Read 2 SAMAILA 16

2 SAMAILA16

Dawuda n Ziba

¹Ana Dawuda u wu urangi gaɗi kusan va kenu, ɗa Ziba kagbashi ka Mefiboshetu ka gasai n a̱yi. Wi ta̱ nu Njaki n re ucaniki n boroji ali amangatawenre (200), koɓolon n akala e ɗekpu kpamu amangatawun (100), n a̱kutsu a umaci u mambulu n kedele ka ma̱kya̱n.²Ɗa mogono me ecei Ziba, yiɗa̱i i zuwai ɗa vu tukai n ili nampa?
<<Ɗa Ziba wu ushuki, n tuka̱ ta̱ n njaki ma adama a kpaꞋa ku mogono a̱ ciya̱ a kumba. Boroji n umaci wu nɗanga tamkpamu adama a na uma a̱ ciya̱ a lyaꞋa. Ma̱kya̱n tamkpamu adama a aza a na oꞋoi a kakamba a̱ ciya̱ o soꞋo.>>

³Ɗa Mogono me ecei, <<Teɗai Mefiboshetu matsukaya ma vuzagbayin vu nu Shawulu wi?>>
Ɗa Ziba wu ushuki mogono u danai, <<Wi ta̱ ɗe a Urushelima, adama a na wi ta̱ a̱ kusheshe kpaꞋa ki Isaraila i ta̱ o kubonoko yi n tsugono tsa akaya a̱ ni Shawulu.>>

⁴Ɗa Mogono ma danai Ziba, <<Ili ra̱ka̱ i na yi i Mefiboshetu anana yo okpo ta̱ i nu.>>
Ɗa Ziba u danai, <<Wuma u nu u geshe mogono, n kuɗa̱nku ta̱, yaꞋan ka̱na̱ kuciya̱ mapasa ma singai wa̱ nu nannai, vuzagbayin mogono.>>

Dawuda n Shimeyi

⁵Ana mogono Dawuda u yawai ɗevu n likuci i Bahurim, ɗa vuma vu yoku wu uta̱i u ka̱na̱i kushika yi. Vuma va kula kuni ku ɗa Shimeyi, maku ma Gera, a kumaci ku Shawulu.⁶Ɗa Shimeya va u ka̱na̱i ku vara Dawuda n agbashi a̱ ni n atali, ko ana wo okpoi uma a̱ ni n osoji ra̱ka̱ a kanza ta̱ mogono Dawuda.⁷Shimeya u ka̱na̱i ku shikusa Dawuda n u danai, <<Wala, wala, vuza munuka, vuma vu gbani-gbani.⁸Vuzavaguɗu u tsupaka ta̱ Shawulu mpasa n uma a na vu unai a kpaꞋa ku ni, vuza na vu isai tsugono ci ni. Gogo na Vuzavaguɗu u neke ta̱ tsugono tsa u Abusalom, maku ma̱ nu. La̱na̱, kagbanigbani ka cina wu ta̱, adama a na avu vuza vu munuka ɗa.>>

⁹Ɗa Abishayi vuza na e ci ɗeke a̱na̱ku a̱ ni Zeruya u danai mogono, <<Wuma unu u geshe, Yiɗa̱i i zuwai ɗa vu ka̱sukpa̱i ka̱kuwishi ke mesheꞋe ka nampa ki a ku shikusa Vuzagbayin mogono ma̱ va̱? YaꞋan n bana n gbatya kaci ka̱ ni.>>

¹⁰Ama ɗa mogono ma danai, <<Yiɗa̱i i gasai mpa a̱ɗa̱, a̱ ɗa̱ muku n Zeruya? Wi baci a kuyaꞋan ishikushi ya adama a na Vuzavaguɗu ɗa u danai ni, <Shika Dawuda,> Yayi u ku ece yi, <Yiɗa̱i i zuwai ɗa vu yaꞋin nannai?> >>¹¹Ɗa Dawuda u danai Abishayi n aza ulinga a̱ ni ra̱ka̱, <<Maku ma na mpa n matsai, mi baci a kula̱nsa̱ wuma u va̱ kuna, teɗai tamkpamu vuza vu Bayami vu nampa. Ka̱sukpa̱i ni u lyaꞋa kelime n kushika mu, adama a na Vuzavaguɗu ɗa u danai ni u shika mu.¹²U gaꞋan ba Vuzavaguɗu wi ta̱ a kupana asuvayali a̱ va̱, ka̱ta̱ u kucikpa u yaꞋan ka mu kasingai adama ishikushi i na mi a kupana anana.>>

¹³Ɗa Dawuda koɓolo n uma a̱ ni a lyaꞋi kelime nu nwalu uye, Shimeya tamkpamu o kutono le n kakambu ka kusan a kushika le n u varai le n atali n u tsunki le kayala.¹⁴Ɗa mogono n uma a na i koɓolo n a̱yi a yawai a̱ ubuta̱ u na a kubana n woꞋwi ka̱u. Ɗa uvukai lo.

Hushayi u gasai n Abusalom

¹⁵Ɗa makyan kenu, Abusalom koɓolo n aza a Isaraila a na i koɓolo n a̱yi a yawai a Urushelima, Ahitofelu feu wi ta̱ koɓolo n a̱yi.¹⁶Ana Hushayi vuza vu Ariki ka̱ja̱Ꞌa̱ ka Dawuda u yawai ubuta̱ u Abusalom ɗa u danai, <<Wuma u nu u geshe mogono! Wuma u nu u geshe mogono!>>

¹⁷Ɗa Abusalom we ecei Hushayi, <<Ucigi u na vi a kuyaꞋanka ka̱ja̱Ꞌa̱ ka̱ nu u ɗan na? Yiɗa̱i i zuwai ɗa vu kpa̱ɗa̱i kutono ka̱ja̱Ꞌa̱ ka̱ nu.>>

¹⁸Ɗa Hushayi u danai Abusalom, <<A̱Ꞌa̱, mpa mi ta̱ a̱ kucina̱ ku vuza na Vuzavaguɗu koɓolo uma aza a Isaraila a zagbai. N a̱yi ɗa mpa mi o kuyongo.¹⁹N nannai dem, yayi n kuyaꞋanka tsugbashi maku ma Dawuda ma a ba? Uteku tsu na n yaꞋankai eshevu, ta feu maku yaꞋan ka wu nannai.>>

²⁰Ɗa Abusalom u danai Ahitofelu, <<Ta baci nannai, neke tsu odoki a̱ nu. Yiɗa̱i tsa kuyaꞋan?>>²¹Ɗa Ahitofelu u danai Abusalom, <<Bana vu vaku n a̱ma̱ci a gbani e esheku a̱ nu aza a na u ka̱sukpa̱i inda kpaꞋa ku ni. Vu yaꞋan baci nannai aza a Isaraila i ta̱ e kuyeve ana vu goyoi eshevu, tsu nanlo tsu ɗa u kuzuwa aza a na i o kutono wu a lasuka kuciga wu.>>²²Ɗa a yaꞋan kai Abusalom ma̱va̱li a kpaꞋa ku mogono. Ɗa Abusalom u uwai, ɗa u vaki n a̱ma̱ci a gbani esheku a̱ ni aza a Isaraila e kene.²³A makyan ma nanlo uma ra̱ka̱ a tsu pana ta̱ odoki a Ahitofelu adanshi kadanshi ka̱ Ka̱shile kaꞋa. Ta odoki a Ahitofelu i n utsura u Dawuda n Abusalom nannai.