Read Epesesi 1

Epesesi1

Kamade owera Epesesi urubia aboto

¹Mo masiro Pauro ie, nedi peba titi owera ro mo ro nisioidiro. Mo Godi ro nohodowa-ro Iesu Keriso ro kotiodorai dubu to ararasoro ri.
Godi edi tarena urubia ro Epesesi sabowa ato na-orowomidiro, nedi peba titi ro nio aboto nimeiriai. Iesu Keriso gabo ato koko se etio ro iromowotoi-dumo, io nio nou se ie.²Wisa tato nirimagare, miro mutu nimo Abera Godi aboudo na-ororuwotiti-die, ibose Abera Naramu Iesu Keriso nou aboudo, nio abato aise ba-miamotiti.

Urio kiwarebai Keriso aboudo ie

³Abera Naramu Iesu Keriso nou edi abera ro Godi nouse ie. Nimo ro nou se memowabu-rimo. Nimo nou ro korosa ta-nimia-ro Adiri sabowa rido nimo urio iwarebai-ri imese sirio meamea tanaro to. Nimo Godi ro Iesu aboto ta-nidabuai, ina meana nimo aboto nou ri iaiwotiti-die.

⁴Iedi meamea tanaro ro nimo aboto nou ri ou-diomo, mabu nimo Godi ro keba ia se nirapoi-ro, nou tarena urubia to ararasoro ri. Sopu duriomoro ido to gosioidiro, nimo nou ro tau se nirapoi-ro nou urubia to ararasoro ri, ibose Godi sosoro gabo ato mea se orowomidiro ri ubauba tato se. Godi ro nimo sapuwo to gabo keba ia se gosioidiro, nimo nou ro simara ia merebusere to nou ri niapoi, mabu nu auna nirimagare ie nimo aboto. Iesu Keriso ro edi gabo ro gosioidiro Godi kamade ta-goi, nou ubi neito gowamo.

⁶Ina nou do ie Godi nimo ro aise kemowabu modobo ia ie, nou ro edi auna ia wisa tato nirimagare ro nimo aboto ta-gaiwai-ro. Nu edi kaupoti nirimagare ia mere ro nou ro tanaro na-gosioidiro, iedi meana ro nou aboudo orororuotiti-die.

⁷Mabu Iesu Keriso edi karaburai ro na-garaburai, nimo nou ro karima to ta-niahodorai, taie nimo ubauba aboudo aise niapopo-ro. Nimo edi ubauba sirio ro nou ro aise giatopeamuti. Godi edi wisa tato nirimagare ro imese auna ia ie, nimo aboto momuo se wisa tato se aise gaiwai-ro. Nimo nou ro mea muro tanaro to korowomidiro ta-nimia-ro, ibose mea umoro ta-nimia-ro tanaro kieibimo sapuwo to.⁹Godi ro gabo kebase ta-gosioidiro, nou ro edi gabo ro nimo aboto nou gowapotai-ro. Nedi gabo ro Godi ro urubia aboto kebase owapotai pua, piro se owamotiti. Nedi gabo ro na-nowauti nou e, Godi ro edi gabo ro Keriso aboudo gosioidiro, nou ubi neito gowamo.

¹⁰Iedi saiki ro nou ro na-gohodowa paeapaea nama-oi-ri, nou ubi tanaro nato aise amadimo-ororosioidiro-ri. Ina nou ubi tanaro ibo ie, Godi ro edi namabu sirio gisioidiro Adiri sabowa ato, sopu duriomoro ato na-iamo, nou ro kaupoti moro to nato amadi-iwou-ri, neio imese Iesu Keriso sairo mabu ato ama-iaremuti-ri ina nou ro ama-iauri-ri.

¹¹Tanaro sirio na-irorosioidiro-dumo io Godi ubi ato irorosioidiro-dumo. Duriomoro ido to gosioidiro nimo nou ro ta-nihodowa Iesu Keriso aboto idabuai ri, ibose nou urubia to ararasoro ri.¹²Godi ro nedi tanaro ro nou mabu ato gisioidiro nimo etio ro nimibiria-rimo kebase Iesu Keriso sapuwo to, nimo ro auna ia pupuwo Godi kemowabu modobo ie.

