Karatamuai6
Urubia auna ia ubauba to irowomidirotiti
1Edi tau ro nato urubia dubu patu sirio aise goi-rimo duriomoro gabogabo ato. Meamea busere nou wirotuti-mo nedi urubia ro neio ro.2Awawo masiro urio neio ro busere meamea na-iaurititi-mo, neio ro aise iaremotiti-mo upi na ri.3Iawe ro ibo, ‘Mo kamade tato ie urubia aboto, mo edi keremiro ro neio mutu sirio tau to aise owamo-ri pua, ina noudo ie neio ro pamo samo to amadimi-iauri-ri. Neio 120 kisimisi irobo-ri pua.’4Taie, neio na-irowomidirotiti, iedi busere ro neio ro bamuai na-girotuti-rimo, awawo urubia gebarigebari to gararapoi-rimo, mabu neio abeamio awawo masiro urio ie. Taie, iedi tau ro nato edi dubu gebarigebari ro neio ro arua ubauba tanaro ta-wisioidirotiti-mo.5Iawe na-irarowotiti-ro urubia neio auna ia ubauba to irowomidirotiti, ina neio ubauba kimaragoidiro mutu irowomidirotiti. Neio edi tanaro ro nou ro na-giauri, imese auna ia ubauba ie.6Nou iato a-geremohoio urubia nou ro beda sosoro to gisioidiro, ina noudo ie nou ro ibo gutura, ‘Imese namabu sirio na-nisioidiro mo ro imese anama-ipisiamuti-ri, idaibo urubia, tumu namabu, koromudidiro namabu, ibose pawa ohu ato na-worowadaudiro.’Noa totomu e
8Ata dubu masiro Noa mea tuputupu dubu e Iawe sosoro gabo ato. Nou nakara se mea dubu e, nou Godi mutu idabutititi.Ina Noa ro girasomai-ibi netewa didi mere peteibi, neibi masiro Sem, Iapeti, Ham.11Godi sosoro gabo ato imese sirio urubia ubauba tanaro isioidirotiti-mo idaibo karado, karaberemo, urubia kiopiauti.12Ina Godi ro ta-giauri-ro iedi ubauba tanaro sirio ro nedi duriomoro ro nato.13Ina Godi ro Noa aboto nou ri gutura ibo, ‘Imese urubia na-orowomidiro nedi duriomoro ro nato, neio ro auna ia ubauba tanaro isioidirotiti-dumo, ibo pua mea mino to korowomidiro. Mo ro urubia imese anama-ipisiamuti-ri nedi duriomoro ro nato.14Noa, oro ro auna negere ota bokose pe ba-dididi meamea koko ota rido, oro simara keremiro sapuwo to. Ibi gugu sirio goro ato ba-diasiouti, ibose goro rido gomo rido bosou to ba-diadiriti.15Mo ubi ie edi ota bokose pe ro, oro ro idaibo sosoro auna negere kididi. Wamea rudo wapo to idaibo tuturu modobo ba-dodoburio 133 mita, ina boroboro sapuwo rido ata sapuwo to modobo ba-dodoburio 22 mita, ina sopu rido ohu to modobo ba-dodoburio 13 mita.16Iedi ota bokose pe ro ohu rido ba-datimai, ina katimai maumo ato sawa rido nupu rido pari sapusapuwo rido 44 sentamita pito ba-miaidiro. Sopu moto, turi moto, ohu moto ba-disioidiro. Ibose magere gomo ato ba-dosioidiro.17Mo ro auna ia abata obo anamadi-emeiriai-ri. Imese keremiro namabu patu amadimo-orowaburai-ri nedi duriomoro ro nato, kaupoti mo ro hodo anama-asaubiai-ri oro aboudo.18Oro mo ro imese nemowapotai oro mere peteibi, oro orobo, oro eteamio, nio ro amadimo-odoro-ri nedi ota bokose pe goro ro neito.19Oro ro ibose ama-iwodouti-ri orobo ra dubu ra imese beda mutu erere keremiro namabu ra, idaibo erere pawa, koromudidiro nakomu, neio keremiro sapuwo to.21Beda mutu erere ohona ra nibi ro kiho sapuwo to ba-diwoiriamuti-ro, ibose imese keremiro namabu neio ro kiho ohona ba-diwoiriamuti-ro.’22Godi ro beda owera garo-ro Noa aboto, nou ro iedi woko ro kisioidiro to aise gitamuai.