai-ri pua.

¹⁸Beda dubu ro kararubia ra nu simara orobo, ina nou ro ata orobo nato na-edea, io nu Godi sosoro gabo ato piro tanaro kosioidiro ie. Ibose iedi kararubia orobo ro ata dubu ro nato na-edea, iedi dubu ro kedea ra Godi sosoro gabo ato nou ro piro tanaro kosioidiro ie.’

Suana sirio dubu Reseresi mutu nou totomu e

¹⁹Iesu ro ata totomu ibo gimowauti, ‘Ata dubu suana sirio dubu e, nu meamea obotama neito iremedutiti. Suana nou ro iosoratiti pua, modobomodobo ato iamotiti.²⁰Ina ibose edi duriomoro ro nato ata ikoniikoni dubu ta-gomidiro masiro Reseresi, nou suana tato dubu e. Sirio tau nou simara namuturubi ro aise oworohotiti-mo edi suana sirio dubu ro nou moto araradi to.²¹Reseresi auna ubi ro owamotiti suana sirio dubu edi ohona mapapati ro, okoko soro barugu ato na-iaremotiti nou kiho aboto. Isana nu ikoni soka ro owosometiti-mo sapuwo to nou kiho ie.

²²Imese sirio tau ibo irowatiti womu tato nou ti-garaburai. Nou urio Godi sowake urio ro aise gorobai-rimo taie imese gowou-rimo, Aberaham edi tumodi sapuwo ro nato gowomi-rimo. Ibose edi suana sirio dubu ro, tuturu to omidiro pua, nu saro rido iato aise garaburai. Nu pamo durupi bobo to na-gedea-rimo²³urio aise gemobodiai era duriomoro to, nu temeteme iamo iato emarotiti. Taie nu muso rido neido na-girarowea nou ro Aberaham se gowea Reseresi mutu mea se gomidiro-rido.

²⁴Suana sirio dubu ro ibo, “Abera Aberaham! Mo natonato demati-ro, Reseresi demowapotai, mo obo nupu neito memowarario-ro amatoko owododoria na ie, mo nato era korosa ro nowea temeteme iamo nemaro.”

²⁵Kaupoti nu Aberaham ro ibo gemowameai, “Mona ia nasa oro aboto, ma-dimaragoidiro nitiro keba se duriomoro ato na-imidirotiti-do meamea namabu oro ro ta-iaurititi, kaupoti Raserese ubauba to imdirotiti. Nu abora Reseresi tau e, nu kamade iworohuti. Ma-dowea oro abora temeteme iamo noti imaro.²⁶Ina oro ro a-iauri ra, turi bobo gebari towamo, ma-dowea auna bobo ie. Reseresi ro modobo pua ito kabu, ina oro ioudo kabu neitiro aboto bobo gebari ie ma-dowea-ro, gabo tato ie.”

²⁷Ina suana sirio dubu ro ibo, “Abera Aberaham, idaibo gutura-ro! Ina modobo ra Reseresi kemeiriai²⁸mo 5 niramio sabowa ato ta-nimeserai. Modobo ra nu ito kou neibi nou ro imowapotai-biri ibo modobo pua neibi ata neito kou mo beda temeteme moro ato nomidiro.”²⁹Kaupoti Aberaham ro ibo, “Nirimagare Mose edi sabi sirio ro na-gisioidiro iato tiamo ina Godi ipusu owera urubia ro edi owera ro na-gisioidiro-rimo neibi abato tiamo, modobo ie iedi owera ro neibi ro nou kibodoro.”

³⁰Suana sirio dubu ro ibo, “E e Abera Aberaham ata pamo dubu ata ro ama-ou-ri neibi nou ro ama-imowapotai-biri, taie nato aise amabime-erewesegerai-ri ubauba aboudo.”

³¹Kaupoti nu Aberaham ro ibo gemowameai, “Mose edi sabi sirio ro ibose Godi ipusu owera urubia ro edi owera ro na-gisioidiro-rimo neibi ro kirowidiro tato, ina pamo dubu neibi aboto kou sekere neibi modobo pua nou ro kiwesegerai-ibi.”’