Read Katagarda ka Irimiya 22

Katagarda ka Irimiya22

Akaka a Irimiya adama a kpaꞋa ku tsugono ka a Yahuda

¹Ɗa Vuzavaguɗu u danai, <<Ɗa̱nga̱ vu bana a kpaꞋa ku mogono ma a Yahuda vu dansa kadanshi ka na mpa,²ka̱ta̱ vu dana, <Pana kadanshi ka Vuzavaguɗu, a vu mogono ma a Yahuda, a vu na vu da̱sa̱ngi a kakuba ka tsugono tsu Dawuda, a vu n ana n taji a̱ nu koɓolo n uma a̱ nu a na a tsu tono n utsutsu na mpa.³Vuzavaguɗu u dana ta̱ yaꞋin ka usuɓi n kasingai, adama na i ciya̱ wishi ekiye a vuza na o doroi. Ka̱ta̱ i nusaka komoci kana ka̱ ta̱wa̱i limoci a̱ wu a ɗa̱ ko i takacika yi ba, m mkpan koɓolo n agapa, ka̱ta̱ yuna vuza gbani ubuta̱ u na mpa ba.⁴Adama na, ɗa baci i tonoi kadanshi ka na mpa, ngono n na n da̱sa̱ngi a kakuba ka Dawuda, i ta̱ a kuwa n utsutsu na mpa gaɗi va a keke odoku, n gaɗi va odoku, e le n a na taji e le koɓolo uma e le.⁵Ama ɗa baci i iwain ku tono kadanshi ka na mpa, n kucina ta̱ n ka̱ci ka̱ va̱, kpaꞋa ku na mpa ki ta̱ o kubono agali. Mpa Vuzavaguɗu mpa ɗa n dansai.⁶Adama na Vuzavaguɗu dansa ta̱ ukuna adama a kpaꞋa ku mogono ma a Yahuda, u danai.<<<A̱ ɗa̱ yi ta̱ an Giliyadu wa̱ a̱ va̱,n tsu na kaginda kagbayin ka Lebano ki,dem n nannai mayun ɗa m bono ko a̱ɗa̱ kakamba,likuci babu vuza.⁷n ku foɓuso ta̱ vuza munuka adama a̱ ni,yaba dem n ucanuku munuka u ni,ka̱ta̱ a kapa nɗanga n singai n sidaka̱ta̱ a varuku le akina.

⁸<<<Ka̱ta̱ uduniya wa a̱bunda̱i u na wi a kutono n likuci i nanlo u danannai, <<Yi ɗa̱i i zuwai Vuzavaguɗu takacikai i ɗika i gbangam i na mpa?>>⁹Ka̱ta̱ ushuku a dana, <<Adama a ka̱sukpa̱ ta̱ Vuzavaguɗu Ka̱shile ke le ɗa o bonoi o kutono a̱ma̱li n a yaꞋin kai le tsu gbashi.>>>>>¹⁰Ka̱ta̱ i shika̱ i yi na u kuwa̱i ɗe ba,ka̱ta̱ i yaꞋin kai kpalu ba,ama shika̱i wuya wuya adama ni a̱ yi na u lazai,adama na u buwa a kubonowe ene iɗika yi uka̱ni i ni ba.

Akaka adama muku mo olobo n Josaya

¹¹Adama na Vuzavaguɗu dansa ta̱ kakuna adama Shallum kolobo ka Josaya, mogono ma a Yahuda ma na ma lyaꞋi tsugono una̱u dada ni Josaya, a̱ yi ɗa vuza na a ɗikai a lazakai a kubanka i ɗika i Babila, <<Kpamu wi a kudoku ku bono ubuta̱ u na mpa kpamu ba.¹²Ama ɗe ubuta̱ u na a ɗikai ni a bankai tsugbashi, ta ɗe u ku kuwa̱, wi a kudoku kene iɗika i na mpa kpamu ba.>>¹³<<I li ya atakaci i ɗa u vuza na u maꞋin kpaꞋa n uye u modoruko,a̱nu a gaɗi a̱ ni kpamu n uye wa uwa,a̱yi na u tsu zuwa toku linga ka̱ta̱ u kpa̱ɗa̱ ku tsupa yi,ka̱ta̱ u kpa̱ɗa̱ kutsupa yi atakaci ulinga a̱ ni,¹⁴a̱ yi na u tsu dana ka̱sukpa̱ n maka ka̱ci ka̱ va̱ kpaꞋa ku gbayinn unu a gbagbain a gaɗi,>ka̱ta̱ u yaꞋin ka le atusu,ka̱ta̱ u paɗara a ɗa n nɗanga n sida ni,yeve ka̱ta̱ u sura ku ɗa mini mashili.¹⁵A vu, vu sheshe ta̱ kudana mogono ma vi,an vu kalai kpaꞋa ku nu n nɗanga n sida?Esheku a̱ nu a lyaꞋa ta̱ n u soꞋi,adama a kasingai n usuɓiɗa tana u ciya̱i ida̱shi ma̱ta̱na̱.¹⁶U ɓa̱nka̱i mkpan n aza unambi,ɗa tana ugain i ni.Ashe na va ɗaɗa kuyeve ku va̱ ba?Mpa Vuzavaguɗu mpa ɗa n dansai.¹⁷Ama a vu zuwa ta̱ a̱shi n ka̱ɗu ka̱ nuubuta̱ u kalyaꞋa,n ubuta̱ u munuka ma uma a gbanin ubuta̱ u modoruko n vishili.>>

