Ugiti3
Vuma u nusakai Ka̱shile
1Koko ka laꞋa ta̱ nnama n na Ka̱shile Vuzavaguɗu u yaꞋin dem n ugboji. Ɗa ke ecei vuka va, <<Mayu ɗa Ka̱shile ka danai, <Ka̱ta̱ i lyaꞋa umaci wu nɗanga u na wi punu a kashina ka ba?> >>2Ɗa vuka va vu danai koko kaꞋa, <<Ci ta̱ a kufuɗa tsa lyaꞋa umaci wu nɗanga dem n na mi punu a kashina ka,3ama Ka̱shile ka dana ta̱, <Ka̱ta̱ i lyaꞋa maɗanga ma na mi punu e mere ma kashina ma ba. Ko kusaꞋwa ka̱ta̱ i saꞋwa ba. Kanna ka na baci i saꞋwai maꞋa, yi ta̱ a̱ kukuwa̱.> >>4Ama ɗa koko ka danai vuka va, <<Mayun ɗa i kukuwa̱ ba.5Ka̱shile ka ke yeve ta̱ kanna ka na baci i lyaꞋi maɗanga ma, a̱shi a̱ ɗa̱ i ta̱ a ku paɗukpa, ka̱ta̱ kpamu yo okpo uteku tsu Ka̱shile. Yi ta̱ e kuyeve ili i gbanigbani n ili i singai.>>6Ana vuka va ve enei umaci u maɗanga wa wi ta̱ n ugaꞋin u kulyaꞋa, n ugaꞋin u kinda. U ciga ta̱ kpamu u ciya̱ cicoꞋo tsu na ci punu, ɗa u taꞋi umaci u maɗanga wa ɗa u lyaꞋi. Ɗa u neꞋi vali va, ɗaɗa u lyaꞋi feu.7Ɗa dem vi le a̱shi e le a paɗukpai, ɗa e enei ka̱ci ke le oshomboɗi. Ɗa a̱ jilya̱i a̱vuku a maɗanga ma̱ ma̱biri, ɗa a yaꞋankai ka̱ci ke le ciyampa.8N kulivi, ɗa a panai izumgbi i Ka̱shile Vuzavaguɗu a̱ kuka̱ra̱Ꞌa̱ a kashina ka, ɗa a sumai e sheɗeki punu a nɗanga n kashina ma.9Ama ɗa Ka̱shile Vuzavaguɗu ke ɗekei vuma va, u danai, <<Te ɗai vi?>>10Ɗa vuma va wu ushuki, <<M panaka wu ta̱ a̱ kuka̱ra̱Ꞌa̱ a kashina ɗaɗa m panai wovon, adama a na mi ta̱ koshomboɗi ɗa n sheɗeki.>>11Ɗa Ka̱shile Vuzavaguɗu we ecei ni, <<Yayi u danai koshomboɗi kaꞋa vi? Ko vi lyaꞋa ta̱ maɗanga ma na n danai ka̱ta̱ vi lyaꞋa ba va?>>12Ɗa vuma va u danai, <<Vuka vu na vu nekei mu u yongo nu mpa, a̱yi ɗa u taꞋi maɗanga ma ɗa u neꞋi mu ɗa n lyaꞋi.>>13Ka̱shile Vuzavaguɗu ke ecei vuka va, <<Yiɗa̱i i zuwai ɗa vi yaꞋin nannai?>>Ɗa wu ushuki, <<Koko kaꞋa ka̱ ya̱nsa̱i mu, ɗa n lyaꞋi.>>14Ɗa Ka̱shile Vuzavaguɗu u danai koko ka,<<An vi yaꞋin nannai, una̱ u na mi a kuyaꞋanka wu, u laꞋa ta̱ wu nnama m kpaꞋakoɓolo nu n kakamba dem ali nu nnu feu.Vi ta̱ a kuyaꞋan nwalu n ka̱tsuma̱ ka̱ nu o kurono a iɗika. Kubuta̱ ku ɗa vi kulyaꞋaa ayin a wuma a̱ nu ra̱ka̱.15Mi ta̱ a kuzuwaka ɗa̱ tsuralaavu n vuka va,a̱ ka̱tsuma̱ ka ntsukaya n nu koɓolo nu ntsukaya n vuka ma. Wi ta̱ o kuɓoso wu a kaci,ama avu vi ta̱ a kuluma yi a̱ ka̱civa̱.>>16Ɗa u danai vuka va,<<Vi ta̱ e kene atakaci n a̱bunda̱i a na n kuneke wu a̱ ubuta̱ u limata.Nu mɓa̱la̱ n ɗa va kumatsa muku.Ka̱ɗu ka̱ nu ki ta̱ o kuyongo a̱ ubuta̱ u vali nu,a̱yi ɗa ta na u kulyaꞋa tsugono wa̱ nu.>>17Ɗa Ka̱shile Vuzavaguɗu u danai A̱da̱mu, <<Adama a na vu pana ta̱ kadanshi ka vuka vu nu, ɗa vi lyaꞋi maɗanga ma na n danai nu <Ka̱ta̱ vi lyaꞋa ba,> adama a̱ nu n yaꞋanka ta̱ iɗika dem una̱,sai vi yaꞋan atakaci kafu vi lyaꞋa,ali kanna ka na vu kuwa̱i.18Iɗika yi ta̱ a kumatsa awana m mita̱ ma gbani-gbani,imacishi i kakamba i ɗa kpamu va kulyaꞋa.19Vi ta̱ e kulemgbekafu vi lyaꞋa ilikulya,ali kanna ka na vu bonoi punu a iɗika ya,adama a na ta punu vu uta̱i.Avu kubuta̱ ku ɗa,a̱ kubuta̱ ku ɗa kpamu vo kubono.>>20Ɗa A̱da̱mu u neꞋi vuka vi ni kula Hawa, adama a na a̱yi ɗa u kokpo akaya a uma ra̱ka̱.21Ɗa Ka̱shile Vuzavaguɗu u yaꞋankai A̱da̱mu n vuka vi ni aminya a ukpan.22Ɗa Vuzavaguɗu u danai, <<Gogo na vuma wo okpo ta̱ tsu tsu, u yeve ta̱ kasingai n kawuya. Ka̱ta̱ a̱ ka̱sukpa̱ yi u taꞋa ali u lyaꞋa a̱ ka̱tsuma̱ ka nɗanga n kuneke wuma n kasingai ba, ta lo wo yongo n wuma kowanai>>23Ɗa Ka̱shile Vuzavaguɗu u lokoi vuma va punu a Kashina ka Adini ka. Adama a na u bana u yaꞋan vicimba a̱ ubuta̱ u na a̱ uta̱ka̱i ni.24Ana u lokoi vuma va, ɗa u zuwai ɗe corobi a̱ na̱shi punu a kashina ka a uɓon u kasana, n otokobi a akina a kulyaꞋa una̱ u re dem adama a na a̱ sa̱nka̱ vuma va kuꞋuwa a kashina ka.