Read Ugiti 49

Ugiti49

Kadanshi ku uteku ka Yakubu a kubana u muku n ni

¹Ɗa Yakubu u ɗekei muku n ni ɗa u danai, <<Ɓolongi na, ka̱ta̱ n dana ɗa̱ i na i kuciya̱ ɗa̱ a ayin a na a̱ kuta̱wa̱.

²<<Ɓolongi ka̱ta̱ i pana, a̱ɗa̱ muku n Yakubu,Panakai esheku a̱ ɗa̱ Isaraila.

³<<Ruben avu ɗa magaji ma̱ va̱,utsura u na wi urotu wu utsura u va̱n tsugbayin tsa̱ a̱miki, koɓolo n utsura kpamu.⁴Vu tsu ka̱na̱ kaci ba, vi ta̱ an mala, vo kudoku vo kokpo vuza gbayin kpamu ba.Adama a na vu goyo ta̱ kajiba ke eshevu,vu ukai kaꞋa unata.

⁵<<Simiyon n Levi vuza ɗa n vuza ni,otokobi e le ucanuku u vishili u ɗa.⁶Wuma u va̱ ka̱ta̱ vu uwa e kusheshe ku le baka̱ta̱ n uwa o kuyongo ku le ba,adama a na ele una ta̱ uma n wupa u le,usuɗukpi wa̱ a̱ɗu e le u zuwai le a unai aza utsura.⁷O okpo wasasa adama a wupa u le,wupa u le u na̱mgba̱ ta̱ ka̱uta u kupece le nannai a iɗika yi Isaraila.

⁸<<Avu Yahuda aza a̱ nu i ta̱ a kucikpa wu.Kukiye ku nu ki ta̱ a̱ kuka̱na̱ irala i nu.Muku mo olobo me eshevu mi ta̱ a̱ kukuɗa̱nku wu.⁹Avu Yahuda kawu ɗa vi,maku ma̱ va̱ vu unai manama ɗa vu bonoi a kakagu,vu vaku vu ba̱rukpa̱i tsu kawu,tsu kawu babu vuza na u koꞋuso wu.¹⁰Avu Yahuda tsugono tsa̱ kuka̱sukpa̱ kpaꞋa ku nu ba,ko kalangu ko tsugono ka̱ kuka̱sukpa̱ ntsukaya n nu ba,ali ayin a na vuza na u gaꞋin u ta̱wa̱ u yawa,ka̱ta̱ aduniyan dem o okpo a̱ ni.¹¹Wi ta̱ a kushiya majaki ma̱ ni a maɗanga mi itacishi.U shiya maꞋa a kacaka ka na ka laꞋi n kugaꞋan,ka̱ta̱ u za̱Ꞌa̱ ntogu n ni m mini mu umaci wu nɗanga,u za̱Ꞌa̱ kashiyatsu ka̱ ni feu n umaci u na u shilyamgbai.¹²A̱shi a̱ ni i ta̱ a kulaꞋa ma̱ra̱ ushili,ka̱ta̱ anga a̱ ni a laꞋa mani wa̱ri.

¹³<<Avu Zabalun, a̱ ka̱kina̱ ka̱ mini kaꞋa va̱ kuda̱sa̱ngu,vo okpo ubuta̱ u kuzuwa antsuuteku u ni wi ta̱ a kuyawa ali a kubana uɓon u Sidon.

¹⁴<<Avu Isaka majaki maꞋa mu utsura,vi ta̱ ivaꞋin e mere ma mbana mu ucanuku.¹⁵We ene ta̱ ubuta̱ u kuvuka u gaꞋan ta̱,iɗika i ni yi ta̱ n uyoꞋo wi ida̱shi;ɗa u kuɗa̱ngi adama a na u zuwaka avangatsu a̱ ni ucanuku,wo okpoi kagbashi ku ulinga.

