Read Katagarda ka ISHAYA 40

Katagarda ka ISHAYA40

Odoki a kubana u uma a̱ Ka̱shile

¹Ka̱shile ka̱ ɗa̱ ka danai,YaꞋan odoki, yaꞋankai uma a̱ ɗa̱ odoki²YaꞋankai Urushelima kadanshi n ka̱ɗu ida̱shi,ka̱ta̱ vu dana yiatakaci a̱ ni o kotso ta̱,a cinukpaka yi ta̱ unushi u ni,mayun Vuzavaguɗu u takacika yi ta̱ali kure adama a unushi u ni ra̱ka̱.³Ka̱la̱ka̱tsu e meɗevile e meremune, <<Foɓusoi uye adama a Vuzavaguɗu, lapulai uye u gbayin a kakamba adama a̱ Ka̱shile ka̱ tsu.⁴A̱ra̱ ra̱ka̱ a yaꞋan uciɗa̱ngi,ka̱ta̱ kusan koɓolo m masasan a yaꞋan usa̱di,ubuta̱ u na wi n yolu u bono derere,ka̱ta̱ ubuta̱ u gbani-gbani u bono mayin.⁵Ka̱ta̱ tsugbayin tsu Vuzavaguɗu tsu uta̱ e keteshe,ka̱ta̱ uma ra̱ka̱ e ene u ɗa,adama na Vuzavaguɗu ɗa u dansai.>>

⁶Ka̱la̱ka̱tsu ka danai, <<Sala>>Ɗa me ecei, <<Yiɗa̱i n kusala?>><<Sala vu dana uma ra̱ka̱ i ta̱ tsu mita̱,tsuloboi ci le kpamu ci ta̱ uteku tsu a̱pa̱lu a kakamba.⁷Mita̱ me ci ɗekpe ta̱, a̱pa̱lu kpamu o tsu ɗoɗo ta̱a ayin a na baci ayinviki a Vuzavaguɗu a̱ uvula̱i le,mayu uma mita̱ ma a.⁸Mita̱ me ci ɗekpe ta̱,a̱pa̱lu kpamu o tsu ɗoɗo ta̱,ama kadanshi ka̱ Ka̱shile ka̱ tsu ki ta̱ lo ko wanai.>>

⁹Avu vu na vu tsu tuka̱ n arabali a singai a Sihiyona,Ɗa̱nga̱ vu kumba kusan ku ugaɗi,Avu Sihiyona, avu na vu tsu tuka̱ n kadanshi ka singai.Ɗengusa̱ ka̱la̱ka̱tsu ka̱ nu n utsura avu Urishelima,ka̱ta̱ vu pana wovon ba,dana likuci kakau ya aza a Yahuda,<<Ka̱shile ka̱ ɗa̱ ka na.>>¹⁰La̱na̱i, Vuzavaguɗu MalaꞋimili wi ta̱ lo a̱ kuta̱wa̱ n utsura,ka̱ta̱ u lyaꞋa tsugono n kukiye ku utsura ku ni, la̱na̱i,wi ta̱ koɓolo n katsupu ka nia ayin a na baci u yawai.¹¹Wi ta̱ a̱ kula̱na̱ ushiga u ni tsu maguɓi,ka̱ta̱ u ɓolongu nlala a̱ ubuta̱ u ni,u doku u ɗika le wo oɓongu,ka̱ta̱ u guɓa aza a na i m muku sawu.

¹²Yayi u kufuɗa kugisangu mala n kataka ke kukiye ku ni,ko ta na u gisangu a̱da̱nga̱shile n wanshi u kukiye u ni?Yayi u saꞋwai kuɓa̱na̱ kubuta̱ ka aduniyan a mabana,ko u gisangu a̱miki a nsansan aginda n kagisamkpatsu?¹³Yayi u kufuɗa kuyeve kusheshe ku Vuzavaguɗu,ko ta na u neke yi kadanshi tsu vuza va odoki a̱ ni?¹⁴Yayi Vuzavaguɗu u cinakai adama a na u doku yi kuyeve?Yayi vuza na u yotsongi ni uye u singai?Yayi vuza na kpamu u yotsongi ni kuyeve,ɗa kpamu u yotsongi ni uye u kufuɗa?

