1Ansa a Sulemanu a ɗa na,maku mu ugboji ma tsu zuwa ta̱ Dada ni ma̱za̱nga̱,ama kalau ka maku, ili yu una̱mgbi u ka̱tsuma̱ i ɗa wa a̱na̱ku a̱ ni.2Uciyi una o ɓolongi a uye u gbanigbani, u tsu neke i li ba,ama ida̱shi yu usuɓi u tsu utuka̱ ta̱ vuma ukpa̱.3Vuzavaguɗu wi a̱ kuka̱sukpa̱ vuza vu usuɓi a̱ ka̱tsuma̱ ka kambulu baama u tsu sa̱nka̱ ta̱ kusheshe ka aza a gbani-gbani ku shana.4Tsurogo tsu tsu zuwa ta̱ vuma unambi,ama kuyaꞋan ku ulinga ku tsu tuka̱ ta̱ n uciyi.5A̱yi na u ɓolongi ili i kashina n lyushi a̱yi ɗa vuza vu ugboji.ama a̱yi na u latai a ayin a vikyaꞋa a̱yi ɗa vuza na u tsu tuka̱ n wono.6Una̱singai wita̱ a kaci ka vuza vu usuɓi,ama u vuza gbani-gbani u tsu sokongu ta̱ u kuna u vishili u ni.7Kuciɓasa ku vuza vu usuɓi una̱singai u ɗa,ama kula ku vuza gbani-gbani ki i ta̱ a̱ ku na̱mgba̱.8Vuza vu ugboji, a̱yi ɗa u tsu ushuku n odoki,ama vuza kadanshi ka tsulau wi ta̱ a̱ ku na̱mgba̱.9Vuza na dem wi an nwalu a̱ ka̱tsuma̱ ku usuɓi, utsu yaꞋan ta̱ nwalu n ni m ma̱ta̱na̱.ama vuza vu unambi usuɓi a tsu yeve yi ta̱.10Vuza na u tsu reme ka mayun, u tsu tuka̱ ta̱ n atakaci,ama vuza na udanshi kamayun utsu tuka̱ ta̱ m ma̱ta̱na̱11Kadanshi ka vuza vu usuɓi ka̱shi ka̱ mini ma wuma maꞋa,ama kadanshi ka vuza gbani-gbani ka tsu sokongu ta̱ u kuna u vishili u ni.12Tsurala tsu zuwa ta̱ vishili,ama ucigi u tsu cinukpa ta̱ nu unushi ra̱ka̱.13Uma ugboji a tsu dansa ta̱ ka̱ ma̱riki,ama uma a gbanigbani u gaꞋan ta̱ atakaci ka le.14Vuza vu ugboji u tsu ɓolongu ta̱ ku yeve,ama una̱ u kalau u tsu tuka̱ ta̱ nu u kpa̱.15Udukuyan, mashilya maꞋa ma vuza vu uciyi,ama unambi munuka maꞋa ma vu za vu unambi.16Katsupu ka kuyaꞋan kasingai kaɗa wuma,ama katsupu ka vuza vu unushi ka ɗa atakaci.17A̱yi vuzana u tsu ushuku n ugbari n odoki, wi ta̱ a ku ciya̱ wuma,ama a̱ yi vuzana u tsu inwan ugbari wi ta̱ a̱ kupuwa̱nka̱.18Vuza na dem u tsu sokongu tsurala, kayaꞋin ka uwa kaꞋa,vuzana kpamu dem u tsu la̱nga̱sa̱ ula uma kalau kaꞋa.19Kadanshi ka yimkpa baci a̱ bunda̱i ɗa vuma u tsu ciya̱ unushi,ama vuza vu ugboji ɗa baci vi, sai vu paɗa bini.20Kadanshi ka vuza vu usuɓi, ki ta̱ an azurufa ana a zagbai,ama ka̱ɗu ka vuza gbani-gbani ki nu ugaꞋin ba ko kenu.21Kadanshi vuza vu usuɓi ku tsu lyaꞋatangu uma n a̱bunda̱i,ama kalau ka tsu kuwa̱ ta̱ adama unambi wu usuɓi.22Una̱singai u Vuzavaguɗu u tsu tuka̱ ta̱ n uciyi,ama ka̱bunda̱i ku ulinga ko tsu doku uciyi ba.23U kalau, kuyaꞋan ku ka gbani-gbani, ili yu ugulani u ɗai,ama u vuza kuyeve, ugboji u tsu yokpo ta̱.24I na vu za gbani-gbani wi o wovon, i ɗa i kuciya̱iama i na vuza vu usuɓi u cigai i ɗaɗa a ku ciya̱.25Ayin a na baci kabatalikpau ka gbanigbani ka lazai, i o kudoku ku ene aza a gbanigbani ba,ama vuza usuɓi u tsu shamgba ta̱ n utsura ali a kubana u teku.26Ka̱ta̱ vu zuwa korogo ka yaꞋanka wu ili ba,ta lo wa ko okpo wu tsu mini ma kalam a anga ko kpamu tsu ka̱nga̱ a̱ a̱shi a̱ nu.27Wovon u Ka̱shile u tsu doku ta̱ wuma wu ugaɗi,ama wuma u vuza gbani-gbani wi ta̱ gbati.28A̱pa̱ a vuza vu usuɓi ma̱za̱nga̱ maꞋa,ama a̱pa̱ aza vuza gbani-gbani a̱ tsu tuka̱ n ili ba.29Uye u Vuzavaguɗu mashilya ma ku ere maꞋa u vuza vu usuɓi,ama ili munuka i ɗa ubuta̱ wa aza kuyaꞋan ka gbani-gbani.30Aza usuɓi i ta̱ a kuciya̱ ukanji ayin tutu,ama a̱ ku ka̱sukpa̱ aza gbani-gbani iɗika ya ba.31Aza usuɓi a tsu dansa ta̱ ugboji,ama kelentsu kana ka tsu dansa a uwa ki ta̱ a kuyaꞋan ugbati.32Kelentsu ka vuza vu usuɓi ka yeve ta̱ i na i gaꞋin,ama una̱ u vuza gbani-gbani, wi ni yoku ba sai kadanshi ka gbani-gbani koci.
expand_more
The books couldn't be loaded. Check your connection and try again.