Read Katagarda ka Ansa 1

Katagarda ka Ansa1

Ugiti u kuyeve

¹Ansa a Sulemanu kolobo ka Dawuda mogono mi Isaraila.²Na ɗa ansa a na a̱ kuɓa̱nka̱ wu,vu yeve cicoꞋo n odoki a singai,ka̱ta̱ e yeve kudansa i na yi usokongi³adama a na a̱ ciya̱,kuyotsongusu ku cicoꞋo,n usuɓi, n afada a mayun,n ili i na yi mayin,⁴a zuwa vuza vu unambi u kuyeve,wo okpo n kuyeve,o yotsongusu a̱ɗa̱nga̱ni tsu naa kuyaꞋan kusheshe ku singai.⁵YaꞋan vuza vu cicoꞋo u pana ka̱ta̱ u doku ciya̱ kuyeve,vuza vu uyevi kpamuu ciya̱ uɓa̱nki⁶adama a na e yeve i na ansa i a kadanshi,kadanshi ka aza o cicoꞋo n iteꞋe i le.⁷Wovon u Vuzavaguɗu u ɗaɗa ugiti u kuyeve,ama kalau ka goyo ta̱ cicoꞋo n odoki.

Odoki u ka̱ɗa̱nga̱ni

⁸Pana, Maku ma̱va̱, pana kadanshi ke esheku a̱ nu,kpamu ka̱ta̱ vu ka̱sukpa̱ odoki a̱na̱ku a̱ nu ba,⁹adama a na kuyotsongu ku leki ta̱ o ku doku wu tsugbayin,ka̱ta̱ okpo ili kuɗeku i singai a kuɗeku ku nu.¹⁰Maku ma̱va̱, ɗa baci aza a unushi a kparasai nu,ka̱ta̱ vu ushuku ba.¹¹Ɗa baci a danai, <<Ta̱wa̱ tsu gbaɓa kaci,tsu una vuma yoku,tsu bana tsu bopo tsu una aza a babu unushi,¹²YaꞋan tsu soɗongu le ra̱ka̱-ra̱ka̱ tsu kasaun,tsa aza a na a̱ gida̱la̱i a kubana e kpenle.¹³ka̱ta̱ ci ciya̱ uciyi n a̱bunda̱i,ci shatangu iꞋuwa i tsu n ucanuku u gbani,¹⁴ta̱wa̱ vu gbaɓa ka̱ci n a̱tsu,ka̱ta̱ tsu pece ili i na tsu bokoi.>>¹⁵Maku ma̱va̱, ka̱ta̱ vu gbaɓa ka̱ci ka̱ nu n icuꞋu i uma a nanlo ba,yaꞋan daꞋangi n ele,¹⁶adama a na i ta̱ m moloko a̱ ubuta̱ u kuyaꞋan ka gbani-gbani,i ta̱ ufoɓi ayin tutu adama a munuka.¹⁷Gbani ɗa azuku mazaa̱ a̱shi a manunu ma na a cigai kuka̱na̱.¹⁸ama icuꞋu i uma a nanlo,ka̱ci ke le kaꞋa a tsu zuwaka maza.e ci reme ili ba, wuma u le ɗa koci.¹⁹Ta ukocishi wu uyewa aza a̱ kutsa̱n ki ikebe i nannai,kutsa̱n ka ki ta̱ o ku okpo ma̱giti mu ukpa̱ me le.Ci coꞋo ci ta̱ e meɗevile.

Kadanshi a ukuna u ku iwan cicoꞋo

²⁰Panai, cicoꞋo ci ta̱ e meɗevile a uye n kuden,²¹ci ta̱ e meɗevile n utsura a̱ utsutsu i likuci, n ubuta̱ u na uma dem a tsu yaꞋan oɓolo.²²<<Ali wannai ɗa, a̱ɗa̱ aza a na yi n ugboji ba,yi ta̱ o kuyongo nannai ko ugboji?Ali wanai ɗai, a̱ɗa̱ aza o kugoyi,yi ta̱ a kupana uyoꞋo wu ulami u na yi a kuyaꞋan,a̱ɗa̱ a lau i iwain kuyeve?²³Ishi baci i zuwa atsuvu i pana uɓarangi u va̱.Mi ishi a̱ ku tsuwa̱nka̱ ɗa̱ n ayinviki a̱ va̱,ka̱ta̱ n zuwa ɗa̱ i yeve kadanshi ka̱ va̱.²⁴Adama a na n ɗeke ta̱, ɗa̱ i iwain kupana,n ɗengusa̱i ekiye a̱ va̱ wa̱ a̱ ɗa̱ ama ko vuza u zuwaka ba,²⁵I iwain kutono odoki a̱ va̱ ra̱ka̱,kpamu i ciga uɓarangi ɗa̱ u va̱ ba.²⁶Mi ta̱ o ku zoꞋoso ɗa̱,a makyan ma atakaci,mi ta̱ a kuyaꞋanka ɗa̱ ulami,a makyan ma na ma̱dukpa̱ ma̱ ta̱wa̱i ɗa̱,²⁷Ayin a na baci atakaci a̱ ta̱wa̱i ɗa̱tsu kabatalikpau,a ayin a na yi o kusoꞋo atakaci n awuya.²⁸Ka̱ta̱ i ɗeke mu,ama mi a̱ ku ushuku ɗa̱ ba.yi ta̱ a̱ ku la̱nsa̱ mu a̱ ubuta̱ dem,ama yi a̱ kuciya̱ mu ba.²⁹Adama a na i iwan ta̱ kuyeve ugaꞋin u kuyeve ba,kpamu i zagba i pana wovon u Vuzavaguɗu ba.³⁰Yi ushuku n odoki a̱ va̱ ba,i iwain uɓarangi u va̱.³¹Adama a nannai yi ta̱ a̱ kuciya̱ katsupu ku ulinga u ɗa̱,yi ta̱ a̱ kucuwa̱ n una̱mgbuka̱tsuma̱ u ɗa̱.³²Aza a unambi u kuyeve a tsu kuwa̱ ta̱, adama a na a̱ ushuku n cicoꞋo ba,Alau tamkpamu a̱ tsu kuwa̱ ta̱ adama a na a zuwaka ba.³³Ama yaba dem vu na baci u panakai mu,wi ta̱ a̱ kuda̱sa̱ngu m ma̱ta̱na̱.Ko ili tana yi a̱ kuciya̱ yi ba,babu kpamu ili i na i kuneke yi wovon.>>