¹⁵Mayu aduniyan i ta̱ tsu uɗa̱kpi u mini o kogbodo ka̱ mini,i ta̱ tsu uteku tsu kubuta̱ a kagisamkpatsu. U bonoko ta̱ otogu ra̱ka̱ adanshi kubuta̱ ku ɗa.¹⁶Nɗanga n Lebano n kuyawa kusongu a katalikalyuka ba,ko ta na nnama n ni feu n yawa kuyaꞋanka kuneꞋe ku kusongu.¹⁷Uma a aduniyan dem wa̱ ni ili i ɗa i ba,u kece le ba,u bonoko le ili kpamu ba.

¹⁸N yayi va kugisanku n Ka̱shile?N iyoci ye ne i ɗai va kugisanku yi?¹⁹Ka̱ma̱li vuma ɗa u yaꞋin ni,ɗa kawakana ka kumai ni n azanariya,ɗa u doku u ukai ni ikani ya azurufa.²⁰Vuma vu unambi vu na wi n i na u kuyaꞋanka kuneꞋe ba,u tsu zagba ta̱ maɗanga ma na ma tsu shama ba.U tsu la̱nsa̱ ta̱ vuza na u yevei kusheꞋwe,ka̱ta̱ u sheꞋweke yi ka̱ma̱li ka na ka tsu wala ba.

²¹Ka̱ta̱ vu yeve ba?Ka̱ta̱ vu pana ba?Ka̱ta̱ a saꞋwa kudana wu n ayin a̱ ugiti ba?Ka̱ta̱ vu ciya̱ kuyeve ukuna u nampa ali kafu a yaꞋan aduniyan ba?²²A̱yi ɗa vuza na wi ida̱shi gaɗi vi ɗika,uma a̱ ni i ta̱ uteku tsa akyun,ɗa u ba̱ra̱kpa̱i gaɗi tsu kafalaka,ɗa u ba̱ra̱kpa̱i le uteku tsu ma̱va̱li ma na o ci yongo.²³A̱yi ɗa vuza na u bonokoi ngono ukuna u gbani,ɗa u bonokoi tsugono tsa aduniyan ili i yoku ba.²⁴I ta̱ uteku tsu mita̱ mu wuti usavu,a makyan ma na baci a̱ ca̱Ꞌi lema na mu uta̱i babu aralu a̱ ma̱riki.Ayin a na baci Vuzavaguɗu u lapai wunla̱,e ci ɗekpe ta̱ ka̱ta̱ o tono wunla̱i an kopo.

²⁵Vuza ciɗa u danai,<<N yayi a kugisanku mu, an mo kokpo uteku ci ni?>>²⁶Ɗengusa̱i a̱shi a̱ ɗa̱ gaɗi ka̱ta̱ i la̱na̱.Yayi u yaꞋin ili nampa ya?U tsu uta̱ka̱ le vuza te vu te,ka̱ta̱ u ɗeke yaba dem n kula ku ni,adama a tsugbayin tsu utsura ci ni tsu na ci kugisanku ba,babu vuza te vu na u nusai.

²⁷Avu Yakubu,<<Adama a̱ yiɗa̱i va kudana Vuzavaguɗu we ene ta̱ atakaci a̱ nu ba?Uye u va̱ wi ta̱ usokongi a̱ a̱shi a Vuzavaguɗu, Avu Isaraila yi ɗa̱i i zuwai ɗa va kudana Ka̱shile ka iwan ta̱ kasingai ka̱ nu?>>²⁸A̱ɗa̱ i yeve ba?Ka̱ta̱ yi ishi i pana ba?Vuzavaguɗu Ka̱shile ka kowanai kaꞋa.Vuza na u yaꞋin aduniyan dem.A̱yi utsura u ni u tsu jebe ba ko woꞋo,kusheshe ku ni kpamu ki kuyeve ba.²⁹U tsu neke ta̱ aza a woꞋi katsura,ka̱ta̱ u doku aza a unambi wu utsura katsura.³⁰Ko a̱ɗa̱nga̱ni a ci yaꞋan ta̱ ulinga ka̱ta̱ o oꞋwo,olobo feu i ta̱ a̱ kuta̱ɗa̱tsa̱ ka̱ta̱ a̱ yikpa̱.³¹Ama aza na e nekei a̱ɗu e le u Vuzavaguɗui ta̱ a̱ kuciya̱ utsura u savu.Ka̱ta̱ a imkpa gaɗi n evelyu tsu kajimba,I ta̱ a kusuma ama o koꞋo ba.I ta̱ a kuyaꞋan nwalu ama a̱ kulima̱ ba.