Read KATAGARDA KA JUWELU Kuɓa̱yuwa̱ 2

KATAGARDA KA JUWELU Kuɓa̱yuwa̱2

Ma̱dukpa̱ ma akyun tsu urotu u kanna ka Vuzavaguɗu

¹Lika̱i vugbala a Sihiyona,i sala a kusan ku gbayin ku ciɗa ku va̱.YaꞋan aza a na i a̱ ida̱shi a iɗika ya ra̱ka̱ e jeꞋeke ikyamba,adama a na kanna ka Vuzavaguɗu ki ta̱ lo a̱ ku ta̱wa̱, ka yawa ta̱ ɗevu.²Kanna ka atakaci kaꞋa n ka̱yimbi,kanna ke eleshu n ka̱yimbi ka kpaɓam.tsu ka̱yimbi ke eleshu ka na ka palai nsansa,ta ka̱bunda̱i ka akyun ka ki a̱ kuta̱wa̱ nannai,ka na ka̱ta̱ a sawai ku ene ba,kpamu o kudoku ku ene tsu nanlo ba,ali ntsukaya n na n kuta̱wa̱.³A kutakuma vica̱Ꞌa̱ tsa akina,E kelime ke le iɗika ya tsu kashina ka Adini,a̱ ka̱ca̱pa̱ ke le iɗika ya tsu ka̱pula̱ka̱,babu ili i na i kulaꞋaka ekiye e le.⁴I ta̱ n iyoci yi odoku,a ilaɗi tsu odoku o kuvon.⁵Ci izumgbi yi ekeke odoku,a ci ɗikpangi a gaɗi va a nsansa,ci izumgbi i kakamba ka na ki a̱ kukula̱,a na osoji a utsura ugeri adama o kuvon.⁶Uma ene le baci, e ci jeꞋeke ta̱ ikyamba,a̱shi e le koli-koli.⁷A̱ tsu ta̱wa̱ ta̱ tsu ovonshi,a kumba mashilya tsu osoji.A tsu dasa ta̱ derere adaru-adaru,a tsu kpatala ba.⁸Babu vuza na u tsu uwa uye u vutoku,yaba dem o kutono kadaru ka̱ ni,a tsu pasamgbanai ta̱ e mere ma irala,kpamu i ku shamgbatangu ba.⁹A tsu bana ta̱ n o bonoi a̱ likuci,a tsu suma ta̱ a gaɗi vu nshilya.A tsu kumba ta̱ a uwa a iꞋuwaa uwa atusu a iꞋuwa a na oboki.¹⁰E kelime ke le iɗika i tsu gba̱ɗa̱ ta̱,ka̱ ta̱ gaɗi a̱da̱nga̱shile e jengeɗe,kanna n wotoi okpoi ka̱yimbi,azangata kpamu feu o doku e neke kutashi ba.¹¹N ka̱la̱ka̱tsu ka utsura ɗa Vuzavaguɗu,udanai osoji a̱ ni,yiɗa̱i a ku gisangu n ka̱bunda̱i ko osoji a̱ ni,osoji a na o tsu tono kadanshi ka̱ ni.a laꞋa ta̱ kukece,Kanna ka Vuzavaguɗu kagbayin kaꞋa,kanna ko wovon ka̱u,Yayi wa kufuɗa ku shamgba?

Uɗeki u kushika̱ unushi

¹²Vuzavaguɗu u danai, <<Ko n nannai.>><<Bonoi wa̱ a̱ va̱ n a̱ɗu a̱ ɗa̱ ra̱ka̱,n kakuli n ma̱shi n una̱mgbi u ka̱tsuma̱.¹³a̱ɗu a̱ ɗa̱ o yotsongu ushiki wu unushi u ɗa̱,ba kukara ku ntogu n ɗa̱ koci ba.I bono a̱ ubuta̱ u Vuzavaguɗu Ka̱shile ka̱ ɗa̱,adama a na a̱yi vuza kasingai ɗa n asuvayali,vuza na u ci yaꞋan wupa gogo ba,kpamu vuza vu ucigi u na u tsu sabaꞋa ba,ama u tsu ronono ta̱ a̱ ubuta̱ u kutuka̱ n ma̱dukpa̱.¹⁴yayi u yevei ko Vuzavaguɗu Ka̱shile ka̱ tsu,wi ta̱ a kusabaꞋa kusheshe ku ni,u zuwaka tsu una̱singai,ali ci yaꞋan kuneꞋe ki ishina n ili i kusoꞋo?¹⁵Lika̱i vugbala a Sihiyona,i sala kuyaꞋan kakuli.yi erengu ka̱ci ka̱ ɗa̱,ka̱ta̱ i yaꞋan koɓolo ka ciɗa.¹⁶I ɓolongu uma,ka̱ta̱ yi erengu koɓolo ka u Vuzavaguɗu,i ɓolongu nkoshi,n muku nu nreɓu,ali vali vu savu n vuka vu savu feu uta̱ a̱ kunu ku le, a̱ ta̱wa̱.¹⁷YaꞋan anan ganu a na i a kuyaꞋanka, Vuzavaguɗu u linga e mere ma katalikalyuka n kafalaka ka̱ A̱Ꞌisa̱ a gbayin, a̱ shika̱.A dana, <<Vuzavaguɗu pana asuvayali a uma nu.Ka̱ta̱ vu ka̱sukpa̱ uma a uka̱ni a̱ nu a yaꞋan wono ba,ka̱ta̱ vu ka̱sukpa̱ uduniyan u yoku u lyaꞋaka le tsugono ba,ali a dana,<Teɗai Ka̱shile ka̱ ɗa̱ ki?> >>

Wushuki u Vuzavaguɗu

¹⁸Ɗa Vuzavaguɗu u sa̱Ꞌa̱i iɗika i ni,u panai asuvayali a uma ni.

