Read Katagarda ka ISHAYA 60

Katagarda ka ISHAYA60

Tsugbayin tsu Urushelima tsu na ci kelime.

¹<<Ɗenga̱, ka̱ta̱ vu akana adama a na kutashi ku nu ku yawa ta̱,tsugbayin tsu Vuzavaguɗu ci cipa̱ ta̱ wa̱ nu.²La̱nuku, ka̱yimbi ka pala ta̱ aduniyan ra̱ka̱,ɗa ka̱yimbi ka gbangam ka palai uma,ama wa̱ nu u ɗa kutashi ku Vuzavaguɗu ki a kakana,tsugbayin ci ni tsu ta̱wa̱ wa̱ nu.³Aduniyan dem i ta̱ a̱ kuta̱wa̱ a̱ ubuta̱ u kutashi ku nu,ngono tamkpamu i ta̱ a̱ kuta̱wa̱ a̱ ubuta̱ u kutashi ku usana ku nu.

⁴<<Ɗengusa̱ a̱shi a̱ nu vu ka̱ra̱ka̱ a̱ ubuta̱ dem,ka̱ta̱ ye ene tsu na o ɓolongi a̱ ubuta̱ u te, ɗa a̱ ta̱wa̱i wa̱ nu,muku n ɗa̱ mi ta̱ a̱ kuta̱ daꞋangi,ɗa a̱ ka̱na̱i nkere n nu e ekiye.⁵A̱shi a̱ nu i ta̱ e kene ka̱ta̱ a tasa,ka̱ɗu ka̱ nu ki ta̱ a kushana ka̱ta̱ ka shita adama a̱ ma̱za̱nga̱,uciyi u na wi a mala i ta̱ a̱ kutuka̱ u ɗa wa̱ nu,wa̱ nu u ɗa uciyi wa aduniyan ra̱ka̱ u kubono.⁶Ka̱bunda̱i ka arakuma ki ta̱ a kupala wu,arakuma a wawaꞋa a Midiya koɓolo n Ifa,aza na i a Sheba ra̱ka̱ i ta̱ a̱ kuta̱wa̱,ucaniki n azanariya koɓolo n ili i ma̱gula̱ni,n a salai ukuna u kucikpa Vuzavaguɗu.⁷Ushiga wi ilikuzuwa ya aza a Kida i ta̱ o kuɓolongu u ɗa wa̱ nu,a̱giri a aza a Nebatu i ta̱ a kuyaꞋanka wu ulinga,i ta̱ a kisa a ɗa ci ili i kuneꞋe a katalikalyuka ka̱ va̱,ka̱ta̱ kpamu n lapulaka kpaꞋa ku singai ku va̱.

⁸<<Anan yayi a imkpai gaɗi tsa eleshu tsa,tsu moɗoi a kubana a̱ ubuta̱ u cikinda u le?⁹Mayun aza o kotogu i ta̱ a kuzuwa a̱pa̱Ꞌa̱ e le wa̱ va̱,antsu a aza a Tarishi a ɗa o kokpo aza a ugiti,a̱ kutuka̱ muku n ɗa̱ na ɗe daꞋangi,koɓolo n azurufa n azanariya e le,adama a kucikpa kula ku Vuzavaguɗu Ka̱shile ka̱ ɗa̱,n Vuza Ciɗa va aza a Isaraila,adama a na a̱yi ɗa u zuwai nu vo okpo n tsuloboi.

¹⁰<<Omoci i ta̱ a kumaꞋasaka ɗa̱ nshilya n ɗa̱,ka̱ta̱ ngono n le mo okpo aza a na a kuyaꞋanka ɗa̱ tsugbashi,ko a na wi n wupa u ɗa n lapai ɗa̱,ama n ucigi u ɗa n kuyotsongu ɗa̱ asuvayali a̱ va̱.¹¹Utsutsu u ɗa̱ wi ta̱ o kuyongo uɓa̱yuwi ayin tutu,a̱ kuɓa̱ya̱ngu u ɗa ba kanna n kayin dem,adama a na uma a̱ tuka̱ wu n uciyi wa aduniyan dem,n ngono n le a kuwalaka le kelime udari a̱ kuta̱wa̱ wa̱ nu.¹²Adama a na iɗika ko tsugono tsu na tsu tonoi nu ba, ci ta̱ a̱ kukuwa̱,i ta̱ o kubonoko i ɗa agali ra̱ka̱-ra̱ka̱.

