Read Owera kobodorouti 2

Owera kobodorouti2

Tarena urio na-gororuwo-ro

¹Ohona Kiwoiriamuti Soriomu saiki na-gereredea, imese kimibiria urubia neio kaupoti moro to ta-garadabuti.²Ina auna diamo gebari nato gororosioidiro toboro rido na-gororuwo-ro, neio nou ro a-gimabuo-ro. Iedi diamo ro surama diamo beda sosoro ra idaibo sosoro ie. Neio beda moto ato gorowomidiro iedi diamo ro nou ro aise giahidimai.³Neio ro ata nakomu nato gowea-rimo, iedi nakomu ro ioudo na-gororuwo-ro turupina pina beda sosoro ra ohu rido nou ro gororuwo-ro. Iedi pina ro neio ro gororoburutai-rimo erere kimibiria urubia durupi ato aise gomititi-rimo.⁴Neio iato Tarena Urio ro aise giworohuti, nou ro modobo giwai neio umoro tato owera to eremowagomea ri.

⁵Nedi tau ro nato arua Iu urubia Godi etio ro emaragoidirotiti-mo neio ibose to gorowomidiro Ierusarema sabowa ato. Neio sirio duriomoro rido apira gou-rimo ito.⁶Taie neio ro kowasoro urubia owera na-gimororowai-rimo neio atu moro to aise garadabuti-rimo. Mabu neio aborabora ro girobai idaibo sosoro tanaro neio ro kiauri pua. Idaibo urubia erere owera to na-geremowagomea-rimo⁷abora tanaro ro gororosioidiro, iato neio auna kimaragoidiro ro giopia.
Taie neio ro ibo, ‘Nedi urubia ro na-eremowagomea-dumo neio Gariri duriomoro rido ra?⁸Kaupoti nimo ro ti-nemewidiro-dumo neio beda owera to eremowagomea-dumo. Neio umoro beda sosoro oi-dumo?⁹Nimo duriomoro erere rido noroho-dioumo nimo arua Patia rido ie, Media, Eramu, nimo amia Mesopotamia rido ie, Iudia, Kapadosia, Ponitasi, Eisia,¹⁰Piridia, Pampiria, Isipi, Sairini goto ato Ribia duriomoro ato na-owamo, Roma,¹¹Kiriti daro Arabia. Nimo arua Iu urubia ie ina nimo arua Iu urubia to nararapoi-rimo. Kaupoti nedi urubia ro nimo ia owera to na-waro-dumo ti-nimewidiro-dumo. Godi ro beda meamea tanaro gisioidiro nou sapuwo to eremowagomea-dumo.’

¹²Modobo pua nedi tanaro ro apira urubia ro maumo mea se kowea, neio kimaragoidiro ro giopia. Taie neio nakara se iato geremodoruti-rimo, ‘Nedi tanaro ro na-wororosioidiro-dumo nou maumo beda sosoro ra?’

¹³Kaupoti neio arua urubia ro a-gimasosowado-rimo ibo, ‘Nedi urubia ro koko obo idio-dumo.’

Pita ro urubia gimowauti

¹⁴Pita aise geribua arua 11 kitiodorai urubia mutu, taie nou ro ibo urubia sirio aboto, ‘Mo borubi Iu urubia nio Ierusarema sabowa ato nato na-orowomidiro, gare neito mea se diedea-rimo. Mo beda owera nama-aro-ri mea se ba-dimidai-mo.¹⁵Nio ro imaragoidiro-dumo nedi urubia ro idio-dumo, kaupoti neio idio pua. Saiki ta-idiai-ro nou kowaroho saiki ie.¹⁶Godi ipusu owera dubu Ioere tagara tau ato ta-gomidiro nou ro owera keba se ta-gisioidiro nedi tanaro ro notororosioidiro-dumo nou sapuwo to. Ioere ro ibo¹⁷Godi ro aro-die nedi owera ro, Womu tau ato mo ro Tarena Urio anamadi-emeiriai-ri imese urubia aboto, ibose nio merebusere ro mo ipusu owera amadimi-imowautiti-ri. Nio orio domere, oromano babio neio aboto mo ro hiwo to tanaro patu anama-iwawutiti-ri.¹⁸Iedi tau ro nato mo ubi tanaro etio ro isioidiro-dumo upi dubu neio aboto mo ro Tarena Urio anama-emeiriai-ri neio ro mo ipusu owera amadimi-imowautiti-ri.