¹⁹Vuzavaguɗu wushuki uma a̱ ni, u danai.<<La̱na̱i, mi ta̱ a̱ kusuꞋuku ɗa̱ ishina m ma̱kya̱n n maniꞋin,ali i yawa ɗa̱, yi o kudoku ko okpo ili i ma̱ka̱na̱ ubuta̱ u uma ba.²⁰<<Mi ta̱ o kuloko akyun daꞋangi n a̱ɗa̱,a na uta̱i uɓon u gaɗi a na a̱ tuka̱i ɗa̱ n kuvon,mi ta̱ o kuloko le a kubana a kakamba ka na ki n vuza ba,aza e kelime le a̱ yikpa̱ a Mala,aza a na i o kutono le tamkpamu a̱ yikpa̱ a Mala me Mere.ushami we even a ikyamba e le wi ta̱ a̱ kuɗa̱nga̱,ushami u gbani-gbani u le wi ta̱ a̱ kuka̱ra̱Ꞌa̱ a̱ ubuta̱ dem.adama a na mpa Vuzavaguɗu n yaꞋan ta̱ ili i mereve.²¹Ka̱ta̱ vu pana wovon ba, avu iɗika,yaꞋan ma̱za̱nga̱ vu pana uyoꞋo,adama a na Vuzavaguɗu ɗa u yaꞋin ili i gbayin i nanlo.²²A̱ɗa̱ nnama n kakamba, ka̱ta̱ i pana wovon ba,adama a na ijanu i topo ta̱.Nɗanga kpamu feu n matsa ta̱,nɗanga ma̱ mbiri n mi itacishi a matsa ta̱ mayin.²³YaꞋin ma̱za̱nga̱, a̱ɗa̱ aza a Sihiyona,i pana uyoꞋo nu mpa Vuzavaguɗu Ka̱shile ka̱ ɗa̱,adama a na n yoꞋoko ɗa̱ ta̱ mini ma̱ ugiti,ɗa kpamu n yoꞋoko yi ɗa̱ a makyan ma na ma untsai.²⁴<<Ulanga u kulapu wi ta̱ a kushana tukpa n ishina,Okotsu a gbagbaꞋin i ta̱ a kushana ali a ɓarakpa.i ta̱ a kushana n ma̱kya̱n m maniꞋin ma zaitu.²⁵Mi ta̱ o kubonoko ɗa̱ n ili i na akyun a takumai a̱ ka̱tsuma̱ ka̱ a̱ya̱ a nanlo,akyun a gbagbaꞋin n e kenkeꞋen,nu nta̱ɗa̱ma̱ci, ko ka̱kuma̱ ka akyun a na i yevei,ɗaɗa osoji a utsura a na n suꞋuki ɗa̱.²⁶<<Gogo na yi ta̱ a kulyaꞋa ilikulyaꞋa ali i cuwa̱,ali i cikpa kula ku Vuzavaguɗu Ka̱shile ka̱ ɗa̱,a̱yi na u yaꞋankai ɗa̱ ili i mereve,kpamu i o kudoku kuneke uma a̱ va̱ wono ba.²⁷A̱ɗa̱ uma a Isaraila talo ye kuyeve a na mpa mi ta̱ a̱ ka̱tsuma̱ ka̱ ɗa̱,mpa ɗa Vuzavaguɗu Ka̱shile ka̱ ɗa̱,babu vuza vu yoku, kpamu i o kudoku kuneke uma a̱ va̱ wono ba.

Kanna ka Vuzavaguɗu

²⁸<<Ayin a na baci ili nampa i kotsoi,ka̱ta̱ n suꞋuku uma a̱ va̱ ra̱ka̱ n ayinviki a̱ va̱.muku n ɗa̱ olobo nu nkere i ta̱ a kuyaꞋan kene,nkoshi mi ta̱ a kuyaꞋan alatani,muku mo olobo n ɗa̱ a yaꞋan kene tsa alatani.²⁹Ali n agbashi a̱ ɗa̱ ali n a̱ma̱ci,mi ta̱ a̱ kutsunku le ayinviki a̱ va̱ a kanna ka nanlo.³⁰Ka̱ta̱ n yotsongu urotu wi ili i mereve, gaɗi n iɗika,i ta̱ a̱ kutsuwa̱n mpasa n akina n ugbodoli u ka̱nga̱.³¹Kanna ki ta̱ o ko okpo ka̱yimbi,wotoi tamkpamu wo okpo ushili tsu mpasa.Kafu kanna ka Vuzavaguɗu ka nanlo ka̱ ta̱wa̱.³²Wi ta̱ o ko okpo vuza na baci dem u ɗekei,kula ku Vuzavaguɗu wi ta̱ a̱ kuciya̱ wishi,adama a na a kusan ku Sihiyona n Urushelima,i ta̱ a kuciya̱ aza a na a kulaꞋaka,tsu na mpa Vuzavaguɗu n danai,a̱ ka̱tsuma̱ ka aza na a laꞋakaii ta̱ a̱ kuciya̱ aza a na mpa Vuzavaguɗu n ɗekei.