Leia Kuta̱ 15

Kuta̱15

Vishipa vu Musa

¹Ɗa Musa n aza a Isaraila a yaꞋin vishipa vu nampa va a kubana a̱ ubuta̱ u Vuzavaguɗu, mi ta̱ a kuyaꞋan vishipa vu kucikpa Vuzavaguɗu, adama a na a̱yi ɗa u ciya̱i ulyaꞋi u gbayin. U vakangi kodoku n kakumbi ka̱ ni dem a mala.²Vuzavaguɗu ɗa katsura ka̱ va̱ a̱yi ɗa kpamu vishipa vu va̱, a̱yi ɗa wishi u va̱. A̱yi ɗa Ka̱shile ka̱ va̱, mi ta̱ a kucikpa yi, Ka̱shile ke esheku a̱ va̱, n kucikpa yi ta̱.³Vuzavaguɗu kovonshi kaꞋa, kula ku ni ku ɗa feu Vuzavaguɗu.⁴Ekeke o odoku a FiriꞋauna n osoji a̱ ni, u vakangi le a mala. Aza a̱ gba̱ra̱-gba̱ra̱ a uzagbi a FiriꞋauna u niꞋwa̱nta̱ngi le a Mala ma Shili.⁵Ɗa mini mu uga̱vi ma palai le, ɗa a liɓai sai ɗaka tsu katali.⁶Kukiye ku singai ku nu Vuzavaguɗu ki ta̱ n tsugbayin n utsura, n kukiye ku singai ku nu ku ɗaɗa vu la̱nga̱sa̱i irala.⁷N tsugbayin tsu utsura tsu nu tsu ɗa vu poloi aza a na i a tsurala n avu. Ɗa vu tsunki le wupa u nu, vu songi le n akina a̱ nu tsu mita̱ me ɗekpu.⁸N utsura wa ayinviki a na a̱ uta̱i a̱ vunu vu nu, ɗa mala mo ɓolongi a̱ ubuta̱ u te. Mini ma̱ a̱bunda̱i mo bonoi ma yaꞋin mashilya, mala ma̱ kutsa̱i an katali e mere ma mala ma.⁹<<Vurala vi le vu danai,<N kusaɓa le ta̱, n kulyaꞋa le ta̱,n ku pecuku ta̱ ucanuku wa,n kuɗika ta̱ ili i na mi a kuciga,n kutala ta̱ kotokobi ka̱ va̱ka̱ta̱ ekiye a̱ va̱ a una le.>¹⁰Ama ɗa vu uvula̱i n ayinviki a̱ nu,ɗa mala ma palai le,ɗa a liɓai tsu ka̱ta̱mba̱punu a̱ mini ma gbayin.

¹¹<<Yayi a̱ ka̱tsuma̱ ka̱ a̱ma̱li wi uteku tsu nu Vuzavaguɗu?Yayi wi uteku tsu nu a̱ ka̱tsuma̱ ka tsugbayin n ciɗa, n utsura n tsugbayin a kuyaꞋan ili i mereve?¹²Vu ba̱ra̱kpa̱i kukiye ku usingai ku nuɗa iɗika i soɗongi le.

