Read Karatamuai 13

Karatamuai13

Abaram ra Roti ra a-gorohodowa-rido

¹Ina Abaram Isipi duriomoro na-gemeserai nou orobo, Roti nou aramu, neibi namabu sirio aise giwou-birimo idaibo sipisipi, burumakau, nanigosi, siriba mani, gorodi mani, neibi imese gou-birimo Negebi duriomoro to.³Ina Negebi rido nou duriomoro gabogabo goroho, nato gou-ro Ai ra Betere ra turituri, parai moto keba se iato ta-gididi,⁴ina imese gou Iawe emowabu ri beda nadi gitomuti keba se, nou ro Iawe iato gemowabu.

⁵Nedi tau ro nato Roti Abaram mutu goroho, ina Roti nou simara orobo, merebusere, woko urubia, ina kiwoubua namabu sirio mutu e.⁶Neitiro na-gomidiro-rido kaupoti moro ato, sugamoso modobo pua mabu neitiro burumakau, nanigosi, sipisipi imese sirio ia ie.⁷Ina iato Abaram kiwoubua namabu kimowotoi urubia, Roti kiwoubua namabu kimowotoi urubia, neio iato geremaro-rimo. (Iedi duriomoro ro nato Keineni urubia Perese urubia ibose ti-gorowomidiro.)

⁸Ina noudo ie Abaram ro kemowapotai Roti ibo, ‘Neitiro kaupoti gu dubu teibo ie. Modobo pua neitiro kiwoubua namabu kimowotoi urubia keremaruti.⁹Neitiro anamado-orohodowa-ri, oro saiki kidiawado moro to nama-ou-ri mo isana saiki korioduti moro to anama-ou-ri. Oro pere sapuwo to nama-ou-ri, mo isana tumodi sapuwo to anama-ou-ri.’

¹⁰Roti na-giraroweauti nou ro nato gowea Iodeni gawagogo ato obo na-gohau-ro womu tato Soa sabowa. Iedi duriomoro ro nato Ideni pari mea sosoro ie. Meamea goto oromo bara ato Isipi duriomoro ato atu sosoro ie. Nedi tau ro nato Iawe ro wisa ubauba to owameai pua Sodom ra Gomoro ra to, nedi sabowa teibo ro nou ro saro rido gipisiamuti-ma.¹¹Roti ubi ta-goi nakara se komidiro aboto iedi duriomoro ro nato. Neitiro idaibo sosoro gorohodowa-rido.¹²Abaram imese gomidiro Keineni duriomoro ato, isana Roti auna sabowa teibo turituri ato gomidiro, Sodom gomo ato.¹³Urubia iedi sabowa ro nato na-gorowomidiro, neio imese auna ia ubauba tanaro isioidirotiti-mo Iawe sosoro gabo ato.

¹⁴Roti ro Abaram na-gemeserai, Iawe ro Abaram nato gemowapotai ibo, ‘Ma-diraroweauti sapusapuwo, saiki boido idiawado-die, saiki boito orioduti, gawia boido ihuduti-die, surama boido ihuditi-die.¹⁵Imese oro duriomoro ie, oro nasaio mutu mo ro nou nemapoi.¹⁶Ina nasaio ro iato auna sipu amadimi-irasomo-ri, momoso kainakaina beda sosoro ra na-iamo goto ato. Urubia ro kiasoro modobo pua. Neio iato ba-mirohotiti-mo imese sirio tau.¹⁷Ba-derebua! Kiraroweauti kiraroweauti ba-doroho, nedi duriomoro ro oro mo ro nou nemapoi.’

¹⁸Abaram nou ri goroho, nou ro iato giwia awawo ota na-gorowotoi Mamere goto ato, auna sabowa Heboroni ato. Ina nou ro parai moto ito aise gowosiomai. Taie, iato Abaram ro nadi ina aise gitomuti Iawe emowabu ri.