¹⁸Adama a nannai Vuzavaguɗu dansa ta̱ u kuna adama Johoyakim kolobo ka Josaya mogono ma a Yahuda.u danai, <<Ka̱ta̱ a shika̱i kpalu,a dana,<Ai mokoshi ma tsu ma,> ko <Taku tsu ɗa ba.>Ka̱ta̱ a shika̱ yi, a dana.Vuzavaguɗu.> ko <Vuzagbayin ba.>¹⁹Tsu na a ci ciɗa̱ngu majaki ta a ku ciɗa̱ngi nannai,i ta̱ o ku ronoi a vakangu a kucina̱ ku utsutsu Urushelima.>>²⁰<<Bana kumba gaɗi vu Lebano ka̱ta̱ vi shika̱ ɗe,ka̱ta̱ a vu utuka̱ ka̱la̱ka̱tsu a̱ nu a likuci i Basha,i shika̱ a likuci i Abarim,adama na ncigi n nu ra̱ka̱ n kuwa̱ ta̱.²¹N dansa ka ɗa̱ ta̱ a ayin uciyi u ɗa̱,ama ɗa <I iwain kupana,>Tsu na mpa tsu ɗa i kiwanai, tun ɗe a ayin u ɗa̱nga̱ ni u ɗa̱,i tsu tono kadanshi ka̱ va̱ ba.²²Wunla̱ wi ta̱ a̱ kupura̱ngu tsugbayin tsu ɗa̱ ra̱ka̱,ka̱ta̱ a ɗika ncigi n ɗa̱ a banka tsugbashi,ka̱ta̱ vokpo n wono,adama ka gbani-gbani ka̱ɗa̱ ra̱ka̱.²³A̱ɗa̱ aza Lebano,a̱ɗa̱ na yi ida̱shi punu a ka̱tsuma̱ ka nɗanga n sida,i cuꞋu yi inka ye ne i ɗa ya kuyaꞋin ɗa baci atakaci a̱ ta̱wa̱i ɗa̱an ɓa̱la̱ an vuka va a̱ga̱nda̱.>>

²⁴<<Mpa Vuzavaguɗu n kucina ta̱ n wuma u va̱, ko an wokpoi Jokoniyan kolobo ka Johoyakim mogono ma aza Yahuda, makawani ma ka̱ta̱mba̱ri ma a ka̱jivu ka kukiye ku usingai ka̱ va̱, dem n nannai mita̱ a ku utuka̱ wu²⁵ka̱ta̱ n neke wu ekiye aza a na i a kula̱nsa̱ wuma u nu, ekiye aza na vi a kupana wovon u le, wa ta Nebukanezaru mogono ma aza Babila kpamu n ekiye aza Kaldiya.²⁶Ka̱ta̱ n taɗuku koɓolo n a̱na̱ku a na amaci nu a iɗika i yoku kau i na vu nambai kuyeve, ta ɗe va ku kuwa̱.²⁷Vi a ku doku ku bono a iɗika i na mpa i na vu cikalai ba.>>²⁸Ɗa vuza yoku u danai, <<Na va, Jokoniyan ka ɓoshi ka mogbodo ka,ma̱diki ma na vuza u buwai a ku cikala ba? Yiɗa̱i zuwai ɗa a taɗuki ni koɓolo n muku n nia iɗika i na eyevi ba?²⁹OꞋo iɗika, iɗika, iɗika,pana kadanshi ka Vuzavaguɗu.³⁰Vuzavaguɗu u dana ta̱,<<Ɗana vuma na mpa madari,vuma na wa kusuɓa̱ a wuma u ni ba,adama na babu matsukaya ma ni ma na ma ku ciya̱ u lyaiu na wa ku da̱sa̱ngu a kakuba ka tsugono tsu Dawudabe le tana u lyaꞋaka Yahuda tsugono.>>