Iona totomu4
Iona masawe ro gorobai
1Iona umoro na‑goi ibo Iawe ro Niniba sabowa gebari opisiamuti pua, nou auna ia serawo ro gorobai.2Taie nou ro ibo Iawe aboto, ‘Mo nou mabu ato nodau Tarasisi to. Mabu mo umoro ta‑noi oro ro nirimagare ama‑owawea‑ri neio aboto. Oro abato wisa tato nirimagare auna ia se owamotiti, ina oro serawo kodiobuti ie. Oro serawo samo to oi‑ri pua. Oro ro ubauba wisa kiwame aboudo nirimagare maumo ato oro karagareawado ie.3Iawe mo ba‑dopia‑ro, mo modobo pua komidiro!’4Taie, Iawe ro ibo gemowameai, ‘Oro etou serawo ri ra?’5Taie Iona sabowa aise gemeserai egea mere se giaubai saiki kidiawado sapuwo to, mapagea iato gitomai, taie iato imese gomi. Nou ibo geremasebidiro Niniba to beda tanaro ro ama‑ororosioidiro‑ri.6Nou mapagea ato na‑gomidiro kumabo nato gosuruwo‑ro, edi kumabo ro Iawe ro gowotobowa‑ro, Iona duwoduwo nari. Nou kamade ro gowati duwoduwo maumo ato na‑gomidiro.7Taie iato tuturu to pua benaka ro gosuruwo‑ro. Iedi benaka ro Iawe ro gowou‑ro, kumabo nou ro imese gotoro, kumabo iato aise garaburai.8Taie Iona iato na‑gomidiro, sie korosa Iawe nato gimeiriai‑ro, Iona korosa ro aise gemodomuti eputa ato, taie nou durupi pupuwo tato aise goi.Ina Iona ro ibo, ‘Mo modobo pua komidiro, mo modobo ie karaburai.’9Ina Godi ro ibo, ‘Oro aboudo modobo ra serawo koi kumabo sapuwo to?’
‘Io, modobo ie mo serawo ro kowaburai!’10Taie Iawe ro ibo, ‘Oro kamade ta‑woi kumabo sapuwo to. Nedi kumabo ro na‑osuruwo ina na‑waraburai, oro ro aro pua, kaupoti oro ubi nou aboto oi.11Niniba urubia mo ro na‑nisioidiro, mo ro nirimagare kowawea modobo ra neio aboto? Urubia nato sirio ia ie, 120,000 ota puara morobiriti‑mo, sirio kiwoubua namabu mutu. Nedi urubia ro neio umoro pua mea korowomidiro tanaro beda sosoro ra.’