Karatamuai42

Iosepa hiwo owera morobise to gororosioidiro-rimo

1Iakobo umoro ta-goi ibo ohona tiamo Isipi duriomoro ato. Taie nou ro dubu mere sirio iato gimowapotai, ‘Nio etona mabu ato irowomidirotiti idaibo sosoro kabuamuti na-eremabotidirotiti-dumo?2Mo ro ta-nirorowai owera, urubia Isipi to oroho-dumo ohona imade ri. Nio ba-dou-mo Isipi duriomoro to ohona ioudo ba-dimade-rimo. Nimo idaibo sosoro komidiro modobo pua, nimo orowaburainiri-dumo.’
3Taie Iosepa odio 10 naramio ro neio imese gaimai-rimo ohona imade ri Isipi duriomoro rido,4kaupoti Iosepa saro rudo edi mere ro na-girarebidiro-ro Beniamini Iakobo ro emeiriai pua naramio mutu ou ri, mabu Iakobo ubi tato ie Beniamini ata nakomu ata ro kari ipi gabo ato.5Iakobo ata masiro Isiraere nou 10 dubu mere imese gimeriai amia urubia aboto garadabuai-rimo ohona imade ri Isipi duriomoro rido, mabu neio Keineni duriomoro ato sogoi se irowomidirotiti.
6Isipi duriomoro Iosepa ro iaurititi gabamani to nou ro imidirotiti, urubia ohona nou aboudo imadetiti-mo. Iato Iosepa naramio neio ro orowateai-diomo Isipi duriomoro to, iato Iosepa sosoro gabo ato neio aise giroborea-rimo.7Iosepa ro na-giwia edi urubia ro nou ro ta-gieibimai neio etio ra kaupoti nou neio ro eibimai pua. Nou daimodaimo dubu to garatigi. Taie nou ro masawe to iato gutura ibo, ‘Nio boido ra? Boido ou-diomo?’
Iosepa naramio ro iato gemowameai-rimo, ‘Nimo Keineni duriomoro rido nou-diomo ohona imade rie oro aboudo.’
9Iosepa ro na-giwia naramio na-giroboreauti-rimo nou aboto, nou hiwo teibo woki to iato gimowou-ma naramio ro giroboreauti-rimo. Taie Iosepa ro iato gutura ibo, ‘Nio duriomoro umoroumoro a-woititi-dumo ra?’
10Naramio ro iato gemowameai-rimo ibo, ‘E e, auna dubu, ibo pua, nimo puki urubia pua, nimo dorogora se urubia ie, nimo a-nou-diomo ohona imade ri.11Nimo neito na-nou-diomo kaupoti abera ro nirasomai, ibo pua nimo bagea owera karo oro aboto, morobise owera naro-dumo.’
12Taie Iosepa ro iato gutura nou naramio aboto, ‘E e, nio idomari nou ri owou-dioumo nedi duriomoro ro arahidimai-ri.’
13Naramio ro iato gemowameai-rimo, ‘Nimo 12 ie keba se, abora nimo 10 ie, kaupoti abera ro nirasomai. Nimo Keineni duriomoro ato nirowomidiro, ina neama kainai ta-nemeserai-mo idau mutu iato tomidiro-do, ibose nimo ata neama ta-garaburai.’
14Iosepa ro ibo, ‘Nio mo ro ta-nimowapotai keba se nio morobise puki urubia ie.15Nio anama-iwaibia-ri Pero idaibo tau ato na-omidiro nio ro nedi duriomoro ro sobosobo to emeserai-ri pua womu tato nio neama kaina neito namadi-ou-ri mo aboto.16Nio ata ba-mou neama orobai ri ba-mowou-ro neito mo aboto. Amia urubia nio dibura to anama-iedea-ri. Nou kowou ato nio neama kaina mo ro nama-imowea-ri mo umoro nato nama-ai-ri ibo nio morobise owera aro-dioumo. Ina nou kowou tato mo aboto, Pero idaibo tau ato na-omidiro mo umoro anama-ai-ri ibo nio puki urubia ie.’
17Iato Iosepa ro neio dibura to aise giedea, netewa didi saiki to gorowomidiro.
18Netewa didi saiki peteibi na-goroporeai-birimo Iosepa ro a-gutura ibo naramio ato, ‘Mo ro Godi auna se nemaragoidirotiti. Nio morobise urubia ato nio ata dibura to amadi-eremeserai-ri, amia urubia ro amadimo-osuruwo-ri ohona neio ro amadimi-iwou-ri upi merebusere aboto. Iato nio namadimo-orowateai-ri neama kainai ba-dowou-rimo neito mo aboto. Nio ro neama kaina namadidimo-owou-ri mo umoro anama-ai-ri ibo nio morobise owera garo-rimo mo aboto. Nodi tanaro ro namadimo-osioidiro-ri nio orowaburai-ri pua.’
Iosepa naramio ubi aise goi-rimo idaibo tanaro nou kosioidiro aboto.
21Taie neio iato geremowauti-rimo nakara se, ‘Nimo ro keba se beda ubauba tanaro nosioidiro-rimo neama aboto nimo mibo ro nou sapuwo to nirobai. Nou ro egea se garo ibo “Mo opia ate! Mo aise dowarebai-rimo!” Nimo ubi tato noi-rimo nou kowarebai aboto. Abora nou e wisa torowameai-die nimo aboto.’
22Iato Rubeni ro a-gutura ibo, ‘Nio mo ro ta-nimowapotai modobo pua nedi mere ro nio ro ubauba kowai aboto, ina mo owera nio ro ageseai-rimo nou kowarebai aboto. Edi ubauba tanaro ro na-nosioidiro-rimo nou aboto abora nou e umoro noti noi-dumo wisa ro orowameai-die nimo aboto.’
23Taie Iosepa naramio aboto owera na-garo ibo pua nou ro simara owera to karo. Nou ro owera kiwesegere dubu turi ato ta-gowotobowa, Iosepa owera nou ro gemowesegere. Neio ata umoro iamo pua ibo nou Iosepa ie kaupoti neio edi owera to garo-rimo Iosepa ro ta-gimewidiro.24Nou aise garatea ata ibi gugu to naramio idobi iato gimerete.
Taie tuturu to pua nou na-gosuwoidiro-ro owera aro ri naramio aboto iato Simioni se gorobai hodo to iato gemotohiti tu ato, sairo ato naramio ro ibo ti-giauri-rimo.
25Iosepa ro sowake urubia iato gimowapotai ibo, ‘Edi urubia ro ohona baiko to ba-dimaratuti-mo, ina neio ro beda mani to imade-dumo ohona ba-dimowame-mo mani pauso baiko goro to ba-dimibiti-mo, ina modobo ie neio ipi gabo ato ihona ba-dimio-mo.’ Iosepa owera gabo modobo, sowake urubia ro ibose gisioidiro-rimo. (Iosepa naramio umoro oi pua nou ro beda owera to garo nou sowake urubia aboto.)26Iosepa naramio neio ohona baiko doniki ohu ato na-giaremuti-rimo, taie imese gorowameai-rimo duriomoro to.
27Neio ipi ato duwo ro na-gimatimuti iato aise gutua-rimo. Iosepa ata naramu nou ohona baiko iato gemapimai, nou doniki ohona emeihai rie. Baiko nou ro na-gemapimai nou ro mani se giwia baiko goro ato,28nou ro iato gimowapotai borubi, ‘Mo ro edi mani ro na-niaiwai nedi ohona ro nou sapuwo to noti tiamo mo baiko goro ato, etu ro hato nemowameai-die?’
Iato neio auna ia tere ro girobai, aborabora se giraroweauti-rimo, neio owera iato geremowauti-rimo beda sosoro tanaro ro gororosioidiro-rimo. Neio ro ibo, ‘Etou tanaro isioidiro-die Godi ro nimo aboto? Nou abora tanaro ie!’