¹³<<N ucigi u gbayin u nu u ɗa vu ci yaꞋan kaguɓaka uma a̱ nu a na vi isai.A̱ ka̱tsuma̱ ku utsura u nu u ɗa va kuguɓa lea kubana ubuta̱ wi ida̱shi u ciɗa u nu.¹⁴Iɗika kakau yi ta̱ a kupana ka̱ta̱ i dagaza,una̱mgbi u ka̱tsuma̱ u ka̱na̱ ta̱ aza a Filisitiya.¹⁵Ngono n Edom mi ta̱ a kudagaza,aza a̱ gba̱ra̱-gba̱ra̱ a Mowabu i ta̱ a̱ kulima̱ adama atakaci,aza KanaꞋana i ta̱ a̱ kuniꞋwa̱n,¹⁶wovon n udagaji wi ta̱ a kuka̱na̱ le.Ama adama a utsura u kukiye ku nu,i ta̱ a kushamgba n utsura an katali,ali sai ayin a na uma a̱ nu a lazai, Vuzavaguɗu,ali sai ayin a na uma a na vu uta̱ka̱i a lazai.¹⁷Vi ta̱ a̱ kuɗika le ka̱ta̱ vu shikpa̱ le,a kusan ku nu,ubuta̱ u na avu Vuzavaguɗu vu lapulukai ka̱ci ka̱ nu,A̱ A̱Ꞌisa̱ a na avu Vuzavaguɗu, vu lapulukai ka̱ci ka̱ nu.¹⁸Vuzavaguɗu wi ta̱ a kulyaꞋa tsugono,ali ayin babu uteku.>>

¹⁹Ana odoku a FiriꞋauna n ekeke o odoku n akumbi e le a uwai a mala ma, ɗa Vuzavaguɗu u bonokoi m mini ma, u palai le m maꞋa, ama aza a Isaraila a walai a iɗika i ɗekpu punu e mere ma mala ma.²⁰Ɗa taku vu Haruna Miriyamu keneki, u ɗikai ma̱ka̱nlu e ekiye a̱ ni ɗa ta na a̱ma̱ci n a̱bunda̱i o tonoi ni, a̱ ka̱na̱i tsuwaꞋi n e jeꞋi.²¹Ɗa Miriyamu u yaꞋin vishipa vu nampa, <<Ci yaꞋankai Vuzavaguɗu vishipa, adama a na a̱yi ɗa u ciya̱i ulyaꞋi u gbayin. A̱yi ɗa u niꞋwa̱nta̱ngi odoku n akumbi e le dem a mala.>>

Mini mo okono mo okpoi mu uyoꞋo

²²Ɗaɗa Musa u tonoi n aza a Isaraila, ana a̱ ka̱sukpa̱i Mala ma Shili, ɗa u zuwai le a wala e meremune ma na e ci ɗeke Shuru. A yaꞋan ta̱ ayin a tatsu, ele a kuwala e meremune ma nanlo ama e ene mini ba.²³Ana a yawai a Mara a fuɗa o soꞋo mini ma ba, adama a na mini ma mi ta̱ n okono. (I ɗaɗa i zuwai ɗa e ɗekei ubuta̱ wa Mara.)²⁴Ɗa uma a yaꞋankai Musa mololo, a danai, <<Yiɗa̱i tsa ɗamgba tso soꞋo?>>

²⁵Ɗa Musa u shiꞋika̱i Vuzavaguɗu, ɗa Vuzavaguɗu u yotsongi ni kacaka ka maɗanga. Ɗa u ɗikai u vakangi kaꞋa punu a̱ mini ma, ɗa mini ma mo bonoi uyoꞋo. A̱ ubuta̱ wa ɗe ɗa Vuzavaguɗu u nekei le kupiꞋisa n wila̱, ɗa kpamu u kondoi le.²⁶Ɗa u danai, <<I pana baci ka̱la̱ka̱tsu ka Vuzavaguɗu Ka̱shile ka̱ ɗa̱ mayin, ɗa i yaꞋin ili i na i gaꞋin ni kpamu, ɗa i tonoi ili i na u danai derere. Ɗa kpamu i tonoi wila̱ u ni ra̱ka̱, mpa mi a̱ kutuka̱ ɗa̱ n ila̱nishi tsu na n suꞋuki aza a Masar ba, adama a na mpa ɗa Vuzavaguɗu vu na u tsu potsotongu ɗa̱.>>

²⁷Ɗaɗa uma a a yawai e Elim, a̱ ubuta̱ u na wi n a̱shi a̱ mini kupa n e re ni nshuwa amangatatsunkupa. Ɗa a vaki lo ɗevu n ubuta̱ u mini wa.