1Maku ma̱va̱, ka̱ta̱ vu cinukpa n kuyotsongusu kuva ba̱.ama ka̱sukpa̱ ka̱ɗu ka̱ nu ke reme wila̱ u va̱.2Ku yotsongusu ku va̱ ki ta̱ a ku neke wu ma̱ta̱na̱ n wuma wu ugaɗi.3Ka̱ta̱ vu ushuku vu ka̱sukpa̱ kamayun n kasingai ba, shiya le a̱ kuɗeku ku nu,ɗana le kpamu a̱ ka̱ɗu ka̱ nu.4Ɗa baci vu yaꞋin nanai,Ka̱shile ki ta a kuyaꞋan ma̱za̱nga̱ n avu.Vi ta̱ a̱ kuciya̱ ulyaꞋi a̱ ka̱tsuma̱ kuyongo kuna vi a kuyaꞋan n uma.5Ushuku n Vuzavaguɗu n ka̱ɗu ka̱ nu dem.Ka̱ta̱ vu piꞋisa a kuyeve ku nu ba.6Ciɓa n Vuzavaguɗu a ili i na vi a kuyaꞋan dem,a̱yi tana wi ta̱ a ku yotsongu wu uye u singai.7Ka̱ta̱ vu ɗika ka̱cika̱nu vuza vu cicoꞋo ɗa ba,pana wovon u Vuzavaguɗuvu ka̱sukpa̱ ka gbani-gbani.8Ɗa baci vu yaꞋan nanai, wi ta̱ o kokpo an a̱guma̱ a singai,a na o ku potsotongu untsu a̱ nu ka̱ta̱ a̱ ɓa̱nka̱ mɓa̱la̱ n nu.9Neke Ka̱shile tsugbayin ni na vi n i ɗa,n umaci wi ili yu ugiti i kashina i nu ra̱ka̱.10Ɗa baci vu yaꞋan nanai, mpon nu mi ta̱ a kushana n ili i kulyaꞋa.Vi ta̱ mini mi inabi ma̱ a̱bunda̱i, ali vu kpa̱ɗa̱ kuciya̱ ubuta̱ una va̱ kutsuwa̱n maꞋan ra̱ka̱.11Maku ma̱va̱, ka̱ta̱ vu goyo udansuki u Vuzavaguɗu ba,ka̱ta̱ kpamu vu iwan u ɓarangi u ba.12Adama a na Vuzavaguɗu u tsu ɓarangu ta̱ aza ana u cigai,u teku tsuna kesheku ka tsu ɓarangu maku ma na u cigai.13Vuza ma̱za̱nga̱ ɗa vuza na u ciya̱i cicoꞋo,n vuza na kpamu u ciya̱i kuyeve.14Adama ana kodokpotsu ko cicoꞋo ka̱ ni ka laꞋa ta̱ ka azurufa,ugaꞋin u ni u laꞋa ta̱ kazanariya.15U laꞋa ta̱ katali ku ugaꞋin ikebe, babu ili i na a ku gisangu n a̱yi.16Ugboji u tsu doku ta̱ wuma wu ugaɗi,tsu udukuyan n tsugbayin.17Uye uni uye wu uyoꞋo uɗa, ra̱ka̱ vu le tana u ma̱ta̱na̱ uɗa.18Aza ana i n ugboji,ita̱ m ma̱za̱nga̱,cicoꞋo ci ta̱ a kuneke le wuma.19Vuzavaguɗu u yaꞋin aduniya n cicoꞋo ci ni,n kuyeve ku ni kpamu u yaꞋin gaɗi.20N kuyeve kuni ɗa nyeneke mu uga̱vi n ɓa̱yuwa̱i,eleshu kpamu o yoꞋo mini i ɗika.21Maku ma̱va̱, reme ugboji u nu n kuyeve ku nu.ka̱ta̱ vu ka̱sukpa̱ le a̱ ka̱sukpa̱ wu ba.22I ta̱ a ku okpo wu wuma,n ugaꞋin tsu ucanuku wu ili i singai wa̱ nu.23Ta va kuyaꞋan nwalu a uye u nu nannai m ma̱ta̱na̱vi tana a̱ kuta̱ɗa̱tsa̱ ba.24Ɗa baci vu vaki, vi a kupana wovon ba,ɗa baci vu vaki alavu a̱ nu i ta̱ o ku yokpo.25Ka̱ta̱ vu pana wovon wa atakaci a na a̱ kuta̱wa̱ wu makyan me te ba.ko kpamu atakaci a na a kuciya̱ aza gbani-gbani tsu wunla̱ ba.26Vuzavaguɗu wi ta̱ a ku ere wu,wi a ku ka̱sukpa̱ wu vu a za a maza ba.27YaꞋanka aza ana a cigai u ba̱nki kasingai,a makyan mana baci vi a kufuɗa ra̱ku.28Ka̱ta̱ vu dana vutoku nu,<<Wala biꞋi sai makpaꞋa vu bono,ka̱ta̱ n neke wu,>> wana ɗa tana vi ni i ɗa lo.29Ka̱ta̱ vu sheshe ke vutoku vu nu kagbanigbani ba,vuza̱ nu na yi ida̱shi i singai n koɓolo.30Ka̱ta̱ vu yaꞋan kanana n vuza babu u kuna ba,babu tana u nusaka wu.31Ka̱ta̱ vu yaꞋan cisheꞋe n aza kuyaꞋan ka gbani-gbani ba,ko vu zagba uye u yoku u le ba.32Adama ana Vuzavaguɗu u iwan ta̱ aza ana a kuyaꞋan ka gbani-gbani,ama u ci ciga ta̱ aza a kamayun a̱ ka̱ɗu.33Una̱wuya u Ka̱shile wita̱ a kpaꞋa ku vuza gbani-gbani,ama u tsu zuwaka ta̱ kpaꞋa a ka za a usuɓi una̱singai.34U tsu goyo ta̱ aza izoshi i kugoyi,ama u ci neke ta̱ kasingai wa aza uremi u kaci.35Vuza vu cicoꞋo u tsu ciya̱ ta̱ tsugbayin,ama kalau ki ta̱ o kusoꞋo wono.