阅读Katagarda ka Ansa 24

Katagarda ka Ansa24

¹Ka̱ta̱ vu yaꞋanka uma a kavama tsurala ba,ko vu yaꞋan mali ma kuyongo n a̱ le ba,²adama na ka̱ɗu ke le, ka ci sheshe i yoku ba, sai vishili,una̱u u le kpamu sai kavama.³N ugboji u ɗa a maꞋin kpaꞋa,n ubuta̱ u kuyeve u ɗa kpamu ɗa kushamgba yi,⁴n ubuta̱ u kuyeve u ɗa a shatangi unun ucanuku u singai ra̱ka̱ n uciyi.⁵Vuza vu ugboji u tsu yaꞋan ta̱ n utsura,keyevi kpamu ka tsu lyaꞋa ta̱ kelime n kudoku n utsura,⁶adama na ubuta̱ wu ugboji u uma u ɗa a tsuyaꞋan kuvon,kpamu ubuta̱ wa odoki u uma u ɗa a ci ciya̱ u lyaꞋi.⁷Ugboji wi ta̱ n atakaci a kuyeve ubuta̱ u kalau,a u ubuta̱ u kadanshi uma a tsu fuɗa a dansa u kuna u ma̱riki ba.⁸Ya ba dem na u tsu sheshe kuyaꞋan ka gbani-gbani,a ku ɗekei ta̱, mogono ma vishili.⁹Kusheshe kuyaꞋan ka gbani-gbani, u nushi u ɗa,vuza kugoyi kpamu ili yu unata i ɗa ubuta̱ u uma.¹⁰Ɗa baci vu oꞋoi a kanna ka atakaci,mayun ɗa an vi nu utsura ba.¹¹Isa aza na i a kurono a ku banka ubuta̱ u munuka,Geshe aza na i a katambalusa a ku bana u kpiꞋisa̱.¹²Ɗa baci vu danai, <<Mpa n yeve ili nampa ya ba,adama nanai mpa, ili i bura mu ba.>> Ciɓai an Ka̱shile ka yevei i na ci yaꞋan, kpamu u yeve ta̱ i na ci a kusheshe,ashe wa ku tsupa ka tsu derere vi na tsuyaꞋan va ba?¹³Maku ma̱va̱, lyaꞋa ishigi, adama i ɗa yi ta̱ n ugain.kpamu kuɗa̱kpa̱ ku kabashi ki ishigi ko tsu yokpo ta̱ una̱.¹⁴Yeve an ta ugboji wi a̱ ka̱ɗu ka̱ nu nanai,ɗa ba ci vu ciya̱i u ɗa, vi ta̱ a kuyongo n a̱pa̱ kelime,kpamu a̱pa̱ a̱ nu i a ku puwa̱nka̱ ba.¹⁵Ka̱ta̱ vu vaꞋanku a kavaꞋawan tsu vuma gbanigbani, a kpaꞋa ku vuza vu usuɓi,ka̱ta̱ vu la̱nga̱sa̱ kpaꞋa ku vuza vu usuɓi ba,¹⁶adama na vuza vu usuɓi u su yikpa̱ ta̱ ku cindere ka̱ta̱ u ɗa̱nga̱ kpamu,ama u na̱mgbi u te u tsuna ta̱ aza gbanigbani.¹⁷Ka̱ta̱ vu yaꞋan ma̱za̱nga̱, adama ili gbanigbani i na i ciya̱i vu rala nu ba,kpamu ka̱ta̱ vu yaꞋan ma̱za̱nga̱ a ayin ana u fa̱ta̱tsa̱i u yikpa̱i ba,¹⁸talo, Vuzavaguɗu wa kene, ka̱ta̱ u na̱mgba̱ ka̱tsuma̱,ka̱ta̱ kucikpa u vadalukpa wupa u ni.¹⁹Ka̱ta̱ vu takacika ka̱cika̱nu adama vuza gbanigbani ba,kpamu ka̱ta̱ vu yaꞋan tsura tsa aza gbanigbani ba,²⁰adama na vuma gbanigbani wi n a̱pa̱m kelime ba,kutashi ku vuza gbanigbani ki ta̱ a ku kima̱.²¹Maku ma̱ va̱ pana wovon u Ka̱shile n mogono,kpamu ka̱ta̱ vu gbaɓa ka̱cika̱nu n a̱ka̱ra̱shi ba,²²adama ana kawuya ki ta̱ a̱ ku ɗa̱nga̱ n moloko we le,ya yi u yevei uteku u munuka ma na dem vu le a ku tuka̱?

Kadanshi ka a̱bunda̱i ka aza ugboji

²³Nava feu kadanshi ka aza ugboji ka.²⁴Ya ba dem vu na baci de dem u danai vuza gbanigbani, <<Avu vu nusa ba,>>uma i ta̱ a kuyaꞋan kai una̱, ka̱ta̱ uduniya kpamu e ne unata u ni,²⁵Ama aza na de dem u tsu dansuka vuma gbanigbani wita̱ a kuciya̱ una̱u usingai,una̱u usingai wa a̱bunda̱i wi ta̱ a ku cipa̱ wa̱ le.²⁶Vuza dem u danshi kamayunu yotsongu ta̱ cija̱Ꞌa̱ ci singai.²⁷Lapula biꞋi ulinga u nu ra̱ka̱ pulai,kotso ku lapula ili ya ashina i nu ra̱ka̱,ka̱ta̱ yeve a ukocishi vu maꞋa kpaꞋa ku nu.²⁸Ka̱ta̱ vu neke ngaꞋan adama vu toku nu babu ili ba,ka̱ta̱ vu dansa a uwa ba.²⁹Ka̱ta̱ vu dana <<Mpa sai n tsupa u teku tsu na u yaꞋan kai mu ba,n ku tsupa ta̱ i na u yaꞋankai mu.>>³⁰N wala ta̱ n kashina ka korogo,n kashina ka vuza vu babu ugboji,³¹ɗa menei ka ka shana ta̱ na a wana,i ɗika ya kpamu i shanai n mita̱,kpamu nshilya n ni n ɓosoi a li iɗika.³²A na menei, ɗa n sheshei u kuna wa,ɗa n ciya̱i odoki a nampa.³³Ɗa baci alavu n agbaɗiki a laꞋi nu gan,ayin kenu, vo oɓongu ekiye nu adama na vu vuka,³⁴nanai ɗa unambi wa kufa̱ba̱na̱ wu i li, an vuza ma̱ga̱la̱ka̱,ka̱ta̱ kpamu u ɗa u ka̱na̱ wu an koboki.