Read Katagarda ka ISHAYA 38

Katagarda ka ISHAYA38

Mɓa̱la̱ n Hizekiya n kupotso ku ni 38:0 2 Ng 20:1-11; 2 Ar 32:24-26

¹A ayin a na Hizekiya wi ishi mogono, u ka̱na̱i mɓa̱la̱ kenu ana wa̱ kuwa̱. Ɗa Ishaya keneki kolobo ka Amozu ka banai wa̱ ni, ɗa u danai ni, <<Na ɗa ili i na Vuzavaguɗu u danai. Foɓuso kpaꞋa ku nu, adama a na vi ta̱ a̱ kukuwa̱, vi o kupotso ba.>>

²Ɗa ta na Hezekaya u za̱lika̱i a̱shi a̱ ni a tsusaki ɗa u yaꞋin kavasa a kubana u Vuzavaguɗu,³ɗa u danai, <<Ciba, Vuzavaguɗu, tsu na n tonoi nu n uneki u ka̱ɗu koɓolo n ka̱ɗu ke te, ɗa kpamu n yaꞋin ili i singai a̱ a̱shi a̱ nu.>> Ɗa Hezekaya u shika̱i ka̱u.

⁴Ɗa kadanshi ka Vuzavaguɗu ka̱ ta̱wa̱i wi Ishaya.⁵<<Bana vu dana Hezikaya va, <Na ɗa ili i na Vuzavaguɗu, Ka̱shile ke esheku a̱ ɗa̱ Dawuda, u danai. M pana ta̱ avasa a̱ nu m ma̱shi ma̱ nu. Adama a nannai mi ta̱ o kudoku wu a̱ya̱ gendu a wuma u nu.⁶Mi ta̱ a kisa wu n likuci i Urushelima e kukiye ku mogono ma Asiriya, ka̱ta̱ kpamu mi inda likuci i nampa ya.

⁷<< <Nava ɗaɗa urotu u Vuzavaguɗu a̱ kuta̱wa̱ nu, Vuzavaguɗu wi ta̱ a kuyaꞋan ili i nampa i na u yaꞋin uzuwakpani.⁸Mi ta̱ a kuzuwa kululu ku kanna kubono n ka̱ca̱pa̱ ali adanga kupa, tsu na kagisamkpatsu ka kanna ko mogono Ahazu ki.> >> Ɗa kutashi ku kanna ku bonoi n ka̱ca̱pa̱ ali adanga kupa ta na.

⁹Ana Mogono Hezekaya u ta̱na̱i, ɗa u ɗanai vishipa vu ucikpi vu nampa.¹⁰N danai, <<A̱ ka̱tsuma̱ ka ayin a utsura u va̱u yotso ta̱ m bana ubuta̱ wa̱ a̱kpisa̱ n utsura u va̱,ali n namba a̱ya̱ a na a gaꞋin n yongo n wuma?>>¹¹Ɗa n doku n danai, <<Mo kudoku me kene Vuzavaguɗu ba,Vuzavaguɗu vu na wi a iɗika ya aza a wuma,mpa mi o kudoku me kene umako n yongo n ele vu na i punu a aduniyan a nampa ba.¹²A takpa ta̱ wuma u va̱ uteku tsu na a̱ tsu muɗa̱ ka̱pa̱m ka maguɓi.Ɗa n ka̱ta̱la̱i wuma u va̱ uteku tsu kacaꞋi,uteku tsu kacaꞋi kaꞋa vu ka̱ta̱la̱i wuma u va̱,ɗa u gbatyai mu ɗe a uleɓengi,ɗa kanna n kayin vi yawakai mu uteku.¹³M gbamai asuvu ali a kubana a usana,ama uteku tsu kawu ɗa o koɗosoi etele a̱ va̱ ra̱ka̱,ɗa kanna n kayin vi yawakai mu uteku.¹⁴N lapai una̱ tsu manunu,ɗa kpamu n na̱mgba̱i ka̱tsuma̱ tsu moɗoi.A̱shi a̱ va̱ o okpoi ga̱lu a ayin a na mi a kinda gaɗi.Vuzavaguɗu, mi ta̱ a̱ ka̱tsuma̱ ka atakaci, ta̱wa̱ vu ɓa̱nka̱ mu.>>

¹⁵Ama yiɗa̱i n kudansa?Adama a na a̱yi u yaꞋan ta̱ ɗe kadanshi nu mpa, a̱yi a̱ ka̱ci ka̱ ni feu u saꞋwa ta̱ ɗe kuyaꞋan ili i nampa.Mi ta̱ a kuwala sawu a ayin a wuma u va̱ dem,adama a̱ una̱mgbi u ka̱ɗu u va̱ u nampa.¹⁶Vuzavaguɗu, uneki wa atakaci u nu wi ta̱ n ugaꞋin,adama a na u banka mu ta̱ a wuma u singai m ma̱ta̱na̱ kpamu.Vu bonokoi mu m ma̱ta̱na̱ɗa vu ka̱sukpa̱i mu n yongo n wuma.¹⁷Mayun,adama a ugaꞋin u va̱ u ɗa n soꞋi atakaci tsu nampa.N ucigi u nu ɗa vu foɓoi muadama a na m kpa̱ɗa̱ kuꞋuwa e kpenle ku munuka,ɗa vu zuwakai unushi u va̱ dema̱ kucina̱ ku nu.¹⁸Adama a na ka̱kpisa̱ ka kucikpa wu ba,ka̱kpisa̱ ka kuyaꞋanka wu vishipa vu kucikpa ba,aza a na a uwai ɗe a̱ ubuta̱ wu ukpisa̱a buwa e kukeɗe a̱pa̱ adama a uneki u ka̱ɗu u nu ba.¹⁹Vuza wuma ɗa koci wa kufuɗa wa cikpa wu,tsu na mi a kuyaꞋan anana,anan dada a tsu dana ta̱ muku n leukuna wu uneki u ka̱ɗu u nu.

²⁰Vuzavaguɗu wi ta̱ a kisa mu,ka̱ta̱ a̱ tsu ci canana ishipa koɓolo n umolua ayin a wuma u tsu dempunu a̱ a̱Ꞌisa̱ a Vuzavaguɗu.

²¹Ishaya u dana ta̱, <<Foɓusoi maniꞋin ma maɗanga ma̱ ma̱biri ka̱ta̱ i tsungu a kamici ka, wi ta̱ a̱ kuta̱na̱.>>

²²Ɗa Hezikaya we ecei, <<Yiɗa̱i i kokpo urotu u na mpa n kubana a̱ a̱Ꞌisa̱ a Vuzavaguɗu?>>