¹⁹Mo ro pupuwo korosa tanaro anama-isioidiro-ri toboro ohu ato ibose sopu duriomoro ato, urubia ro amadimi-iauri-ri idaibo era, karima, kaparuti gahuta.²⁰Saiki ibo otoi-ri pua duwoduwo ama-oi-ri, sogomi karima ro ama-orobai-ri. Ina iedi tau ro nato mo edi koto saiki ro nato auna ia meamea tanaro ro amadimo-ororosioidiro-ri.²¹Mo etio ro nororu-dumo neio mo ro kiapopo ie ubauba aboudo.’

²²Pita ro ina ibo, ‘Isiraere urubia, owera neito dirowidiro-rimo. Iedi Nasareta dubu ro Iesu nou ro pupuwo korosa tanaro ta-gisioidiro. Nou ro na-gisioidiro Godi ro giwawuti-ro ibo Iesu gemeiriai-ro neito, mabu Iesu ro Godi edi pupuwo ro neito gisioidiro. Nio umoro ta-goi-rimo mabu nedi tanaro ro nio abato gororosioidiro-rimo.²³Godi ro keba tau ato Iesu ta-garapoi ubauba urubia aboto aiwai ri. Ina nio ro ubauba urubia tu to noti gedea-rimo ina iato gemopoguti-rimo ota kemowotowa teibo ato araburai ri.²⁴Kaupoti nu Godi ro pamo rido ta-gowameai-ro. Godi ro nou pamo temeteme aboudo ta-gemapoduti mabu nou pamo ro modobo pua tuturu tau to kowarabu.

²⁵Deibidi ro keba se idaibo owera ta-garo Iesu sapuwo to. Nou ro ibo, Abera Naramu mo sosoro gabo ato timidirotiti ina ibose mo tere owamo-ri pua mabu nou mo abato aupise tomidiro.²⁶Ina noudo ie mo giropu ato kamade ro ama-owamotiti-ri. Mo aboudo sirio tau kamade owera ro amadimo-osuwoduti-ri. Mo aboto Godi ro meamea tanaro kisioidiro aboto mo nou anama-imasebidiro-ri.²⁷Abera Naramu ro Dudi ato mo tuturu tau to emauriai-ri pua. Mo Tarena dubu nou ia se ie, ina mo durupi nou ro emauriai-ri pua kepuse aboto.²⁸Mo nou ro keremiro gabo ta-nemowapotai-ro. Mo nou ro kamade nowaititi, ina nu mo abato aupise imidirotiti.

²⁹Mo borubi Iu urubia nirimagare babio nio mo ro tuputupu se mimowapotai-ro ibo, nimo nasa Deibidi ta-garaburai nato gemoba-rimo ina nou bobo nato towamo.³⁰Deibidi nou Godi ipusu owera dubu e, nu umoro ie Godi beda owera garo-ro nou aboto. Godi ro keba se Deibidi ta-gemowapotai ibo, “Oro nasa ro ama-omidiro-ri eputa dubu to, oro abora idaibo sosoro na-omidiro.”³¹Ido amadimo-ororosioidiro-ri Deibidi keba se umoro ta-goi. Ina nou ro nou ri gutura ibo, “Godi ro kohodowa dubu Dudi ato tuturu tau to emauriai-ri pua, ibose nou durupi epuse-ri pua. Godi ro nu ama-owameai-ri pamo rido,” ina Deibidi ro nedi owera ro nou sapuwo to gisioidiro.

³²Ina Iesu nou se ie Godi ro kohodowa dubu nou ro ta-gowameai-ro pamo rido. Ina saro gabo ato nimo ro imese ta-nowea-rimo.³³Iesu Godi ro ta-gowioro Adiri sabowa to, ina nou abora Godi tumodi sapuwo ato omidiro-die. Ibose Abera Godi ro Tarena Urio Iesu ta-gemapoi, keba se idaibo sosoro owera to ta-garo noti gororosioidiro-rimo. Ina Iesu ro emeiriai-die Tarena Urio nimo aboto, abora nou e, nio ro tiauri-dumo ina owera tirowidiro-dumo nou aboudo.