¹³Nio ro morobise owera ta-girowidiro-rimo ibo, mea owera Iesu sapuwo to nio ro kimibiria ato nio Godi ro nato kiapopo ie ubauba aboudo. Nio etio ro imibiria-dumo, Godi ro isabuna nio abato ta-giwate. Nedi isabuna ro Tarena Urio nouse ie, nio nou ro iwapotaidiro-die ibo nio nou ro Keriso aboto ta-gidabuai. Tarena Urio sapuwo to Godi ro kebase ta-garo ibo nou urubia aboto amadi-emeiriai-ri,¹⁴nimo umoro koi aboto ibo nou ro edi na gimasogoro-ro, saiki ata nimo ro momuo se nato namadimi-imidai-ri.
Ina nou mabu ato ie nimo morobise to umoro ta-noi-rimo ibo, nimo Godi ro imese anama-iapopo-ri, nou do to ararasoro ri, womu tato womu tato aise anama-irowomidirotiti-ri. Nimo ro auna ia pupuwo ia Godi kemowabu modobo ie.

Pauro kararatoro owera ie eso owera mutu

¹⁵Mo ro owera ti-nirowidiro ibo nio ro Iesu Keriso sapuwo to mea owera koko se torobidiro-dumo. Ibose Godi edi tarena urubia sirio ro nio ro nirimagare aise imatiti-dumo, ina noudo ie¹⁶mo ro sirio tau eso owera karo Godi aboto. Nio mo ro sirio tau aise nimaragoidirotiti, nio Godi aboto nou ri niwapotaidirotiti kararatoro tau ato.¹⁷Nimo Abera Naramu Iesu Keriso edi na emowabutiti, mo ro nou aboto sirio tau aise niarotiti. Abera Godi imese auna ia dubu e. Nou mo ro a-nararatorotiti nio nou ro muro iwaititi rie, Tarena Urio iedi pupuwo ro neito. Ibose Godi ia nakara se orowapotaidiro rie nio keremiro ato, nio umoro auna neito iwai rie Godi sapuwo to.¹⁸Nio sapuwo to mo ro Godi aise nararatorotiti nio giropu mea se idobura ri. Ina Godi ro nio edi giropu ro nama-idobuti-ri, nio ro iato umoro amadimo-oi-ri ibo nio edi tanaro aboto na-gihodowa-ro, nio ro abora kamade mutu na-emotoi-dumo, imese meana ia maumo tanaro ie kimidai aboto. Ina ibose nio umoro amadimo-oi-ri ibo nou ia simara urubia nou imasogoro-die, saiki ata neio ro maumo ia tanaro nou amadimi-imidai-ri.¹⁹Ina ibose nio umoro amadimo-oi-ri Godi edi pupuwo korosa ro na-owamotiti imese auna ia ie, duriomoro urubia pupuwo mutu keremodobowa modobo pua. Nou edi pupuwo ro woko neito isioidirotiti nimo abato.²⁰Iedi atu pupuwo korosa ro Godi ro kohodowa dubu Iesu pamo rido neito ta-gowameai-ro. Iedi atu pupuwo korosa ro nou Godi ro tumodi sapuwo ato neito gowomi, abora eputa dubu to nou ro omidiro Adiri sabowa ato.²¹Nou ro ioudo iauri-die imese sowake urio sirio, ibose urio sirio eputa urio to edina ro irarasorotiti-dumo, pupuwo orora, arua pupuwo korosa mutu urio, neio imese Iesu Keriso ro sopu to iauri-die. Awawo masiro edi na orora ro irobidiro-dumo, Iesu Keriso ro sopu to iauri-die abora, ina ido neio nou ro sopu to iaurititiwai-ri.²²Imese imese tanaro Godi ro Iesu Keriso aboto giaiwai kiauri aboto. Nou simara urubia kiwarebai sapuwo to, Godi ro Iesu Keriso ta-gapoi imese tanaro sopu to iauri ri.²³Iesu simara urubia nou durupi ie. Iesu urubia keremiro Keriso aboudo imadetiti-dioumo, imese beda mutu namabu ro iamo erere moro ato, Keriso nouse ie keremiro nou ro imiotiti.