1Keba se oro mo ro a-nemowapotai sirio tau aise gi-araratoro-ri imese sirio urubia sapuwo to Godi aboto eso owera mutu,2idaibo awawo gabamani rubi to na-wararasoro-dumo, ibose arua eputa urubia neio sapuwo to kararatoro modobo ie, nimo mea miro mutu orowomidiro rie, idaibo Godi ubi tanaro se kisioidiro ina nimo ro meamea tanaro kisioidiro arua urubia aboto.3Nimo idaibo sosoro karatoro ato, io mea tanaro ie Godi kamade nimo ro neito kowaititi ie. Nou nimo kiapopo dubu e4ina nou ubi ie imese urubia ubauba aboudo kiapopo, ibose nou ubi ie imese urubia nou morobise owera aboudo koko se kirarebidiro.5Mabu Godi kaupoti nou se ie ina turi dubu kaupoti nou se ie urubia Godi aboto iapopo ri. Iedi turi dubu ro Iesu Keriso ie,6simara durupi nou ri gaiwai nimo ubauba aboudo imese iapopo ri. Godi ro neito gowapotai-ro edi tau ro na-gohodowa ibo nou ubi ie imese sirio urubia ubauba aboudo kiapopo.7Mo Godi ro ta-narapoi-ro iedi mea owera ro neito imowauti ri, ibose nou kotiodorai dubu to ararasoro ri. Mo ro morobise owera nisioidiro arasaubuti pua, mo nou ro ta-narapoi-ro Iu owera karo tato urubia itamudiro ri morobise owera Iesu sapuwo to.8Mo ubi ie nio bato iradabutiti-dumo Godi kemowabu aboto, dubu neio karatoro ato tu teibo kiwoubua-ma modobo ie niro turi marea tato se kowamo idaibo serawo tato keremaro tato arua rubi mutu.9Ibose mo ubi ie urubia Godi kemowabu aboto karadabu ato mamio neio modobo pua ubauba se keremeduti, sobo sowio auna se eremamo mamo, awawo wisa namabu idaibo tu mau sowio, turukusura, awawo wisa obotama neito eremeduti mamo sagaru korowai sapuwo to. Modobo ie mea se keremeduti ie.10Morobise to mea mino to keremeduti tanaro ibo ie, meamea tanaro kisioidiro urubia kiwarebai aboto. Beda mamio ro karo ra ibo, ‘Mo Godi ubi tanaro ti-nisioidiro’, modobo ie neio idaibo sosoro tanaro nou kisioidiro.11Ata dubu ro Godi owera to kitamudiro ato mamio neio modobo ie owera tato korowomidiro keremowabu tato korowomidiro mea mino to karatamudiro aboto.12Mamio mo ro imapoi pua dubu kitamudiro aboto, dubu neio ro imasaudo-ri pua Godi kemowabu tau ato,13mabu Godi ro keba se Adam gosioidiro iato Ibi gosioidiro.14Ina ibose Adam ematigiai pua Satani ro, Ibi gematigiai iato Ibi ro Godi edi sabi ro aise gesebea.15Idaibo sosoro meamea tanaro kisioidiro, kimibiria Iesu sapuwo to kiworohuti, amia urubia aboto nirimagare tanaro kisioidiro, mea mino to korowomidiro, io idaibo sosoro mamio Godi ro ama-iapopo-ri, neio mere kirotuti ato araihiti-ri pua.
expand_more
The books couldn't be loaded. Check your connection and try again.