³⁴Deibidi owioro pua Godi ro Adiri to. Kaupoti Deibidi ro ibo, Godi ro ibo mo edi Abera Naramu ro nou aboto Oro ba-domidiro mo tumodi sapuwo ato,³⁵womu tato oro nasa urubia oro sairo mabu ato imese nama-iwomititi-ri oro ro ituti ri.

³⁶Io edi dubu ro nou se ie Iesu nio ro ota kemowotowa ato na-gemopoguti-rimo, Iesu Godi ro nio Abera Naramu to gapoi, ibose Godi ro kohodowa dubu Iesu nou se ie. Isiraere urubia nio morobise umoro doi-mo abora!’

Urubia sirio Pita owera gimibiria-rimo

³⁷Urubia sirio ro na-girowai-rimo Pita ro edi owera to gimowauti neio giropu mibo ro aise girobai. Taie neio ro Pita arua kitiodorai urubia mutu nato gimodowa-rimo, ‘Namuturubi nimo ina beda sosoro nama-orowomidiro-ri?’

³⁸Taie Pita ro neio iato gimowameai, ‘Nio imese derewesegerai-mo ubauba aboudo Godi aboto, ina nio obo to nimo ro nato anamadimi-iwarumiauti-ri, nio Godi ro kohodowa dubu Iesu nou kowasoro urubia to nato aise amadima-ararapoi-ri. Nio ubauba nou ro nato imatopeamuti rie. Ina ibose Godi ro Tarena Urio nio aboto nato amadi-emeiriai-ri.³⁹Nedi owera ro keba se ta-gou-ro nio aboto nio merebusere mutu, ibose beda urubia ra muso duriomoro ato na-orowomidiro neio Godi ro tiramairi-die nou aboto oroho ri.’

⁴⁰Pita ro neio sirio owera to gitomu nou ro ibo, ‘Nio mo ro a-nimagege ubauba tanaro urubia ro abora na-isioidiro-dumo neio ro edi ubauba wisa ro namadimi-imidai-ri, modobo pua nio atu sosoro wisa kimidai neio mutu, nio ioudo ba-daragarewado-rimo!’

⁴¹Pita owera edi urubia ro gimibiria-rimo mea se neio imese obo to aise giwarumiauti-rimo ina iedi atu saiki ro nato 3,000 urubia neio ro garadabuai-rimo Iesu kowasoro urubia aboto.

Kimibiria urubia ibo gorowomidiro

⁴²Kitiodorai urubia ro edi awawo korosa tanaro ro na-gisioidiro-rimo, sirio urubia neio aborabora ro girobai. Iedi tau ro nato kimibiria urubia ro auna karatamudiro iaurititi-mo kitiodorai urubia aboudo. Kimibiria urubia naminiramio sosoro iroworohutiti-mo, ibose neio Iesu Nirimagare Ohona ta-isioidirotiti-mo, ina atu se Abera Godi aboto auna se iraratorotiti-mo.⁴⁴Kimibiria urubia ro neio atu moro ato iradabutiti-mo neio eremahodawadotiti pua. Neio namabu sirio ibo pua kaupoti mere ro nakara se kiworohuti, neio imese namabu sirio aise iromiotiti-mo.⁴⁵Neio goto na-iaiwotiti-mo mani na arua urubia aboto, ina edi mani ro na-imadetiti-mo, mani tato urubia neito iwarebidirotiti-mo, ibose arua mani neio nakara se iromiotiti-mo. Ibose neio namabu aise giaiwo-rimo mani urubia aboto iwamade ri, taie edi mani ro neio ro mani tato urubia gimio-rimo.⁴⁶Ina sirio kimibiria urubia Tarena Moto ato sirio saiki aise iradabutiti-mo. Neio ibose erere moto ato ta-wiradabutiti-mo ohona atu se iato gidimi-iho-ri. Neio auna kamade ie ohona idaibo na-iromio-mo,⁴⁷Godi na-emowabutiti-mo, urubia sirio edi sabowa ro iato na-gorowomidiro kowasoro urubia aboto auna kamade oititi-mo. Ina saiki gabogabo edi urubia ro Abera Naramu ro na-iapopotiti-ro, nou ro kimibiria urubia aboto aise idabutiti.