¹³<<Tsugbayin tsa aza a Lebano ci ta̱ a̱ kuta̱wa̱ wa̱ nu,koɓolo nu nɗanga n singai sipirus n firi, n pini dem,adama a na n lapulaka ubuta̱ u ma̱va̱li ma̱ va̱,ka̱ta̱ kpamu n neke ubuta̱ u kuzuwa adasukpatsu a̱ va̱ tsugbayin.¹⁴Muku ma aza a na a takacikai ɗa̱ mi ta̱ a̱ kuta̱wa̱ ka̱ta̱ a̱ kuɗa̱nku ɗa̱,aza a na o goyoi ɗa̱ dem i ta̱ a̱ kuta̱wa̱ ka̱ta̱ a̱ kuɗa̱ngu a idasakpatsu i ɗa̱,ka̱ta̱ e ɗeke ɗa̱ likuci i Vuzavaguɗu,Sihiyona vu ciɗa va aza a Isaraila.

¹⁵<<Ko an wi ishi a iwain nu ɗa a̱ ka̱sukpa̱ nu,ali babu vuza te vu na u kuwala punu a̱ ubuta̱ u nu,mi ta̱ o kubonoko wu ili ya̱ a̱ra̱ɗi i na i kukotso ba,koɓolo m ma̱za̱nga̱ ma babu uteku.¹⁶Yi ta̱ a kupana uyo wi uciyi wa aduniyan,ka̱ta̱ a lyatangu ɗa̱ n ilikulya yi ngono.Nannai ɗa i kuyeve a na Mpa ɗa Vuzavaguɗu, Kishi ka̱ ɗa̱n Ka̱shibi ka̱ ɗa̱, Vuzagbayin va aza a Isaraila.¹⁷A na me neke ɗa̱ viyum vi shili yaꞋan n kucukpa n neke ɗa̱ azurufa,n azanariya o okpo una̱ u vuyum.Ka̱ta̱ n neke ɗa̱ viyum vi shili a̱ una̱ wu nɗanga,vuyum tamkpamu vo okpo una̱ wa atali.Ka̱ta̱ n zuwa ma̱ta̱na̱ mo okpo vuzagbayin vu ɗa̱,usuɓi tamkpamu wo okpo mogono ma̱ ɗa̱.¹⁸Ibori i vishili yo kudoku ya yaꞋan a iɗika i nu ba,babu kula̱nga̱su ko moɓosu mu ubuta̱ a uteku wi iɗika i ɗa̱,ama yi ta̱ e kuɗeke nshilya n ɗa̱ nshilya mu wishi,i ɗeke utsutsu u ɗa̱ kpamu ucikpi.¹⁹Kanna ki o kudoku kuneke ɗa̱ kutashi n kanna ba,ko kutashi ku wotoi ku akana ɗa̱,adama a na Vuzavaguɗu wi ta̱ kokpo kutashi ku ɗa̱ ku na ko kukotso ba,ka̱ta̱ Ka̱shile ka̱ ɗa̱ kpamu kokpo tsugbayin tsu ɗa̱.²⁰Kanna ka̱ ɗa̱ ko kudoku kuta̱ ba,ka̱ta̱ wotoi feu u kpa̱ɗa̱ kuta̱,Vuzavaguɗu wi ta̱ o kokpo kutashi ku ɗa̱ ku ko wannai,ka̱ta̱ ayin a̱ una̱mgbuka̱tsuma̱ a̱ ɗa̱ a zuwa uteku.²¹Ka̱ta̱ uma a̱ nu dem o bono a̱ suɓa̱,ka̱ta̱ a̱ ka̱na̱ iɗika ya ali a kubana uteku n uteku.Ele ɗa utopi u na n ca̱Ꞌi,n ulinga we ekiye a̱ va̱,adama a na n ciya̱ ucikpi.²²KpaꞋa ku na ku laꞋi n kenu a̱ ka̱tsuma̱ ka̱ ɗa̱ ku ɗa ko kokpo ku gbayin,iɗika i kenu moco yo okpo aduniyan a̱ a̱bunda̱i,Mpa ɗa Vuzavaguɗu,makyan ma yawa baci mi ta̱ a kuzuwa i ɗa i yaꞋan.>>