Read Azafada 5

Azafada5

Vishipa vu Debora n Baraku

¹A kanna ka nanlo ka, ɗa Debora koɓolo m Baraku kolobo ka Abinowam a yaꞋin vishipa vu nampa va.

²<<Ucikpi u mayun, u Vuzavaguɗu.Ana aza e kelime a Isaraila a̱ ushuki isa tsugbayin ci le a̱ ka̱tsuma̱ ki Isaraila,ɗa kpamu uma e nekei ka̱ci ke le n ucigi wa̱ a̱ɗu e le.

³<<Zuwai atsuvu mayin a̱ɗa̱ ngono, panai a̱ɗa̱ aza e kelime.Vuzavaguɗu ɗa n kuyaꞋanka vishipa,Vuzavaguɗu Ka̱shile ki Isaraila kaꞋa n kuyaꞋanka tsuwaꞋi.

⁴<<Vuzavaguɗu, a ayin a na vu ka̱sukpa̱i uɓon wu nsansa n Siyaru,ana vu uta̱i ɗe a iɗika i Edom,iɗika i gba̱ɗa̱ ta̱,ɗa o yoꞋi mini,mayun, eleshu o yoꞋo ta̱ mini.⁵Nsansa m gba̱ɗa̱i a̱ a̱shi a Vuzavaguɗu,ali n kusan ku Sinai e kelime ka Vuzavaguɗu Ka̱shile ki Isaraila.

⁶<<A ayin o tsugono tsu Shamagaru kolobo ka Anatu,a tsumani tsu Jali, uma a̱ ka̱sukpa̱ ta̱ kutono uye u gbayin,aza a nwalu o bono ta̱ o kutono uye wa akamba.⁷Likuci ya aza a Isaraila yo okpoi agali,uma a buwa punu ba,ali sai a na mpa Debora mo okpoi vuza kelime vi le. Ɗa mo okpoi an tsu a̱na̱ku a uma a Isaraila.⁸Ana aza a Isaraila a ka̱sukpa̱i Vuzavaguɗu ɗa o tonoi a̱ma̱li o yoku,ɗa kuvon ku ɗa̱nga̱i a̱ utsutsu u likuci.Babu vuza na a cinai m ma̱ra̱ga̱ ko masara a̱ ka̱tsuma̱ ka uma a̱kpa̱n amangere (40,000) wa aza a Isaraila a.⁹Ka̱ɗu ka̱ va̱ ki ta̱ a̱ ubuta̱ wa aza e kelime o kuvon a Isaraila,n aza a na e nekei ka̱ci ke le n ka̱ɗu ke te.Ci cikpai Vuzavaguɗu.

¹⁰<<A̱ɗa̱ ra̱ka̱ i neke arabali,a̱ɗa̱ vu na i tsu kumba njaki ma̱ria̱ɗa̱ na yi ida̱shi ajiba a ikebe,n a̱ɗa̱ na ko i iwan i ciga i wala e ene.¹¹Zuwai atsuvu,panai a̱la̱ka̱tsu aza a ishipa a̱ una̱ wa ayinva a̱ mini,a kadanshi uteku tsu na Vuzavaguɗu u ciya̱i ulyaꞋi,n ulyaꞋi wa aza a Isaraila.Ɗa uma a̱ Ka̱shile a̱ gida̱la̱i,a kubana a̱ utsutsu u likuci i le,ɗa a danai,¹²<Ɗa̱nga̱, ɗa̱nga̱, Debora.Ɗa̱nga̱, vu yaꞋan vishipa.Ɗa̱nga̱ avu Baraku vu reme irala i tsu,avu kolobo ka Abinowam.>¹³Yeve ɗa uma a usuɓi a na a buwai,a̱ gida̱la̱i ɗa a̱ cipa̱i a̱ ubuta̱ wa aza a̱ gba̱ra̱-gba̱ra̱,uma a Vuzavaguɗu,a̱ ta̱wa̱i adama a na a̱ shilika̱ n irala i le.¹⁴Aza o yoku uta̱i a kumaci ka aza a Ifirayimu ele na uta̱i e kefeku ka Ameleki,koɓolo n kumaci ku Bayami n uma a̱ ni.A̱ likuci i Makiri kpamu ɗa aza e kelime o osoji a̱ uta̱i ɗa a̱ ta̱wa̱i,ɗa kpamu ovonshi a gbagbaꞋin a̱ uta̱i a Zabalun,¹⁵kolobo ka Isaka mogono u ta̱wa̱i koɓolo n Debora,mayun ɗa, Isaka wi ta̱ koɓolo m Baraku,o tonoi ni kucina̱ a kubana a̱ ka̱ra̱.Ama kumaci ku Ruben ku pece ta̱,a buwa ta̱ biꞋi e kusheshe punu a̱ a̱ɗu e le.¹⁶Yiɗa̱i i zuwai ɗa i shamgbai a̱ ka̱ca̱pa̱ ka ushiga wu nlala n ɗa̱,adama a na i pana yula̱ yu nguɓi e kuɗeke nlala n le m bono ushiga?Ama kumaci ku Ruben ku pece ta̱,a buwa ta̱ biꞋi a̱ kusheshe punu a̱ a̱ɗu e le.¹⁷Kumaci ku Giliyadu ku shamgbai kasana n Urudu,ama kumaci ku Dan tamkpamu, yiɗa̱i i zuwai ɗa ku shamgbai n antsu a̱ mini?Kumaci ku Ashera kpamu ku shamgbai bini a̱ ka̱kina̱ ka malaꞋa,ubuta̱ u na antsu a tsu shamgba.¹⁸Ama kumaci ku Zabalun ku neke ta̱ wuma u le,aza a Nafutali feu o foɓuso ta̱ adama a na a yaꞋan nannai.

