Read Iemisi peba owera ie Iesu urubia aboto 3

Iemisi peba owera ie Iesu urubia aboto3

Kimibiria urubia nio matagoro kidiobuti modobo ie

¹Mo niramio, nio sirio se modobo pua Godi owera kitamudiro urubia to kararasoro. Mabu nio umoro ie Godi owera kitamudiro urubia saiki ata Godi ro koko tanaro to ama-imeiouti-ri, ibo pua nou ro arua kimibiria urubia sosoro kimeiouti.²Nimo imese urubia, gabo rido karagarewado ie. Ibose ata dubu ata owera karo maumo ato, nou ro ata ubauba owera karo tato, nedi dubu ro kororomai ie, meamea tanaro kisioidiro maumo ato nu momuo durupi mea mino to kowaboi ie.

³Ma-diauri-mo, urubia dubu ro hosi hodo to matagoro rido na-emebuai, hodo beda sapuwo rido kopodia ra edi hosi ro urubia dubu ubi moro to aise kou e.⁴Mea se kemabuti aboto, sawa pe gebarigebari ma-dimaragoidiro-mo. Neio sirio tau auna gawia ro iworohutiti-dumo, kaupoti neio kiauri urubia ro kemohorea aibi kainakaina neito imohoreautiti-dumo, kiauri urubia ro beda duriomoro ubi imamo-dumo, na-imohoreauti-dumo iedi sawa pe gebarigebari ro neio ubi moro to aise kitowerai ie.⁵Ina idaibo sosoro ie matagoro auna namabu pua urubia durupi ato na-iamo. Kaupoti matagoro rido awawo keremowabu owera tisuwodutiti-dumo.
Ina ma-dimaragoidiro-mo, auna tato era mio sugamuso ato na-weresimai, auna duriomoro kouho to emodobuti-ri pua imese kowaruruti ie.⁶Ina ata mino to kemabuti ato, matagoro era pina sosoro ie, era iato aise iriwaretiti. Imese ubauba owera sirio matagoro rido na-isuwoduti-dumo era paruo rido ie, ina nimo durupi ubauba neito nirimowaititi-dumo. Nimo mamio ro beda tau ato na-nirotuti-rimo, womu tato pamo namadimi-iauri-ri, nedi matagoro era ro nimo keremiro momuo se aise iouratiti.

⁷Ina kiauri ato beda mutu erere nakomu ra duriomoro ato na-oroho-dumo, erere pawa, niro to kororomudidiro nakomu, erere nakere obo ato na-oroho-dumo, neio urubia ro ta-iageawadotiti-mo ina abora ti-iageawado-dumo.⁸Kaupoti urubia dubu simara matagoro kageai modobo pua. Matagoro serawo se owamotiti, kageai tato tumu na sosoro ie. Nu ibose ie pamo bagawe sosoro ie.⁹Amia tau Abera Naramu Godi nimo Abera nedi atu matagoro ro neito nemowabutiti-dumo. Ina amia tau urubia Godi ro na-gisioidiro nou ia sosoro to, neio nimo ro ubauba niwaititi-dumo.¹⁰Nedi atu matagoro ro neido isuwodutiti-do Godi kemowabu ina ubauba owera iato kosuwoduti. Mo niramio, idaibo kimasaupiawado tanaro modobo ia pua kororosioidiro aboto!¹¹Karakara obo, topo obo mutu neitiro atu obo sosu rido kisuwoduti pua.¹²Mo niramio, woimu ota rido siporo kisuwoduti pua. Ibose kapoka ota rido woimu iopu kisuwoduti pua. Ina atu sosoro ie, topo obo damena obo sosu rido kisuwoduti pua.

Godi muro, duriomoro muro

¹³Nio abato ata dubu ata mea muro mutu komidiro ato, ibose mea kimaragoidiro mutu, nou ro modobo ie meamea tanaro durupi to kiwawuti, keremowabu tato, ina muro to kisioidiro ie.¹⁴Kaupoti nio etio abato iamo ubauba kimaragoidiro arua urubia sapuwo to, ina neio auna ubi ie auna to korowomidiro, idaibo tanaro sapuwo to keremowabu modobo ia pua.¹⁵Neio ro modobo pua Godi edi morobise ia owera ubauba kowaititi. Idaibo sosoro muro sopu duriomoro muro ie, Godi aboudo pua, bagea urio aboudo ie Satani nou se ie.¹⁶Ubauba kimaragoidiro, ina ubi auna to korowomidiro, nedi ubauba tanaro teibo ro urubia ro bato kisioidiro ra, urubia owera kirowidiro tato, ina erere ubauba tanaro sirio ibose iato tiamo aise kororosioidiro ie.

¹⁷Beda muro ra Godi aboudo na-wou-dioumo, nou timase. Etio abato na-iamo Godi edi muro ro nedi urubia ro ata mareamarea tato ia ie, urubia miro kiwaititi, urubia kiwoiriamuti, sirio tau arua urubia owera kimewidiro ie. Nedi urubia ro neio ro durupi to nirimagare tanaro auna se isioidirotiti-dumo. Muro tanaro kisioidiro ato idaibo ie, meamea tanaro neio aboudo aise kisuwoduti ie, meamea ota iopu ota rido beda sosoro kisuwoduti ra idaibo sosoro ie. Nedi urubia ro neio borubi mutu se idabuti-ri pua, sirio urubia atu modobo ato kiwarebidiro ie, ina neio kerematigi urubia pua.¹⁸Ibose serawo tau ato urubia miro etio ro iwaititi-dumo, neio ro idaibo meamea ohona iopu ibouti-dumo. Ido meamea tuputupu tanaro neio keremiro rido amadimi-isuwoduti-ri.