Iosepa naramio Keineni duriomoro to gorowameai-rimo

29Iosepa naramio imese gorowameai-rimo neio abera aboto Keineni duriomoro to. Neio ro beda tanaro giauri-rimo iato na-gororosioidiro-rimo, Iakobo aboto iato gorowauti-rimo. Neio ro ibo,30‘Isipi duriomoro edi dubu ro na-iaurititi nou ro owera masawe to garo-ro nimo aboto, ata sosoro girarowo-ro. Nou ro ibose ta-gutura-ro, “Nio puki ou-diomo neito nedi duriomoro nou owaseidiro rie.”31Nimo ro ibose tanaro mo nou aboto, “Nimo puki urubia pua, morobise urubia ie.32Nimo naminiramio ie kaupoti abera ro nirasomai. Keba se nimo 12 ie ina abora nimo 10 ie, ata keba se garaseperai. Nimo neama kainai ta-nemeserai-mo abera mutu tomidiro-do Keineni duriomoro ato.”
33Taie ina iedi duriomoro kiauri dubu ro nou ro gutura nimo aboto ibo, “Mo abato nio ata ba-momidiro-ro mo umoro nato nama-ai-ri nio morobise urubia ie. Nio arua ba-dorowameai-mo ohona ba-diwameai-mo upi merebusere sogoi ro iwatiwiri.34Nio namadimo-orowateai-ri simara duriomoro to nio neama kainai ba-dowou-rimo mo aboto. Iato mo umoro nato nama-ai-ri nio puki urubia pua, morobise urubia ie. Ina nio naramu neama mo ro nato nama-imowameai-ri iato nio dorogora se amadimo-oroho-ri ata ubauba kimaragoidiro tato, namabu mani to nato ba-dimade-mo.”’
35Taie Iosepa naramio ohona baiko iato gimagagawado-rimo neio ro simara mani se giauri-rimo na-giamo simara baiko goro ato. Neio abera mutu mani na-giauri-rimo ohona ohu ato na-giamo, neio auna ia tere ro girobai.
36Taie Iakobo ro iato gutura, ‘Mo mere teibo nio ro ta-giwagare-marimo Iosepa ra Simioni ra potoro ie, ina Beniamini emediawado-dumo owagare ri. Mo sapuwo rido imese tanaro patu ubauba ia se ororosioidiro-dumo.’
37Rubeni ro iato gutura Iakobo aboto, ‘Beniamini mo aboto ba-dapoi-ro garegare tato se. Mo ro anama-owou-ri Isipi gabamani dubu aboto nou ro ama-owea-ri tauo. Mo ro mea se anama-iauri-ri ina anamadi-emowameai-ri. Beniamini mo ro kowameai tato mo mere teibo oro ro nato ba-diopia-ma nou sapuwo to.’
38Ina Iakobo ro ibo, ‘Mo mere Beniamini oro ro owou-ri pua Isipi duriomoro to. Nou naramu ta-garaburai, Rasere mere kaupoti nou se ie. Mo auna ia tere ie nou ipi gabo ato ata tanaro ro kowea. Mo idaibo omidiro-ri pua ibose nedi mibo ro mo nou ro nama-opia-ri.’