KATAGARDA ISHIPA25
Avasa a̱ kula̱nsa̱ ucunukpi wu unushin we eri
Vishipa vu Dawuda.
1Vuzavaguɗu, n neke ta̱ wuma u va̱ wa̱ nu.2Ka̱shile ka̱ va̱, wa̱ a̱ nu u ɗa n zuwai ka̱ɗu ka̱ va̱,ka̱ta̱ vu ka̱sukpa̱ mu m pana wono ba,ka̱ta̱ vu ka̱sukpa̱ irala i va̱ i yaꞋanka mu kindi ku kugoyi ba.3Aza a na a zuwai a̱ɗu e le wa̱ a̱ nu,i kupana wono ba,ama yaꞋan aza a unambi wu usuɓi a pana wono.4Vuzavaguɗu vu yotsongu mu uye u nu,vu piꞋisaka mu ukuna u nu.5Tono nu mpa tsu na n kuyaꞋan kamayun,ka̱ta̱ vu piꞋisaka mu,adama a na avu ɗa Ka̱shile kishi ka̱ va̱,makyan dem n tsu zuwa ta̱ ka̱ɗu wa̱ a̱ nu.6Vuzavaguɗu, ciɓa n kasingai ka̱ nu,n ucigi u nu u na u tsu sabaꞋa ba,u na vu yotsongi ali n ayin a cau ɗe.7Cinukpa n unushi wu ucigi u ka̱ɗu u va̱,n unushi u na n yaꞋin a ayin a na mi ishi kolobo,adama a ucigi u nu una u tsu sabaꞋa ba n kasingai ka̱ nu,vu ciɓa nu mpa Vuzavaguɗu.8Vuzavaguɗu vuza vu usuɓi ɗa, n kasingai kpamu,u tsu yotsongu ta̱ aza a unushi uye u na o kutono.9U tsu tono ta̱ n aza na o ogoyoi ka̱ci ke le, a ukuna u mejege,wi ta̱ a kupiꞋisaka le tsu na o kutono yi,10Uye u Vuzavaguɗu ra̱ka̱,ucigi u ɗa u na u tsu sabaꞋa ba n usuɓi,wa aza a na i o kutono uzuwakpani u ni n wila̱ u ni.11Vuzavaguɗu, shatangu uzuwakpani u nu,vu cinukpaka mu unushi u va̱,adama a na wi ta̱ n a̱bunda̱i.12Aza a na i a kupana wovon u Vuzavaguɗu,wi ta̱ o kuyotsongu le uye u na o kutono.13I ta̱ a kulyaꞋa kelime makyan dem,ntsukaya n e le mi ta̱ a kulyaꞋa uka̱ni wi iɗika ya.14Vuzavaguɗu wu ushuku ta̱ n aza na i a kupana wovon u ni,u tsu zuwa le ta̱ e yeve uzuwakpani u ni.15Makyan dem a̱shi a̱ va̱ i ta̱ a̱ ubuta̱ u Vuzavaguɗu a̱ kula̱nsa̱ uɓa̱nki,adama a na a̱yi ɗa koci u ku ere mu a̱ ubuta̱ u gbani-gbani.16Vadalukpa uɓon u va̱ Vuzavaguɗu,vu yaꞋanka mu kasingai,adama a na mi n vuza ba,kpamu ko utsura.17Una̱mgbuka̱tsuma̱ u ka̱ɗu ka̱ va̱ o doku ta̱ a̱bunda̱i,wawa mu a̱ ka̱tsuma̱ ka atakaci a̱ va̱.18Zuwaka n una̱mgbuka̱tsuma̱ u va̱,vu ene atakaci a̱ va̱,ka̱ta̱ vu cinukpaka mu unushi u va̱.19La̱na̱ ka̱bunda̱i ka irala i va̱,la̱na̱ tsu na o kovoi mu.20Ere mu ka̱ta̱ vu wawa mu,ka̱ta̱ vu ka̱sukpa̱ m pana wono ba,adama a na wa̱ a̱ nu u ɗa n ta̱wa̱i kusheɗeku.21YaꞋan kasingai n kamayun ke ere mu,adama a na n zuwa ta̱ ka̱ɗu ka̱ va̱ wa̱ a̱ nu.22Ka̱shile, shiba̱ aza a Isaraila,a̱ ka̱tsuma̱ ka atakaci e le.