Read Karatamuai 46

Karatamuai46

Isiraere Keineni duriomoro a-gemeserai Isipi to gou-ro

¹Isiraere, nou ata masiro Iakobo, nou beda mutu namabu patu ra nou ro na-giwoiriamuti na-gimododiawado taie imese gaimai-ro Isipi to.
Taie nou Besiba ato aise gororodiobo, nadi iato aise gitomuti, sipisipi nou ro keribai iato gemopia, Iawe imese gemematowo.²Iedi duwo ro nato Godi ro ibo, ‘Iakobo! Iakobo!’
Ina Isiraere ro nato gemowameai, ‘Mo nou e, oro etou ri ra?’

³Taie Godi ro ibo, ‘Mo Godi ie, mo ata masiro Ere ie, oro abera ro na-nemowabutititi, mo nou e. Oro tere eremati ate Isipi duriomoro to nama-ou-ri mabu oro edi duriomoro ro neito nama-ou-ri oro aramio merebusere sirio mo ro anama-emowaititi-ri.⁴Oro nama-ou-ri Isipi to, mo mutu atu se namado-ou-ri. Oro iato nama-imidirotiti-ri oro anama-iaurititi-ri, ina ioudo anamadi-owameai-ri. Oro nama-araburai-ri Iosepa se ama-owaibia-ri, nou ibose to ama-omidiro-ri oro mutu.’

⁵Ata kowaroho Isiraere Besiba aise gemeserai nou imese gou Isipi to. Pero ro gabo ato koroho namabu sirio na-gimemeiriai-ro neio aboto Isiraere dubu mere sirio ro imese namabu neio ro neito ta-giaremuti-rimo, ibose neio upi merebusere idau Isiraere ia neito ta-gorowiti-rimo.⁶Neio beda mutu nakomu giworohuti-rimo kiwoubua namabu Keineni duriomoro ato na-giworohuti-rimo imese giwou-rimo Isipi to.⁷Isiraere idaibo sosoro gou Isipi duriomoro ito, nou merebusere aramio neio mutu atu se gou. Taie.

⁸Isiraere nou Isipi to na-gou simara aramio merebusere mutu nou neio masiro ie. Neio Mesopotamia duriomoro ato girotuti-rimo mamio ro.
Isiraere ro Ria mutu neitiro aramio merebusere imese 33, nou neio masiro ie. Isiraere Rubeni garasomai, nou keba mere ie. Ina Rubeni ro 4 dubu mere girasomai-bi, neibi masiro Hanoki, Paru, Hesoroni, Karami. Simioni ro dubu mere sirio girasomai, neio masiro Iemuere, Iamini, Ohada, Iakini, Sohara, Saura. Saura mamu Keineni duriomoro besere ie. Riwai ro dubu mere peteibi girasomai-ibi, neibi masiro Geresoni, Kohata, Merari. Iuda ro dubu mere girasomai-bi neibi masiro Eri, Onana, Sira, Peresi, Seraha. Kebase Eri ra Onana ra neitiro Keineni ato gorowaburai-rido. Ina Peresi ro girasomai-ma netewa teibo dubu mere teibo Hesoroni ra Hamuru ra. Isaka ro dubu mere girasomai, neibi masiro Tora, Pua, Iasubu, Simironi. Seburuni ro dubu mere peteibi girasomai-ibi neibi masiro Sereda, Erona, Iaharere. Iakobo ibose ta-garasomai besere Ria ato nou masiro Daina.

¹⁶Iakobo Siripa mutu neitiro aramio merebusere imese 16 nou neio masiro ie. (Siripa nou Rebeni sowake orobo ie, nou ro nou besere Ria nou aboto gaiwai sowake oroho na.) Gadi ro dubu mere girasomai neio masiro Seponi, Hagi, Suni, Eseboni, Eri, Arodi, Areri. Asere ro dubu mere girasomai-bi Imina, Isiwa, Isiwi, Beria. Neibi medera Serahi. Ina Beria netewa teibo dubu mere teibo girasomai-ma Hebere Marikiere mutu.

