Read KATAGARDA ISHIPA 66

KATAGARDA ISHIPA66

Vishipa vu kucikpa adama a kasingai ka̱ Ka̱shile

Kadanshi a kubana u vuza vu kelime vi ishipa: Vishipa. Ishipa.

¹A̱ɗa̱ aduniyan ra̱ka̱,yaꞋin yoroli i ma̱za̱nga̱ u Ka̱shile.²Cananai ukuna u tsugbayin tsu kula ku ni,yaꞋan ucikpi u ni u ciya̱ tsugbayin.³Danai Ka̱shile,<<Yiɗa̱i a ku gisanku n ili mereve i na vi a kuyaꞋansa.Adama a utsura ugbayin u nu,irala i nu yi ta̱ a̱ ku kuɗa̱ngu ku wu adama o wovon.⁴Uma aduniyan dem a̱ kuɗa̱nku wu ta̱,a ku canana ka wu ishipa,a ku canana ishipa i kucikpa kula ku nu.>> Kuvuka⁵Ta̱wa̱i ye ene ili i na Ka̱shile ka yaꞋin,ili i mereve i na u yaꞋin adama a uma.⁶U bonokoi mala mokpoi iɗika i ɗekpu,uma a pasai kuyene ka n e ene,ta ɗe tsu kuyaꞋan ma̱za̱nga̱ u Ka̱shile.⁷Wi ta̱ a kulyaꞋa tsugono n utsura u ni ko wannai,a̱shi a̱ ni i ta̱ a ku inda uduniyan.ka̱ta̱ aza a ugbamiwasuvu ene i ta̱ n tsugbayin ba. Kuvuka⁸Cikpai Ka̱shile ka̱ tsu, a̱ɗa̱ uduniyan dem,cikpai ni n a̱la̱ka̱tsu ka̱u.⁹A̱yi ɗa u tsu foɓo wuma u tsu,u ka̱sukpa̱ ene a̱ tsu e derece ba.¹⁰Adama a na avu Ka̱shile, vu kondo tsu ta̱,vu luwa̱ tsu ta̱ tsa azurufa a na a̱ luwa̱i akina.¹¹Vu tuka̱ tsu ta̱ a maza.Vu zuwaka tsu ta̱ ucanuku wa̱ a̱miki a avangatsu a̱ tsu.¹²Vu zuwai uma a dasai tsu,tsu tonoi e mere ma akina m mini,ama gogo na vu utuka̱ tsu ta̱,vu tuka̱i tsu a̱ ubuta̱ wu ida̱shi i ba̱ri.¹³Mi ta̱ a̱ kuta̱wa̱ a kpaꞋa ku nu,n kuneꞋe ku kusongu,ka̱ta̱ n neke ili i na n kucinai,¹⁴n danai mi ta̱ e kuneke wu,a makyan ma na mi o kusoꞋo atakaci.¹⁵Mi ta̱ e ku neke wu kuneꞋe ku kusongu ku nnama mi ikyamba,n ili i ma̱gula̱ i kuneꞋe ku ka̱giri,mi ta̱ a kulyuka obomburon n nga̱ji. Kuvuka¹⁶Ta̱wa̱i i pana, a̱ɗa̱ na yi a kupana wovon u Ka̱shile ra̱ka̱,yaꞋan n dana ɗa̱ ili i na u yaꞋankai mu.¹⁷N banka ta̱ m ma̱shi ma̱ va̱ wa̱ nu,n kelentsu ka̱ va̱ n neke wu ta̱ tsugbayin.¹⁸Ishi baci n zuwa ta̱ unushi a̱ ka̱ɗu ka̱ va̱,Vuzavaguɗu wishi a kupana ka mu ba,¹⁹ama mayun ɗa Ka̱shile ka panakai mu,ɗa kpamu u panai avasa a̱ va̱.²⁰Una̱singai u Ka̱shile,vuza na u iwain avasa a̱ va̱ ba,ko u kpa̱ɗa̱i kuyotsongu mu ucigi u ni u na tsu sabaꞋa ba.