¹⁹<<A Tanaku a̱ ka̱kina̱ ka̱ kuyene ku Magido,ngono n ta̱wa̱i ɗa a yaꞋin kuvon,ngono ma aza a KanaꞋana n yaꞋin kuvon,ama a̱ pura̱ ucanuku u gbani ko azurufa ba.²⁰Ɗe gaɗi azangata a yaꞋin kuvon,a̱ ka̱tsuma̱ ku uye u le ɗe gaɗi,a yaꞋan ta̱ a̱ kuvon n aza a Sisera.²¹Kuyene ku Kishon ku lyaꞋa le ta̱,kuyene ku mani-mani, kuyene ku Kishon.LyaꞋa kelime, ka̱ɗu ka̱ va̱ gbama asuvu.

²²<<Ɗa odoku a Sisera a sumai,uma a̱ ka̱na̱i kupana izumgbi ya adasukpatsu yo okotsu e le a iɗika.

²³<<Kalingata ka Vuzavaguɗu ka danai,YaꞋanka aza a Meroza una̱,yaꞋanka uma a̱ likuci a una̱ u wuya,adama a na a̱ ta̱wa̱ a̱ ɓa̱nka̱ Vuzavaguɗu ba,a̱ ta̱wa̱ a̱ ɓa̱nka̱ Vuzavaguɗu kuvon n irala ni ba.

²⁴<<Vuza vu una̱singai ɗa a̱ ka̱tsuma̱ ka̱ a̱ma̱ci avu Jali,vuka vu Heberu vuza va aza e Kenetu,vuza na u laꞋi vuka dem una̱singai a̱ ka̱tsuma̱ ka̱ a̱ma̱ci a na i ida̱shi a̱pa̱m.²⁵Sisera u folonoi mini,ɗa u nekei ni manio mokoꞋo ma singai ma tsugbayin,u tuka̱i ni n ukuja u mani.²⁶Ɗa u ɗa̱ngusa̱i kukiye ku ni ɗa u ɗikai katusatsu,n kukiye ku usingai ku ni ɗa u ɗikai matalaka.Ɗa u lapai Sisera, u ɓosoi kaci ka̱ ni,u ta̱sa̱i kaꞋa ɗa u ɓatsai moko ma kaci ma̱ ni.²⁷E ene a̱ ni a ɗa u lima̱i,u yikpa̱i ɗe u vaki a iɗika.E ene a̱ ni a ɗa u lima̱i,ɗa u yikpa̱i u kuwa̱i.

²⁸<<N katusu kaꞋa a̱na̱ku a Sisera indanai,n katusu ka ta ɗe u shika̱i, u danai,<Yiɗa̱i i sa̱nka̱i ekeke odoku a̱ ni kubono gogoꞋo?Yiɗa̱i i sa̱nka̱i odoku a̱ ni kubono gogoꞋo?>²⁹Ɗa nkere mu ugboji n ni mu ushuki ni,a danai mayun ɗa ta nannai, ɗa u lyaꞋi kelime n kadanshi,³⁰<I a̱ kula̱nsa̱ ucanuku u na e kupece,ucanuku u na a̱ pura̱i a̱ ubuta̱ u kuvon,mekere ko nkere n re adama o kosoji ke te,aminya a̱ urumbuki o tsuzogu adama a Sisera,aminya a kuꞋuka a singai o tsuzogu,aminya o tsuzogu adama a Egbere.>

³¹<<YaꞋan irala i nu ra̱ka̱ i kuwa̱, avu Vuzavaguɗu.Ama yaꞋan aza a na a cigai nu okpo uteku tsu kanna a ayin a na kuta̱i n utsura u ni.>>Ɗa iɗika ya i da̱sa̱ngi m ma̱ta̱na̱ ali a̱ya̱ amangere.