Read Katagarda ka ISHAYA 21

Katagarda ka ISHAYA21

Kene ku wuya adama a Babila

¹Akaka a i ta̱ a kadanshi ke meremune ma na mi a uɓon u mala.Uteku tsu kabatalikpau ka na kuta̱i e Negebu ka̱ta̱ ka̱ pura̱ngu kakamba ku uɓon u ɗaka n utsura,nannai ɗa kawuya ka̱ uta̱ ɗe,ka̱ta̱ ka̱ pura̱ngu iɗika i gbani-gbani.

²A dana mu ta̱ tsa alatani o wovon,kodori u lyaꞋa kelime m modoruko, vuza munuka u lyaꞋa kelime m munuka ma̱ ni.Ɗenga̱i a̱ɗa̱ aza a Elim n aza a Midiya i kambuku ka̱ta̱ a̱ shilika̱ n aza a Babila.Adama a na mpa Vuzavaguɗu n kucina ta̱ an ma zuwa uteku wa atakaci a na a̱ tuka̱i.

³U ɓa̱la̱ mu ta̱ ka̱u, uteku tsu vuka va̱ a̱ga̱nda̱ a limata.Ikyamba i va̱ i kuwa̱ ta̱ ɗa u ɓa̱la̱i mu ka̱u,ali ɗa m kpa̱ɗa̱i kufuɗa kupana ko me ene.⁴Ka̱ɗu ka̱ va̱ ka̱ shulyuku ta̱ ka̱u,ɗa wovon u zuwai mu kujeꞋeke ikyamba,kayin ka na mi a kuvana ka̱ ta̱wa̱,ɗa ko okpoi mu ko wovon.

⁵O foɓusoi ka̱ɗiva̱ ki ilikulya,o poloi ajiba adama a na uma a̱ da̱sa̱ngu,yaba dem a kulyaꞋa n u soꞋi,gogoꞋo ɗa̱nga̱i, a̱ɗa̱ aza a̱ gba̱ra̱-gba̱ra̱,putalai nra̱ga̱ n ɗa̱ maniꞋin.

⁶Ili i na Vuzavaguɗu u danai mu i ɗa na,<<Bana vu zuwa kindi,ka̱ta̱ u dana uma ili i na we enei.⁷Ɗa baci we enei akumbi,e ekeke o odoku a aza e re e re,a gaɗi vo odoku n akumbi a njaki,koɓolo n akumbi a arakuma,yaꞋan u zuwa atsuvu u pana mayin,u yongo ufoɓushi.>>

⁸Ɗa kindi ka ka dansai n ka̱la̱ka̱tsu ka̱u u danai,<<A kanna dem, vuzagbayin vu va̱, n tsu shamgba ta̱ gaɗi vu mashilya ma kindana,a kayin lakam n tsu shamgba ta̱ a̱ ubuta̱ u na a zuwai mu.⁹La̱na̱, vuma ɗa lo a̱ kuta̱wa̱ e keke vo odoku,koɓolo n ka̱tsura̱ ko odoku.Ɗa wu ushuki le u danai,<Babila u yikpa̱ ta̱, mayun u yikpa̱ ta̱.Urotu wa̱ a̱ma̱li a̱ ni demu yikpa̱i furali a iɗika.> >>

¹⁰Uma a̱ va̱, aza a na a lapai ɗa e yelyukpei a kagbata,n dana ɗa̱ ta̱ ili i na m panaia̱ ubuta̱ u Vuzavaguɗu MalaꞋimili,Ka̱shile ka aza Isaraila.

Kene ku uwuya adama a Edom

¹¹Akaka adama a aza a Duma .Vuza yoku u ɗeke mu ta̱ ɗe a Siyaru u danai,<<Kindi, wana ɗai kayin ko kukotso?Wana ɗai ko kukotso?>>¹²Ɗa kindi ka ku ushuki,<<Kayin ki ta̱ a kasa, kanna kpamu ki ta̱ o kukotso.Vi baci n keci, ece,ka̱ta̱ vu doku vu bono kpamu.>>

Kene ku wuya adama a aza a Alaraba

¹³Akaka adama aza a Alaraba,a̱ɗa̱ aza a tsulaga a nwalu a Dedanu,aza a na a vaki a kakamba ka̱ durum ka Alaraba,¹⁴tuka̱i m mini adama aza a kakuli,a̱ɗa̱ vu na yi ida̱shi a iɗika i Tima.Tuka̱i n ilikulya adama a aza a na a sumai adama o kuvon.¹⁵Adama a na a suma ta̱ adama o kotokobi,a̱ ubuta̱ wu ukpa̱ u kotokobi,a̱ ubuta̱ wu utan u na a katsuki,koɓolo n ubuta̱ u na kuvon ku suɗukpai.

¹⁶Ili i na Vuzavaguɗu u danai mu i ɗaɗa na, <<A̱ ka̱tsuma̱ ka̱ ka̱ya̱ ke te, tsu na a ci ɗika vuza vu zamalinga ka̱ta̱ u ka̱na̱ kukece, ta tsugbayin tsu Kedaru tsa kuyawa uteku nannai.¹⁷Vuzavaguɗu, Ka̱shile ka aza a Isaraila ka danai, aza o kuvon e Kedaru, i ta̱ o kokpo kenu.>>