Read Pauro peba owera ie Iesu urubia aboto Gereisia duriomoro ato na-irowomidirotiti 4

Pauro peba owera ie Iesu urubia aboto Gereisia duriomoro ato na-irowomidirotiti4

¹Mo kemabuti owera ibo ie, ata mere ubi na-owamo abera karaburai ato nou edi namabu ro kirahidimai aboto, nou kainai ato modobo pua iedi namabu sirio ro nou ro kirahidimai. Namabu ia nou do ie, kaupoti nou kainai ie,²nou ro modobo ie kiauri dubu owera se kirowidiro, womu tato nou abera ro beda tau gemedea nou korobai.³Ina idaibo sosoro ie, nimo keba se merebusere kainakaina sosoro nirowomidirotiti, mabu nimo sopu duriomoro sabi ro ta-nimotohiti-rimo orora aboudo na-gou-rimo.

⁴Kaupoti ata mea tau Abera Godi ro ta-gohodowa, ina iedi tau ro na-gorowateai-ro nou simara mere nato gemeiriai-ro nedi duriomoro gebari ro neito, paea orobo ro nato goroto. Nou urubia dubu to gararapoi ina Mose edi sabi patu ro nou maumo ato ta-imidirotiti.⁵Ina Godi ro nedi tanaro ro nou mabu ato gisioidiro etio ro orowomidiro sabi patu maumo ato nou ro imese ioudo iapopo rie, ina nou morobise merebusere to kararapoi aboto.⁶Abora nio Godi merebusere ie. Ina Godi ro nou mabu ato gemeiriai-ro nou Mere edi Tarena Urio ro nio niro turi to, ina ioudo nou ro iarotiti-die idau, idau owera.⁷Ina abora nio sopu duriomoro sabi ro imotohiti pua. Nio abora Godi edi merebusere ro neito ararasoro-dumo, ina nou rie iedi meana ro na-iamo-die Godi abato nio nou ro saiki ata ama-imio-ri.

Pauro auna se imaragoidirotiti Gereisia urubia aboto

⁸Nio keba se Godi umoro tato na-irowomidirotiti nio bagea orora ubi maumo ato irowomidirotiti. Nedi orora ro neio Godi sosoro pua.⁹Nedi tau ro nato morobise Godi nio umoro ie, ibose Godi umoro tiamotiti-die nio aboto. Ina mabu boira nio huru to na-orowame-dumo sopu duriomoro sabi kibodoro aboto orora aboudo iedi na gimade-rimo? Iedi duriomoro sabi ro pupuwo tato ie, nio modobo pua neio ro kiwarebai. Nio ubi ra ina korowameai nedi sabi sirio ro neio ro kimotohiti aboto, a?¹⁰Nio ro ibose tibodoro-dumo soriomu kainakaina kisioidiro, awawo soriomu kisioidiro, erere tau ato tisioidirotiti-dumo.¹¹Mo kimaragoidiro siriosirio niauri nio sapuwo to mabu nedi tanaro ro nio ro auna ia se irobidiro-dumo. Etu umoro ra mo a-norowagumaidiro iedi woko mea ro na-natamuai nio abato, nio ro ta-gebedidiro-dumo, dorogora se owamo.

¹²Kimibiria niramio, mo ito na-nou nio aboto mo nio mutu atu sosoro nimidiro, mabu nimo atu se Mose sabi patu maumo ato orowomidiro pua. Ina nio mo ro nou ri nimagege iedi sabi patu ro imeserai ri, mo ro beda sosoro nimeserai. Nio keba se meamea tanaro ta-gisioidiro-rimo mo aboto.¹³Mo omona tau ato na-nou nio aboto, nio umoro ie keba se mo ata duriomoro ato temeteme ro norobai-rimo, ina nou mabu ato nidiai nio aboto temeteme mutu, mea owera imowauti ri Iesu sapuwo to.¹⁴Mo edi temeteme ro nowati-rimo nio mibo nou ro gimia, ina mo iato na-nomidiro mo nio ro mea mino to noworohuti-rimo. Mo nio ro emowabe pua ibose ebeiouti pua. Sowake urio Godi aboudo kou rasiri ie nio duriomoro to, nio ro mea mino to ba-goworohuti-rimo, ina mo idaibo sosoro mino to ta-noworohuti-rimo. Ibose Iesu Keriso nou simara durupi to kou rasiri ie nio duriomoro to, nio ro mea mino to ba-goworohuti-rimo, ina mo idaibo sosoro mino to ta-noworohuti-rimo.¹⁵Iedi tau ro nato nio auna kamade giworohuti-rimo. Abora, boira iedi kamade ro? Nio abato a-wamo ra? E e potoro ie, imese ta-garatowouti. Mo umoro ie iedi tau ro nato nio auna nirimagare ie mo aboto, ina noudo ie ata gabo kowamo rasiri ie nio edi idomari ro ba-giaubuti-rimo ina mo aboto ba-giaiwo-rimo mo owarebai ri.¹⁶Mo ro morobise owera niatiti nio aboto. Ina beda sosoro ra, mo nio ro nasa dubu to nou mabu ato anamadima-apoi-ri ra?