¹⁶<<Dan wi ta̱ o kokpo mogono ma̱ aza ni.Tsu umaci u yoku a Isaraila.¹⁷Dan wi ta̱ an koko ka na ka shamgbai ɗevu n uye,koko ko tsukono paki n uye,ka na ka tsu kapa kodoku a̱ ka̱civa̱adama a na kakumbi ka̱ ni ka̱ yikpa̱ melene.¹⁸Mi ta̱ a kuvana wishi u nu Vuzavaguɗu.

¹⁹<<Avu Gadu aza a̱ ma̱ga̱la̱ka̱ i ta̱ a kubana a̱ shilika̱ n avu,ama a̱yi feu wi ta̱ a kutsupa le.

²⁰<<Avu Ashera vi ta̱ o kokpo vuza vu uciyi n a̱bunda̱i,ali vu neꞋe ngono ilikulyaꞋa.

²¹<<Avu Nafutali vi ta̱ a na mereꞋe ma na a̱ ka̱sukpa̱i ba̱rima na ma matsai muku n singai.

²²<<Avu Isufu avu ɗa maku ma̱ va̱ ma na ma tsu matsa muku,a na uyaꞋan u na wi ɗevu n kuyeneka̱ta̱ u tatsa u kumba mashilya ali u matsa ba̱ri.²³Atain a bankai ni n vishili,a tawai ni magaba.²⁴Ama utan u ni u shamgbai n utsura gbam-gbam,ɗa ekiye a̱ ni a̱ ciya̱i katsura,adama e kukiye ku utsura ku Ka̱shile ka Yakubu.N adama a Maguɓi mi Isaraila,²⁵Ka̱shile ke eshevu kaꞋa vuza na u ɓa̱nka̱i nuKa̱shile Uba̱nga̱ri vuza na u zuwakai nu una̱singai,una̱singai u mini ma gaɗi,koɓolo m mini n a̱bunda̱i ma na mi punu iɗika,una̱singai wi ilikuzuwa m muku n a̱bunda̱i.²⁶Una̱singai we eshevu u laꞋa ta̱una̱singai wu nsasan u na mi ko wannai,u laꞋi kpamu tsuloboi tsu nsasan n ko wannai.YaꞋan ili i nampa i yongo u Isufu,a̱ kuca̱n ku vuza na a zagbai a ka̱tsuma̱ ka̱ aza ni.

²⁷<<Bayami vi ta̱ tsu kanama ka na ki n kambulu n a̱bunda̱i.N usana vi ta̱ n kutsa̱n ka̱ta̱ vu tamba inyama,n kulivi vu tsu pece ta̱ i na vi ciya̱i gbani.>>

²⁸Na va ɗaɗa muku kupa nu nre wu umaci wi Isaraila, ili i na esheku e le a danai le i ɗa na a ayin a na u zuwakai le una̱singai, u zuwakai yaba dem vi le una̱singai tsu na u gaꞋin.

Ukpa̱ u Yakubu

²⁹Ɗa Yakubu u nekei le kadanshi ka nampa u danai, <<Gogo na mi ta̱ a kuciga ma bana ma cina ikaya i va̱. Ciɗa̱ngi mu n ikaya i va̱ a aɓatsu a̱ uba̱nga̱ u Iforono ka vuza vu Hitiya,³⁰a kaɓatsu a̱ ka̱ba̱nga̱ ka Makapele, ɗevu m Mamure a iɗika i KanaꞋana. Ubuta̱ u na Ibirahi u tsulai a Iforono a̱ ubuta̱ u ka̱ciɗa̱ u ka vuza vu Hitiya.³¹Ta ɗe a̱ ciɗa̱ngi Ibirahi n vuka vi ni Saratu, ta ɗe a̱ ciɗa̱ngi kpamu Ishaku n Rebeka, ta ɗe kpamu n ciɗa̱ngi Liyatu.³²Ciɗa̱ngi mu a kaɓatsu ka na ki a̱ ubuta̱ u na a tsulai wa aza a Hitiya.>>

³³Ana Yakubu u kotsoi kuneke muku n ni kadanshi, ɗa u doku u vakushiki a ivaꞋantsu i ni, ɗa u yivikai ayinviki a ukocishi a̱ ni, u banai a̱ ubuta̱ wi ikaya i ni.