1Sera nou nato garaburai Heboroni sabowa ato Keineni duriomoro ato owamo. Nou 127 kisimisi to wimidirotiti.2Aberaham ro Sera pamo karaburai na-gowea, nou auna idobi nou giroto.3Idobi na-gemerete taie nou ro pamo aise gemeserai, nou imese gou Hiti urubia aboto, mabu neio duriomoro abeamio ie. Nou ro ibo,4‘Mo apira dubu ro nomidiro nio mutu, mo demapoi-rimo goto kere mo ro anama-omidai-ri mani to, mo orobo bobo emoba moro ie.’5Neio ro ibo,6‘Oro auna dubu e, modobo ie nimo ubi ie oro ro nato kemoba oro orobo. Abora nimo oro nasoro-dumo keba dubu to, nimo oro ro niauri ina nimo kamade ie oro orobo nato kemoba. Nimo ata ro orowairiai-ri pua, oro mea ia goto kere ama-omidai-ri oro orobo edea moro.’7Taie Aberaham iato aise giroborea neio sosoro gabo ato, nou ro ibo gowawea, ‘Neibi awawo ie, nou kaina ie.’ Nou ina mea se na-gotobowa8taie owera nato garo, ‘Nio ubi ie mo orobo nato kemoba aboto tauo Soha edio mere ro Eporoni nou mutu keremowauti9modobo ie nou ro amadi-apoi-ri bobo na-waidiro nou edi pari goto ato owamo. Mo modobo ie nou ro nou kemapoi nou mea wisa to anama-owomidai-ri. Mo idaibo tanaro anama-osioidiro-ri nio sosoro gabo ato.’10Eporoni nou Hiti urubia aboto ta-garadabuai neio mutu gomidiro nato geremowauti-rimo goto kere sapuwo to.11Nou ro ibo Aberaham ato, ‘Marasio mani to kowomidai oro ro. Oro auna dubu e. Mo ro anama-emapoi-ri goto kere momuo se bobo mutu. Urubia ro ta-wirorowai-mo oro moro nou nemapoi nato ba-demoba oro orobo.’12Taie ina Aberaham neio aboto aise giroborea. Nou ina mea se na-gotobowa13nou ro ibo Eporoni aboto, ‘Mo ubi ie oro goto kere bobo mutu wisa momuo se komia, aise ba-domidai, ina mo pamo urubia iato nama-iaremo-ri.’14Eporoni ro iato gemowameai nou ibo15‘Goto wisa ibo ie 400 siriba mani nouto se dowomidai-ro. Auna sunamabu pua, mo oro mutu eremowauti-ri pua. Iedi sopu ro oro ro ba-darahidimai, oro orobo iato ba-dibiria.’16Taie Aberaham ubi aise goi nedi owera ro na-garo-ro. Nou siriba mani na-gioputi meana se, taie Eporoni nato gomia 400 siriba mani Aberaham ro, Hiti urubia sosoro gabo ato.17Eporoni edi pari ro na-gowamo Makapera ato Mamere gomo ato,18Aberaham ro gomidai, goto kere, bobo na-gaidiro, ota sirio na-gorowotoi imese nou ro aise girahidimai. Hiti urubia soirio beda moro ato garadabuti-rimo, neio ro ta-girowai-rimo beda goto gomidai Eporoni aboudo Aberaham ro.19Taie Sera iato Makapera bobo goro to nato gibiria, Mamere sabowa gomo ato. Mamere sabowa Keineni duriomoro ato owamo, ata masiro Heboroni.20Aberaham ro ta-gomidai edio goto kere ro nou pamo urubia ito ibiti moro ie. Taie.
expand_more
The books couldn't be loaded. Check your connection and try again.