Read Pita keba peba titi owera ie kimibiria urubia aboto 2

Pita keba peba titi owera ie kimibiria urubia aboto2

Iesu keremiro nadi ie

¹Ina noudo ie, imese korohoio tanaro sirio aise ba-diwagare-mo idaibo, urubia kisaubuti, meana to karatigi, masawe kerereauri, urubia owera to ubauba kiwaititi.²Kaupoti orio kirotuti bamuai kainakaina beda sosoro ra, neio auna ubi ie nono isi kidio, nedi nono isi ro nato ata ubauba ata owamo pua. Ina nio idaibo sosoro korowomidiro modobo ie, Godi edi owera ro nou sogoi ro kiwati kiroromowado sapuwo to, womu tato nio Godi ro nato amadi-iapopo-ri.³Mabu nio ro nakara se ta-giauri-rimo ibo, Abera Naramu nou meana ie.

⁴Nio Iesu Keriso aboto aise dou-rimo, nou nadi sosoro ie, keremiro nou abato towamo. Urubia sirio nedi keremiro nadi ro ta-iaurititi-mo sekere, kaupoti nou neio ro ubi tato to asorotiti-mo. Kaupoti nedi mea ia nadi ro, Godi ro keba ia se gohodowa moto ididi na, nou ubi nadi ie.⁵Nio abora etio ro ararasoro-dumo kimibiria urubia to, nio keremiro nadi sirio sosoro ie. Nio moto kididi namabu e, nou ro nio to urio to ididi rie. Nedi moto ro abora Godi ro tididi, ina nedi moto ro nato nio Godi ra urubia ra tarena turi urubia to ararasoro rie. Ina noudo ie iedi moto ro nato nio ro kiwoubua namabu urio to amadima-imatowo-ri, idaibo nio keremiro momuo se Godi aboto kiaiwo. Nio ro edi kiaiwo namabu ro namadimi-iaiwo-ri, Godi ro kamade mutu ama-imade-ri. Mabu nedi gabo ro Iesu Keriso ro keba se ta-gosioidiro.

⁶Ina Tarena Buka ato owera ibo owamo, Godi ro ibo, Owera neito ma-dirowidiro-mo, mo ubi turimida nadi posi moto koko se kowotoi aboto, Ierusarema podo ato noti nowotobowa. Etio ro orodoromaidiro-dumo nedi turimida nadi posi ro nato, neio iretuti-ri pua, ina siripo ro iwati-ri pua.

⁷Ina noudo ie nio kimibiria urubia to na-wararasoro-dumo, nedi nadi ro nio sosoro gabo ato na-owamo imese auna ia nakomu e, ina imese meana ia ie. Kaupoti kimibiria tato urubia sapuwo to, owera ibo ie neio aboto, Nedi mea nadi posi ro moto kididi urubia ro ubi tato to na-wasorotiti-mo, nadi posi ia nou se ie, moto nou ro gadiouti.

⁸Ina ibose Godi ipusu owera dubu Aisaia owera nou ro kebase ta-gosioidiro kimibiria tato urubia sapuwo to ibo, Nedi nadi ro urubia sirio nato irohumotiti-dumo.
Neio nadi ato nou ri irohumotiti-dumo, mabu neio ro Godi owera Iesu Keriso sapuwo to durupi to isioidirotiti pua. Neio Godi ro kebase ta-giapoi nedi kirohumo tanaro ro neio aboto ororosioidiro ri.

⁹Kaupoti nio timase ie, nio Godi urubia ie, ina nio nou ro kebase girapoi-ro nou gu urubia to ararasoro ri. Godi nouse ie nio eputa dubu, ina nio nou turi urubia ie. Nio tarena urubia ie, ina nio Godi ro nou ia urubia to giapoi. Nio idaibo sosoro urubia to Godi ro nou ri girapoi, nou nio ro owauti ri nou ro beda meamea tanaro gisioidiro. Nio nou ro giwosuruwo-ro duwoduwo maumo rido, abora nou edi mea ia woroworo ro nato orowomidiro.

¹⁰Keba se nio kaupoti patu to ararapoi pua. Kaupoti nio abora Godi urubia ie. Keba se nio Godi aboudo nirimagare tanaro iaurititi pua. Ina abora ibo pua, nou aboudo auna nirimagare tanaro nio ro ta-gowea-dumo.

Meamea tanaro se gi-isioidiro-ri

¹¹Namuturubi nirimagare babio. Nedi sopu duriomoro ro nio nato na-orowomidiro nio duriomoro pua, nio karaho urubia sosoro orowomidiro, nio suwa duriomoro ato sosoro orowomidiro. Ina noudo ie nio mo ro a-nimagege ubauba ubi tanaro durupi to aise isioidiro mamo. Iedi ubauba ubi tanaro sirio ro boso neio ro iworoho-dioumo nio keremiro aboto.¹²Godi umoro tato urubia abato meamea tanaro se gi-isioidiro-ri. Nio sapuwo to neio ro bagea owera karo ie ibo, ‘Nio ro ubauba tanaro tisioidiro-dumo.’ Kaupoti nio ro edi meamea tanaro ro namadimi-isioidiro-ri, neio ro amadimi-iauri-ri, ina noudo ie Keriso edi tau ato namadi-orowameai-ri Godi neio ro aise amadime-emowabu-ri.

