Karatamuai26
Aisaki karasaubuti owera karo
1Aisaki na-wimidirotiti ohona tato tau nato gereredea, keba se Aberaham mutu tau ato idaibo sosoro tanaro ta-gowamo ohona tato. Ina edio tau ro nato Aisaki iedi duriomoro ato na-gomidiro ohona tato ie nou ri gemeserai, nou imese gou ata auna sabowa to, masiro Gera, Pirisitia urubia eputa dubu nou masiro Abimereki iato gomidiro, nou aboto gou.2Taie edi tau ro nato Iawe nato gorowapotai Aisaki aboto taie nou ro iato gemowapotai ata owera nou ro a-gutura ibo, ‘Oro ito ou ate Isipi to, oro duriomoro anama-emapoi-ri mo ro ido nato ba-domidiro,3abora domidiro egea mere se nedi duriomoro nato. Mo oro mutu anamado-omidiro-ri, nato oro mo ro korosa anama-omio-ri. Oro ia aramio merebusere mutu anama-omio-ri nedi duriomoro sirio ro mo edi hodo ro na-nemasaubiai oro abera Aberaham aboudo mo ro asiai-ri pua.4Oro aramio merebusere sirio se anama-omio-ri, urubia ro modobo pua kioputi aboto idaibo kiboni sirio na-orowotoi toboro ato. Neio ro ama-irowomidirotiti-ri nedi duriomoro sirio ro na-iamo sapuwosapuwo. Mo ro korosa anama-imia-ri oro aramio merebusere aboto, odio korosa ro ioudo amadimo-orobodorai-ri imese sirio urubia aboto.5Imese sirio tanaro patu mo ro anama-isioidiro-ri mabu oro odi abera ro mo beda owera karo ra nou ro aise kisioidiro ie. Oro abera dubu nou ro mo edi sabi patu ro mea mino to ta-ibodorotiti, ibose mo edi kitamudiro tanaro patu ro nou ro ta-ibodorotiti mea mino to.’6Taie, Aisaki iato aise wimidiro Gera sabowa ato.7Rebeka imese sagaru ia ie. Gera domere ro nou ri gemodoruti-rimo neio ro ibo Aisaki ato, ‘Iedi orobo ro oro orobo ra?’Ina Aisaki ro iato gimowameai neio ibo, ‘Nou mo medera ie.’ Nou tere ro gorobai iedi tau ro nato nou ro morobise owera aro pua mabu nou a-gimaragoidiro ibo, ‘Mo neio ro kopia ie ina orobo kowasiri rie.’8Aisaki iato wimidirotiti ina ata tau ato Pirisitia urubia eputa dubu nou masiro Abimereki na-girarowea moto goro rudo nou ro nato gowea Aisaki Rebeka ta-gatopea-ro.9Taie Abimereki urubia kimowapotai Aisaki emou ri, taie neio ro nou iato gowou-rimo Abimereki aboto. Aisaki na-gou-ro nou ro ibo, ‘Io oro orobo ie, ina nimo oro ro etou ri nisaubuti ibo oro medera ie?’
Aisaki ro ibo, ‘Mabu mo nio ro kopia ie ina mo Rebeka nio ro kowasiri ie.’10Taie Abimereki ro ibo, ‘Oro ro ata tanaro gosioidiro-die nimo aboto auna ia karasaubuti gowapotai-die. Ata sabowa dubu nou mutu kirobu-ma rasiri ie, nimo auna ubauba ro a-niwia-ro.’11Iato Abimereki ro urubia umoro owera iato gimia ibo, ‘Mo ro sabi nedea. Nodio orobo ra dubu ra ro modobo pua ata ro kiwasomai-ma. Etu ro iwasomai-ma neitiro, ibose mo ro wisa iedi dubu ro nou aboto anama-iwai-ri pamo!’12Iedi duriomoro nato Aisaki aise gomidiro ina nou ro pari iato gosioidiro, nedi pari ro nato nou ro sirio pari namabu gibouti. Taie neio awawo na-goi-rimo nou ro iato giasio-ro sirio ia se imese gidabuti. Iedi korosa ro pari namabu sirio sapuwo to Iawe aboudo ie.13Nou imese sirio namabu patu nou abato ta-giamo. Nou namabu sirio dubu to gararapoi nou ro imese sirio namabu patu na-gidabuti taie nou masiro auna neito aise gowai.14Taie nou abato irohotiti-dumo sirio kiaubo urubia nou woko neio ro emowatiti-mo ibose nou sipisipi sirio burumakau sirio nanigosi sirio se goroho-rimo nou abato.
