阅读Katagarda ka ISHAYA 17

Katagarda ka ISHAYA17

Kene ku wuya adama a iɗika i Dimaska

¹A kaka adama a Dimaska,
La̱na̱, Dimaska wo kokpo likuci kpamu ba,ama wi ta̱ o kubono agali.²Likuci n a̱bunda̱i ya aza a Aro yi ta̱ o kokpo ukuna u gbani,ka̱ta̱ wo okpo ubuta̱ u kalina ku ushiga wu nlala,ka̱ta̱ a vaku lo babu vuza na u kuneke le wovon.³Vuzavaguɗu MalaꞋimili u danai, Likuci yu ukanji i Ifirayimu yi ta̱ o kukotso,ka̱ta̱ tsugbayin tsu tsugono tsu Dimaska,n aza a na a buwai a Siriya tsu puwa̱nka̱an tsugbayin tsu muku mi Isaraila.

⁴A kanna ka nanlo tsugbayin tsu Yakubu ci ta̱ a̱ kuyikpa̱,ka̱ta̱ ugbonguri wi ikyamba u ni u yamba.⁵Wi ta̱ o kokpo tsu na kacimbi ka tsu kapa ilikulya,ka̱ta̱ kpamu u kyaꞋa n ekiye a̱ ni,n uteku tsu na kpamu vuza u ci yaꞋan kuɗayua̱ ka̱ra̱Ꞌa̱ ka Rafi.⁶Vuzavaguɗu Ka̱shile ki Isaraila u danai, ko n nannai ili i kuɗayu yi ta̱ a kubuwa,uteku tsu na a tsu lapa maɗanga ma zaituka̱ta̱ a nusa umaci u re ko u tatsuko u na̱shi ko u tawunɗe a acaka a na a laꞋin daꞋin n kumatsa ka̱u.

⁷A ayin a nanlo uma i ta̱ a kinda kayaꞋin ke le, ka̱ta̱ o bonoko a̱shi e le a ubuta̱ u vuza ciɗa va aza a Isaraila.⁸I o kudoku a kinda atali alyuka a na a yaꞋin n ekiye e le ba, i kpamu o kudoku a cikpa ili i na a yaꞋin n ekiye e le ba, ko Asherimi ko atali alyuka a ili i ma̱gula̱ni.

⁹A kanna ka nanlo likuci i gbagbaꞋin i le, i na a̱ ka̱sukpa̱i adama a aza a Isaraila yi ta̱ o kokpo tsu ubuta̱ u na a̱ ka̱sukpa̱i ɗa wo okpoi mura̱ta̱i n a̱vuku. Ra̱ka̱ wi ta̱ o kokpo agali.

¹⁰Adama a na avu vi cinukpa ta̱ n Ka̱shile ka na ki isai nu,vi ciɓa n kakpanlai ka na ko sokongi nu va ba.Adama a nannai, vi ca̱Ꞌi icuꞋu i na vi cigai,ɗa vi ca̱Ꞌi icuꞋu yi itacishi i yoku i na yu uta̱i a̱ ubuta̱ u yoku.¹¹Vi ta̱ a kufuɗa va zuwa le o gbonguro a kanna ka na vi ca̱Ꞌi le,ka̱ta̱ kpamu vu zuwa le a yaꞋan a̱pa̱lu n usana u na vi ca̱Ꞌi le.Ko n nannai vikyaꞋa vu nu vi ta̱ o kokpo ukuna u gbania kanna ka̱ mɓa̱la̱ nu mɓa̱la̱ n na n kukpa̱ɗa̱ kuta̱na̱.

¹²Panai osoji a aduniyan n a̱bunda̱ia̱ yura̱ tsu yura̱ i mala,panai akpanga a gbagbaꞋin o osojia̱ kushida̱ m moloko uteku tsa aɓau a utsura.¹³Aduniyan n a̱bunda̱i a̱ yura̱ uteku tsu yura̱ i mini ma̱ a̱bunda̱i,ama Ka̱shile ki ta̱ a kudansika le, ka̱ta̱ ele a imkpa a bana daꞋangio kutono wunla̱i an kopo a gaɗi vu nsasantsu na wunla̱i u kabatalikpau u tsu shida̱ n kubuta̱.¹⁴M makyan ma̱ kulivi, ka̱ta̱ wovon u gbayin u ta̱wa̱,ama kafu usana ka̱ta̱ u ɗa u kotso.Na ɗa u kokpo ugboku wa aza a na i o kudoro tsu,koɓolo n katsupu ka aza a na i a̱ kupura̱ ucanuku u tsu.