¹⁹Isiraere Rasere mutu neitiro aramio merebusere 14, nou neio masiro ie. Rasere ro netewa teibo dubu mere teibo giroto-ma Iosepa ra Beniamini ra. Iosepa ro netewa teibo dubu mere teibo girasomai-ma Manase ra Eparaimi ra, nou Isipi ato na-gomidiro. Asenati Potipera besere ie nedi dubu mere teibo ro nou ro giroto-ma. Oni sabowa ato tarena namabu kiamo moto ato Potipera iato isioidirotiti woko. Beniamini ro sirio dubu mere girasomai neio masiro, Bera, Bekere, Asabere, Gera, Namana, Ehi, Rosa, Mupima, Hupima, Arada.

²³Isiraere Biriha mutu neitiro aramio merebusere imese 7, nou neio masiro ie. (Biriha nou Rebeni sowake orobo ie, nou ro nou besere Rasere nou aboto gaiwai nou sowake oroho na.) Dani ro mere garasomai nou masiro Husima. Napatari ro dubu mere girasomai-bi Iahasiere, Guni, Iesere, Siremi.

²⁶Neio imese sirio se kidabuai ato Iakobo edi aramio merebusere ro Isipi ito na-gou-rimo imese 66. Iakobo eteamio neio mutu idabuai pua kioputi to.

²⁷Iosepa ro netewa teibo dubu mere teibo Isipi duriomoro ato ta-girasomai-ma. Neio imese sirio se kidabuai ato Iakobo ia mutu imese 70.

Iakobo a-gorowateai Isipi to

²⁸Isiraere ro Iuda gemeiriai keba se Goseni duriomoro to, Iosepa mutu ororowea rie. Goseni moro kainai Isipi duriomoro ato owamo. Isiraere nou aramio merebusere mutu neio na-gorowateai-rimo Goseni to,²⁹Iosepa isana nou gabo ato koroho nakomu nou ro ta-gemododiai nou iato gou nou abera owea-ri nedi moro ro nato. Taie nou abera na-gowea nou ro iato aise gohiai, auna ia idobi neito gorowati.

³⁰Isiraere ro iato gutura, ‘Oro sosoro woidomari mo ro abora se noti nemowea, taie iato mo ata kimaragoidiro tato se anama-araburai-ri. Mo ibose to nimaragoidirotiti oro ta-garaburai, mo abora umoro ta-noi mo ro simara idomari to ta-nowea oro tomidiro.’

³¹Iato Iosepa naramio aboto, ibose neio beda urubia mutu gou-rimo neio aboto, nou ro iato gutura, ‘Mo abora anama-ou-ri eputa dubu aboto, nou anama-emowapotai-ri ibo, “Neio ta-orowateai-rimo mo aboto, Keineni duriomoro ta-wemeserai-mo neio abora karaho ta-woi-rimo neito.³²Neio sipisipi kimowotoi urubia ie neio kaupoti woko nou isioidirotiti-dumo. Ina neio ro ta-iwou-rimo sirio sipisipi nanigosi burumakau imese beda mutu kiwoubua namabu patu ra.”³³Nou ro owera nama-emeiriai-ri nio ou-ri nou aboto, nio nou ro nama-iratodai-ri ibo, “Nio beda woko isioidirotiti-dumo?”,³⁴nio ro ba-demowameai-mo, “Oro sowake urubia nimo, sipisipi nanigosi burumakau nou kimowotoi woko nisioidirotiti-dumo, ina iedi atu woko ro nimo abeamio nasaio neio ro ta-wisioidirotiti-mo idaibo woko.” Nio ro idaibo sosoro owera namadima-aro-ri nio eputa dubu ro gabo ama-imagerai-ri, nio Goseni ato amadimo-omi-ri iato ama-irowomidirotiti-ri. Isipi urubia abato nio iato orowomidiro-ri pua, mabu neio ubi tato ia ie sipisipi burumakau kimowotoi urubia neio mutu atu moro ato korowomidiro.’