Taie ata tau Pirisitia urubia ro masawe gowea-rimo Aisaki, mabu nou namabu sirio dubu e.15Aisaki amia obo bobo mutu, edi obo bobo ro nou abera Aberaham edi sowake urubia ro neio ro gemobuti-rimo. Obo bobo Pirisitia urubia ro serawo ri komapi to, womu tato imese ti-girotomuti-rimo.16Taie Abimereki ro ibo Aisaki ato, ‘Oro abora nimo aboudo daragare! Nimo oro ro nitarumowado.’17Taie Aisaki ro na-girorowai edi owera ro nou aise gemeserai edio duriomoro ro. Neido na-gou, ipi ato Gera podo gawagogo ato nou parai moto iato gitomuti, ipikere iato gomidiro.18Keba tau ato Aberaham iedi tau ato na-gomidiro, nou ro sirio obo bobo ta-giobuti ina nou iato na-garaburai obo bobo na-gimeserai-ro, Pirisitia urubia ro aise giatumuti-rimo. Iedi tau ro nato Aisaki iato wimidirotiti iedi duriomoro ro ina iato edio obo bobo sirio ro nou sowake urubia ro ina iato giobuti-rimo mea mino to na-gisioidiro-rimo taie Aberaham ro beda masiro to giasoro Aisaki ro ina neito geremari atu masiro to.19Ata obo bobo Aisaki sowake urubia ro na-goboba-rimo podo gawagogo ato iedi moro ro nato mea obo sosu nou ro gosuruo-ro.20Taie iedi tau ro nato Aisaki edi sowake urubia ro neio nato geremaro-rimo Gera sabowa sipisipi kimowotoi urubia mutu. Gera urubia ro ibo, ‘Nodio obo bobo ro nimo obo bobo ie, nio obo neido giaputi-mo!’ ina nou do ie Aisaki edio obo bobo ro nou ro masiro a-giduti ‘Keremaro’.21Neio iato ata obo bobo goboba-rimo ina atu sosoro urubia aise gou-rimo serawo mutu neio owera to iato gorowati-rimo, Aisaki ro a-giduti iedi obo bobo ro ‘Owera to korowati’.22Taie Aisaki ro iedi duriomoro aise gemeserai nou sowake urubia mutu, imese gou-rimo ata moro to, ata obo bobo ina iato goboba-rimo. Iedi tau ro nato nou ata ubauba owea pua urubia aboudo iedi obo bobo nou ro masiro a-giduti ‘Moro Bobo Modobo ie’. Aisaki ro ibo, ‘Iawe Godi ro mo moro bobo modobo ato ta-nomia-ro. Abora nedi sopu ro nato mo modobo ato nama-omidiro-ri.’23Taie iedi duriomoro na-gemeserai Besiba to imese gou.24Ata duwo Iawe nato gorowawea nou aboto ibo, ‘Mo nou e Godi, oro abera Aberaham nou ro nemowabutiti, mo ubi tanaro nou ro ta-wisioidirotiti. Oro tere na ie! Oro korosa anama-owai-ri, ina aramio merebusere sirio se anama-omio-ri. Mo ro nou ri nama-isioidiro-ri mabu Aberaham mo sowake dubu to ta-garasoro.’25Taie iodi tau ro nato Aisaki nadi iato gitomuti era kaduruti maumo ato taie, Iawe iato gemowabu. Iedi duriomoro nato nou parai moto kitomuti, nato imese gomidiro. Ina sowake urubia ro obo bobo ata iato goboba-rimo.26Abimereki Gera eputa dubu imese gou-ro Aisaki aboto. Iedi tau ro nato Aisaki a-gomidiro Besiba moro ato. Abimereki ro ta-gadabuai-ro nou owera mea se kemesioidiro dubu masiro Ahusata, ibose ta-gadabuai-ro nou boso eputa dubu masiro Pikoro, taie neibi imese gou-birimo Aisaki aboto.27Aisaki ro na-giwiai-ibi neibi nou ro iato gimodowa-ibi, ‘Nibi etou mabu ato ou-diebimo mo aboto? Nibi keba ubauba ta-gosioidiro-birimo mo aboto. Mo nibi ro Gera duriomoro rudo ta-nowagare-birimo.’28Ina neibi ro iato gemowameai-birimo nou, ‘Neibi umoro ta-noi-birimo ibo Iawe oro mutu e. Neibi ro keba se ata ubauba osioidiro pua oro aboto. Oro nimo ro ubauba se emeiriai pua ioudo mea mino to nemeiriai-rumo Gera duriomoro rudo. Abora neibi a-neremowotouti-birimo oro aboudo nimo ro ubauba tanaro osioidiro-ri pua oro aboto, ina ibose oro ba-deremowotouti nimo aboudo ubauba tanaro oro ro osioidiro ate nimo aboto. Oro Iawe ro korosa ta-giaiwo.’30Taie Aisaki ro auna ohona iato gimitai-ibi, neio atu se Aisaki mutu komititi imese giho-rimo.31Ata kowaroho ato neio ina iato geremowotouti-rimo. Aisaki ro iato giwaboi-ibi ipi ato gimeserai-ibi, taie nou imese gorowameai-ro.32Iedi atu saiki ro nato Aisaki iedi sowake dubu ro nou ro gou-ro, nou ro ibo, ‘Obo bobo nimo ro ta-nemoba-mo tomidiro-die mea obo sosu ro osuruwo-die.’33Taie Aisaki iedi owera ro na-girowai nou ro iedi obo bobo ro masiro aise gomia ‘Siba’ to, Hiburu owera to ibo owamo ‘Geremowotouti’ nou ri sabowa nato na-omidiro masiro tararasoro ‘Besiba’.34Iso nou 40 kisimisi na-gorobai nou ro Hiti urubia besere teibo giedea-ma. Keba orobo masiro Iuditi Beri, ina saro orobo Basemati Eroni.35Neitiro ro imese tanaro na-isioidirotiti-do Rebeka ra Aisaki ra neitiro auna masawe ro iwatiti-ma, kamade tato daro giropu mibo mutu wimidiro-do.