Modobo ie eputa urubia owera kirowidiro

¹³Abera Naramu masiro auna kowaititi sapuwo to, imese urubia masiro mutu na-orowomidiro urubia kiauri sapuwo to, nio ro modobo ie neio owera se kibodoro. Ibose iedi eputa dubu ro ohu ato na-omidiro-die, masiro Sisa,¹⁴ina iedi eputa urubia ro erere duriomoro nou sapuwo to na-emeauri-dumo, neio owera se ba-dibodoro-mo. Neio Roma sabowa gebari edi ohu eputa dubu ro Sisa nou ubi ato irowomidirotiti eputa urubia to, ina nou ro gimerio-ro nio aboto, ubauba tanaro kisioidiro urubia neio ro ubauba wisa simara modobo ato kimio aboto, ibose meamea tanaro etio ro isioidiro-dumo, neio imowabu rie.¹⁵Nio ro modobo ie meamea tanaro kisioidiro. Mabu kimaragoidiro tato urubia ro umoro tato owera karo ie nio sapuwo to. Ina Godi ubi ie meamea tanaro nio ro kisioidiro ato, neio owera karo aboudo nio ro neito kidiobuti ie.¹⁶Kebase nio Satani edi pupuwo maumo ro nato ta-gorowomidiro, kaupoti Iesu edi pupuwo ro neito nio nou ro aise gimapoduti-ro. Ina noudo ie kimapoduti urubia beda mino to korowomidiro ra, nio idaibo mino to ba-dirowomidiro. Modobo ia pua nio idaibo kimaragoidiro kiworohuti, ‘Nimo ubauba aboudo ta-niwagare-ro, nimo ubauba ro abora seni sosoro irobidiro pua.’ Nio dorogora se namadimo-oroho-ri ina ubauba tanaro erere se kisioidiro ato, ubauba ie! Godi edi sowake urubia ro beda sosoro korowomidiro ra, nio idaibo sosoro ba-dirowomidiro.¹⁷Imese urubia mea mino to aise gi-iworohuti-ri. Kimibiria naminiramio nirimagare aise ba-dimati-mo. Godi nio ro aise demododidirotiti-mo. Auna gabamani eputa dubu Sisa nou mea mino to aise gi-oworohuti-ri.

Iesu temeteme beda sosoro giwia nio ibo kiauri modobo ie

¹⁸Wisa tato woko urubia, nio edi eputa urubia ro iauri-dumo, neio ubi woko aise gi-imesioidiro-ri, kimododidiro mutu. Nio mea se beda eputa urubia ro iworohuti-dumo miro tanaro na-iwapotaidiro-dumo, ibose karasaubuti mino to beda eputa urubia ro iworohuti-dumo, wisa meamea tanaro neio aboto atu se aise gi-isioidiro-ri.¹⁹Mabu urubia ro didi poro to temeteme na-iauri-dumo, Godi sapuwo to na-imaragoidiro-dumo, ina nedi temeteme ro nou maumo ato neio koko se na-orowotoi, io idaibo tanaro neito Godi neio ro kamade kowaititi ie.²⁰Kaupoti nio simara ubauba tanaro sapuwo to na-iado-dumo, ina nio koko se na-ororowotoi, nio ro nou sapuwo to mea wisa beda sosoro kowea ra? Kaupoti nio ro ubauba tanaro kisioidiro tato, ina eputa urubia ro didi mabu ato nato na-iado-dumo, nio Godi sosoro gabo ato meana ie, ina nou nio ro kamade kowaititi ie.²¹Nio Godi ro girapoi-ro idaibo temeteme maumo ato orowomidiro ri. Mabu Keriso nio sapuwo to idaibo temeteme ta-giwaubere. Nou ro edi tanaro ro na-gosioidiro nio ro ioudo aratamudiro rie, nou edi mino ro nou obodoro rie.²²Nou ro ata ubauba ata tu to owasomai pua, nou matagoro rido ata karasaubuti owera ata osuruwo pua.

²³Nou urubia ro owera to ubauba na-gowaititi-rimo, neio nou ro wisa imowame pua. Nou ubauba temeteme na-gomia-rimo, nou ro utura pua ibo, ‘Nio mo ro wisa ubauba anama-iwai-ri.’ E e, nou abato kimibiria kawakawa ro gowamo. Ina noudo ie nou keremiro aise gapoi, ina Godi tu ato aise gedea. Mabu Keriso umoro ie ibo Godi nou tuputupu koto kiauri dubu nouse ie.²⁴Keriso nou se ie nimo edi ubauba sirio ro nou ro simara durupi to giratai ota kemowotowa teibo ato. Nou ro nedi tanaro ro nou mabu ato gosioidiro, nimo pamo urubia sosoro irobu rie, ubauba tanaro sirio kisioidiro sapuwo to, ibose nimo edi meamea tanaro kisioidiro aboto orowomidiro rie. Nou durupi ato edi ikoni ro giamo, nio meana neito goi-rimo.²⁵Mabu nio sipisipi sosoro gararaseperai-rimo tima moro ato na-irohotiti-mo, ina nio nou aboto ta-gerewesegere-dumo. Nio edi sipisipi kimowotoi dubu ro nou aboto ta-gorowame-dumo. Ina nou nio keremiro kiauri dubu nouse ie.