¹⁷Nedi karasaubuti urubia ro na-gou-rimo nio aboto, nio neio ro iageawado-dumo. Neio ubi tato ie nio kiwarebai aboto, neio ubi ie nio iwagare ri mo owera kirowidiro aboudo ina bibiri oi ri neio owera se irowidiro ri.¹⁸Mo nio mutu komidiro ato o komidiro tato, nio modobo ie bibiri kiasibai meamea tanaro kisioidiro sapuwo to.

¹⁹Merebusere nirimagare babio, mo nio mamu sosoro ie. Urubia orobo mere temeteme ro beda sosoro ra na-owaibia, mo idaibo sosoro mere temeteme ro ina nowaibia nio sapuwo to, womu tato nio Iesu Keriso sosoro nama-irowomidirotiti-ri.²⁰Mo muso ato nomidiro kaupoti mo auna ubi towamo durupi to kou nio mutu mea mino to eremowauti ri. Mabu mo auna kimaragoidiro towamo nio aboto, kimaragoidiro sirio mutu nomidiro nio ro edi tanaro ro na-gisioidiro-dumo nou sapuwo to.

Totomu owera Sera ra Haga ra sapuwo to ie

²¹Nio iato na-orowomidiro nio ubi ie Mose sabi maumo ato korowomidiro. Mose ro beda sosoro owera gisioidiro nio ro mea se a-gimidai-rimo ra? Mo ma-demowapotai-rimo!²²Nou ro ibo, Aberaham ro netewa teibo mere teibo girasomai-ma, ata mere sowake besere Haga nou ato garasomai, durupi ubi ato. Ata mere morobise orobo ato garasomai, iedi mere ro Godi owera ato garasomai. Morobise orobo ato na-garasomai iedi mere ro, nou na-goroto mamu ro mabu Godi ro keba se Aberaham ta-gemowapotai ibo nedi tanaro ro amadimo-ororosioidiro-ri.

²⁴Ina nedi totomu ro nou ro a-nimowapotai-die ata maumo, nedi orobo teibo ro neitiro idaibo sosoro ie hodo teibo na-gimasaubiai-ma Godi ro urubia aboudo. Hodo teibo nou e, neitiro imabuti-mado. Haga owawea-die ibo sabi sirio Mose ro Godi aboudo na-gimidai-ro Sinai podo rido Arabia duriomoro ato na-wotoi. Etio ra Mose sabi patu maumo ato na-orowomidiro, neio Haga merebusere ie, sabi patu ro imuruti-dumo. Haga ibose owawea-die Ierusarema sabowa nedi sopu goto ro nato na-owamo, Iu urubia abora bato orowomidiro neio sabi patu ro imuruti-dumo.

²⁶Ata hodo nou e. Morobise orobo owawea-die ibo ohu ato ata Ierusarema na-owamo-die, nou nimo mamu e. Nou merebusere sabi patu ro imuruti pua.²⁷Ina Tarena Buka ato owera ibo iamo, Ierusarema oro modobo ie kamade ro kowati. Oro ibo omidiro teri orobo ie, mere temeteme oro ro owaibia pua. Nedi tau ro nato kamade mutu ohare ba-diwati, mabu oro saiki ata simara merebusere sirio mutu ama-omidiro-ri. Ata orobo uramu mutu na-imidirotiti nou merebusere sipu pua, kaupoti oro merebusere sirio ia amadimo-oi-ri.

²⁸Niramio, nio Aberaham merebusere ie Aisaki beda sosoro ra, mabu keba se Godi ro Aberaham aboudo hodo ta-gasaubiai-ro. Io Godi ubi ato gororosioidiro.²⁹Ata mere sowake besere ato na-garasomai, nou ro gosobi ata mere morobise orobo ro na-goroto. Ina abora atu sosoro tanaro tororosioidiro-dumo. Mose sabi etio ro ibodoro-dumo ina nimo etio ro Tarena Urio aboudo keremiro na-nimade-rimo nimo neio ro ubauba se niworohuti-dumo.³⁰Tarena Buka ato ibo iamo Abora nedi sowake orobo ro mere mutu diwagare-ma! Iedi mere ro modobo pua arua namabu nou ro kirahidimai. Iedi mere ro morobise orobo ro na-gowahau iedi namabu sirio ro abera aboudo modobo ie nou ro kirahidimai.

³¹Niramio, ina nou do ie nio mo ro a-nimowapotai nedi sowake orobo ro nimo nou merebusere pua, nimo morobise orobo nou merebusere ie.