Read Owera kobodorouti 18

Owera kobodorouti18

Korini urubia Iesu sapuwo to Pauro ro imowautiti

¹Pauro Atenisi sabowa na-gemeserai nou imese gou Korini sabowa to.²Taie Korini sabowa ato ata dubu nou ro iato gatowamo nou masiro Akuira. Nu Iu dubu e, mamu ro Ponitasi duriomoro ato goroto. Kaupoti Akuira nu orobo mutu Pirisira neitiro keba se Itari duriomoro ato imidirotiti-do, ina ioudo giabu-rido Korini sabowa to. Mabu Roma eputa dubu Karadiasi-Sisa ro sabi ibo gimedea Iu urubia modobo pua Roma sabowa ato korowomidiro, neio nou ro ioudo aise giwagare-ro. Taie Akuira tiro ro Itari duriomoro aise gemeserai-rido imese giabu-rido Korini sabowa to.
Neitiro parai kiwaruwouti woko isioidirotiti-do, ina Pauro ro nato giraturiomai-ma. Neibi atu moro ato na-imidirotiti-bimo iedi woko ro neibi ro atu se isioidirotiti-bimo, mabu Pauro ia ibose nou parai kiwaruwoidiro woko dubu e.

⁴Iu urubia komidiro saiki ato Pauro Iu urubia karadabu moto to aise irohotiti, Iu urubia Giriki urubia neio imowauti ri. Neio nou ro auna se imagegetiti mea owera Iesu sapuwo to imibiria ri.

⁵Taie iato ata tau Sairasi ra Timoti ra neitiro Masedonia duriomoro na-gemeserai-rido imese gou-rido Korini sabowa to, Pauro neitiro ro iato gemadabuai-rido. Ina iedi tau ro nato Pauro ro parai kiwaruwoidiro woko aise gemeserai, nou ro auna tau omadetiti Iu urubia nou ro na-imowautiti ibo Iesu nu Godi ro kohodowa dubu nou se ie.⁶Kaupoti Pauro edi kitamudiro ro neio ro aise gemadibiai-rimo, ubauba owera iato garo-rimo nou aboto. Pauro iato poro panese se geremahudumai. Nou ro ibo, ‘Ei! Nio ro womu tato womu tato keremiro kowea tato, mo mibo pua io! Nio simara mibo ie! Mo nio aboudo nama-osuruo-ri Iu owera karo tato urubia aboto nama-ou-ri, neio anama-imowautititi-ri.’

⁷Taie Pauro Iu urubia karadabu moto na-gemeserai, imese gosuruo-ro Taitiasi-Iasiti moto to. Nedi dubu ro Iu dubu pua, kaupoti morobise Godi nou ro emowabutiti. Nou moto Iu urubia karadabu moto gomo ato itoititi.⁸Ata dubu masiro Kirisipasi nou Iu urubia karadabu moto eputa dubu e. Nu ia, moto urubia mutu, neio atu se ta-gimibiria-rimo Abera Naramu edi mea owera ro. Ina iedi sabowa gebari ro nato sirio urubia neio ibose to ta-gimibiria-rimo, iato neio arua kimibiria urubia ro obo to aise giwarumiauti-rimo.

⁹Ata duwo ato Pauro hiwo sosoro na-gorobu, Abera Naramu nou aboto owera nato aise garo-ro. Nou ro ibo, ‘Pauro, oro tere na ie, oro matagoro kimopai oroho ate. Urubia owera inaina ba-dimowautiti mo sapuwo to,¹⁰mabu mo sirio tau oro mutu ti-nimidirotiti. Oro ata ro ubauba owai-ri pua, mabu nedi sabowa ro nato mo ia urubia sirio ro orowomidiro.’

¹¹Pauro iato kaupoti kisimisi ina 6 sogomi neito imidirotiti Korini sabowa ato, urubia Godi owera to iato itamudirotiti.

Pauro arua Iu urubia ro gowou-rimo koto aboto

¹²Iedi tau ro nato Akaia duriomoro ato gabamani to Gario ro gomidiro, urubia nou ro wiaurititi. Taie arua Iu urubia atu se ubi nato goi-rimo Pauro neio ro koto owai ri, taie gabamani dubu aboto iato aise gowou-rimo.¹³Neio ro ibo garo-rimo koto abato, ‘Nedi dubu ro Godi kemowabu tanaro ata sosoro iwapotaidiro. Idaibo kemowabu tanaro nimo abato owamo pua, sabi ie!’

¹⁴Ina Pauro ubi ie owera utura ri, neio edi owera kio ro nou ro imowadamea rie, kaupoti nou owera Gario ro samo to gemowasiai-ro. Gario ro ibo, ‘Nedi dubu ro nio ro neito na-owou-dioumo koto aboto, nou ro ata dubu ata a-gopia ra? Ata auna sabi ata a-gesebea ra? Idaibo tanaro ata nou ro kosioidiro rasiri ie, nio koto owera mo ro nato ba-nimewidiro!¹⁵Kaupoti nedi mibo ro nio simara mibo ie, mabu nio simara owera mabu ato eremaro-dumo. Nedi mibo ro nakara se ba-doporeai-mo. Mo ubi tato ie nio koto owera kimerewidiro.’

