Read KATAGARDA ISHIPA 81

KATAGARDA ISHIPA81

Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ka, <<Gititi.>> Vishipa vu Asafa.

Ishipa i ka̱ɗiva̱ ka̱ a̱pa̱m

¹Cananai ishipa i ma̱za̱nga̱ u Ka̱shile katsura ka̱ tsu,orukpoi ka̱u u Ka̱shile ka Yakubu.²Gita̱i ishipa n i kucuwai medelemishipa,waꞋi umolu, waꞋi umolu u gbayin, n ka̱la̱ka̱tsu ka uyoꞋo.³I lika̱ kavana ka̱ ka̱giri o wotoi u savu,i lika̱ kavana ka a makyan ma na wotoi u pecei,i yaꞋan ka̱ɗiva̱ ka.⁴Na lo ili i kutono i ɗa wa aza a Isaraila,wila̱ u ɗa u na wu uta̱i a̱ Ka̱shile ka Yakubu.⁵U neke ta̱ wila̱ u nanlo a̱ ubuta̱ uma a Isaraila,a makyan ma na wu uta̱i u shilika̱i n uma a Masar.M panai ka̱la̱ka̱tsu ka na n saꞋwai kupana ba, a kudansa,⁶<<N cipa̱ka̱ ɗa̱ ta̱ ucanuku wa̱ a̱miki u na wi avangatsu a̱ ɗa̱,mbana ma atakaci n na mi ekiye a̱ ɗa̱ n yaꞋan ta̱ wishi.⁷A makyan ma na yi o kusoꞋo atakaci,i ɗeke mu ta̱, ɗa tana n wawai ɗa̱,ɗa mu ushuki mpa punu eleshu,n kondoi ɗa̱ a̱ mini ma Mariba.Kuvuka⁸Panai, a̱ɗa̱ uma a̱ va̱ aza a Isaraila,n ciga ta̱ i panaka mu.⁹Ka̱ta̱ i cikpa a̱ma̱li ba,ka̱ta̱ kpamu i kuɗa̱ngu a omoci a̱ma̱li ba.¹⁰Mpa ɗa Vuzavaguɗu Ka̱shile ka̱ ɗa̱,vuza na wu utuka̱i ɗa̱ a iɗika i Masar,apukai una̱ u ɗa̱, mi ta̱ a ku lyatangu ɗa̱.

¹¹<<Ama uma a̱ va̱ a panaka mu ba,Isaraila u iwain kutono mu.¹²Adama a nannai,n ka̱sukpa̱ le ta̱ a lyaꞋa kelime n ugbamukaci u le,a yaꞋan ili i na i a kufuɗa kuyaꞋan.¹³Uma a̱ va̱ i baci a kupanaka mu,ishi baci aza a Isaraila o kutono uye u va̱,¹⁴mi ishi ta̱ o kuloko irala i le gogoꞋo lon lyaꞋa aza a na a iwai le ra̱ka̱.¹⁵Aza a na a iwai Vuzavaguɗu,i ta̱ a̱ ku kuɗa̱ngu e kelime ka̱ ni adama o wovon,atakaci e le ko wannai ɗa.¹⁶Ama mi ta̱ a ku lyaꞋatangu ɗa̱ n alkama i singai,ka̱ta̱ n zuwa ɗa̱ i cuwa̱ n ishigi i na a jaꞋwain a katali.>>