¹⁶Iedi Iu urubia sirio ro gabamani dubu ro koto aboudo aise gimabodorai-ro.¹⁷Neio ioudo na-gosuruwo-rimo, Iu urubia karadabu moto edi eputa dubu ro masiro Sositeni, gabamani dubu sosoro gabo ato neio ro aise gohiai-rimo nato gadomauti-rimo. Nedi tanaro ro na-gororosioidiro Gario ro imaragoidiro pua.

Pauro Ina gorowameai Entioko sabowa to

¹⁸Pauro Korini sabowa ato tuturu tau to ta-gomidiro arua kimibiria urubia mutu. Ioudo nu Siria duriomoro to aise gasiriai-ro Pirisira ra Akuira ra mutu. Neibi ido giabu-birimo Siria duriomoro to, tauo keba se Pauro sobo se gowarure-birimo Kenkiria sabowa ato. Mabu nu keba se Godi sosoro gabo ato keremowotouti owera ta-garo, ina keremowotouti owera womu to nato gereredea.

¹⁹Taie neibi ioudo sawa pe se gorobai-birimo, Epesesi sabowa to imese giabu-birimo. Epesesi sabowa to na-gorowateai-birimo Pirisira ra Akuira ra Pauro ro iato aise gimeserai-ma.
Pauro iato na-gomidiro nu aise gou Iu urubia karadabu moto to, iato neio mutu owera imese geremowauti.²⁰Neio ro nu iato gemodowa-rimo ibo, ‘Modobo ra oro egea mere se komidiro nimo abato?’
Nu ubi tato goi iato komidiro,²¹kaupoti nou ro ibo, ‘Godi ubi beda sosoro owamo mo nio aboto nato anamadi-orowameai-ri.’ Taie neio nou ro aise gimeserai.
Pauro Epesesi sabowa rido sawa pe se gorobai-ro,²²nu Siseria sabowa to na-gorowateai-ro, ioudo gidiai-ro Ierusarema sabowa to, taie nou ro kamade owera iato gaiwai Iesu patu urubia aboto. Ina iedi tanaro ro na-goroporeai nou saro gabo ato Pauro Ierusarema sabowa rido aise godori-ro Entioko sabowa to.

Aporosi Epesesi sabowa ato na-gomidiro

²³Edi tau ro nato Pauro Entioko sabowa ato egea mere se ta-gomidiro, nu ioudo na-gasiriai-ro, imese gidiai Pisidia ra Gereisia ra duriomoro teibo to. Pauro sabowa gabogabo na-goroho, kimibiria urubia iato na-gorowomidiro, neio kimibiria pupuwo nou ro aise gimowaititi.

²⁴Ina ata Iu dubu masiro Aporosi nou Arekesanidara sabowa ato goroto mamu ro. Arekesanidara sabowa Isipi duriomoro ato owamotiti, nou ioudo gabu-ro Epesesi sabowa to. Nou ata mea owera kimowauti dubu e, ibose nou abato auna umoro ro owamotiti Tarena Buka sapuwo to.²⁵Aporosi urubia ro keba se ta-gatamudiro-rimo Abera Naramu kowasoro gabo sapuwo to. Nou owera na-iarotiti auna kamade pupuwo mutu iarotiti. Aporosi ro ibose urubia tuputupu se ta-itamudirotiti Iesu sapuwo to. Kaupoti nou umoro mea se owamotiti pua obo to kiwarumiauti tanaro. Nou ro keba se owera ta-girorowai Ioane ro obo to beda sosoro iwarumiautiti, iedi umoro kainai ro nou abato nou ro owamotiti.²⁶Nou Epesesi sabowa to na-gorowateai, nou ro auna owera nato garo Iu urubia karadabu moto ato. Ina nou owera Pirisira ra Akuira ra ro na-gemewidiro-rido, nu neitiro ro aise gadabuai-rido imese gowou-rido neitiro moto to. Taie neitiro ro nu iato gowarebai-rido arua umoro owera to, ibo Godi edi gabo ro nou sapuwo to.

²⁷Edi tau ro nato Aporosi ubi a-gowamo Akaia duriomoro to abu ri. Ibose nu kimibiria urubia ro pupuwo gowaititi-rimo iedi tanaro ro osioidiro ri, ina peba titi neio ro iato gemesioidiro-rimo, ibo nio kimibiria urubia iato na-orowomidiro, nio nimo ro a-nimowapotai-dumo ibo, modobo ie nedi dubu ro nio ro kemaidodorai.
Akaia duriomoro ato kimibiria urubia na-gorowomidiro neio keba se ta-gimibiria-rimo mea owera Iesu sapuwo to, mabu, Godi ro edi wisa tato nirimagare ro na-gaiwai-ro, neio abato ta-owamotiti. Ina nu ito na-gorowateai neio aboto, nou ro neio mea mino to iwarebidirotiti.²⁸Nou Iu urubia mutu, paea se owera to auna ia se wirimowotoititi. Nou ro Tarena Buka owera maumo mea ia se imabutititi neio aboto ibo, Iesu nou se ie Godi ro kohodowa dubu.