Read 2 SAMAILA 1

2 SAMAILA1

Dawuda u panai ukpa̱ u Shawulu

¹Ana shawulu u kuwa̱i, ci na ɗe Dawuda n uma a̱ ni o bono n a̱ ubuta̱ u na a lyaꞋi aza a Ameleki n kuvon, ɗa a̱ da̱sa̱ngi a Zikilagu ali ayin ere.²A kanna ka tatsu ɗa vuma vu yoku, wu uta̱i ɗe a uɓon wa̱ a̱tsura̱ a shawulu, m motogu ukari, kpamu n kubuta̱ a kaci adama una̱mgbi u ka̱tsuma̱ u ni. Ana u yawai u Dawuda ɗa u kuɗa̱ngi a iɗika ɗa u nekei ni tsugbayin.³Ɗa Dawuda we ecei ni, <<Te ɗai vu uta̱i?>> Ɗa vuma va wu ushuki, <<N laꞋaka ta̱ a̱ ka̱tsura̱ ko osoji ka aza a Isaraila.>>⁴Ɗa Dawuda we ecei ni kpamu,<<Nini ɗai ka ki ɗe? Dana mu.>>
Ɗa u danai, <<Osoji a Isaraila a suma ta̱ a̱ ubuta̱ u kuvon, kpamu osoji a̱bunda̱i a̱ kuwa̱ ta̱. Shawulu feu n kolobo ka̱ ni Janata a̱ kuwa̱ ta̱.>>

⁵Ɗa Dawuda we ecei kolobo ka na ka̱ tuka̱i n arabali a, <<Nini ɗai vu yevei an Shawulu n kolobo ka̱ ni Janata a̱ kuwa̱ ta̱?>>

⁶Ɗa kolobo ka ka̱ ushuki ɗa u danai, <<U gaꞋaka ta̱ a na mi lo gaɗi vu kusan ku Gilibowa, ɗa me enei Shawulu u tsubaki a masara ma̱ ni, ɗa me enei ekeke odoku n akumbi odoku a irala dakakai kuyawa ɗevu n a̱yi.⁷Ana u vadalukpai ɗa we enei mu ɗa u ɗekei mu, ɗa mu ushuki, n danai, <Mpa ɗa na>⁸Ɗa wu ecei mu, <Avu ɗa ya?> Ɗa mu ushuki, n danai, <Mpa vuza vu Ameleki ɗa.>⁹Ɗa u danai mu, <Yawa ɗevu nu mpa vu una mu, adama a na atakaci a yawa mu ta̱, kpamu mi a kulaꞋa ba.>¹⁰Ɗa n yawai ɗevu n a̱yi ɗa mu unai ni, adama a na n yeve ta̱ mayun wi a kulaꞋa ba adama a na a yaꞋanki ta̱ usa̱n ka̱u. Ɗa n ɗikai oroliko a na i a kaci ka̱ ni koɓolo m mashingi ma na mi o kubolu ku ni kpamu, a ɗanna n tuka̱i nu ra̱ka̱ vuzagbayin vu va̱.>>¹¹Ɗa Dawuda u remei motogu ma̱ ni u karai adama a̱ una̱mgbi u ka̱tsuma̱, ta feu uma a na i koɓolo n a̱yi a yaꞋin nannai¹²Ɗa a̱ na̱mgba̱i ka̱tsuma̱ a̱ shika̱i, kpamu ɗa a yaꞋin kakuli ali a kubana kulivi adama a Shawulu n kolobo ka̱ ni Janata, kpamu adama a uma a Vuzavaguɗu m kpaꞋa ka aza a Isaraila, adama a na a bana ta̱ ukpa̱ u kotokobi.

¹³Ɗa Dawuda we ecei kolobo ka na ka̱ tuka̱i n arabali a, u danai, <<Teɗai vu uta̱i?>>
Ɗa wu ushuki, <<Mpa vuza vu Ameleki ɗa, ama ci ta̱ ida̱shi a iɗika yi Isaraila.>>

¹⁴Ɗa Dawuda u danai ni, <<Yiɗa̱i i zuwai ɗa vu kpa̱ɗa̱i kupana ka̱rikpa̱ni ka̱ kuɗa̱ngusa̱ kukiye ku nu vu una Mazagbi ma Vuzavaguɗu?>>¹⁵Ɗa Dawuda u ɗekei kolobo ke te a̱ ka̱tsuma̱ ko olobo a, u danai, <<Bana, vu una yi.>> Ɗa u lapai ni u vakangi a iɗika.¹⁶Ɗa Dawuda u danai vuza vu Amaleki va, <<Mpasa n nu mi ta̱ a kaci ka̱ nu, adama a na nu una̱ u nu u ɗa vu dansai, <Vu una ta̱ Mazagbi ma Vuzavaguɗu.> >>

Dawuda u yaꞋin kpalu ku Shawulu n Janata

¹⁷Ɗa Dawuda u zuɓa̱i vishipa vu kpalu ku Shawulu n kolobo ka̱ ni Janata.¹⁸Ɗa u danai a piꞋisaka aza a Yahuda vishipa va, vu ɗa vi ta̱ uɗani a katagarda ka Jasharu.¹⁹<<Isaraila una ta̱ tsugbayin tsu nu,una ta aza a tsugbayin aginda a̱ nu,La̱na̱ biꞋi osoji a utsura a̱ yikpa̱i.²⁰Ka̱ta̱ a dana Gatu ba,ka̱ta̱ feu a sala kaꞋa a uye kakau u Ashikelon ba,ta lo nkere ma aza a Filisitiya n kuyaꞋan ma̱za̱nga̱,ta lo nkere ma aza a ofoto a kuyaꞋan ma̱za̱nga̱.

²¹<<A̱ɗa̱ Nsasan n Gilibowa,yaꞋan o doku a̱ ciya̱ ciza ko mini gaɗi wa̱ a̱ɗa̱ ba,yaꞋan ashina a̱ ɗa̱ a̱ kpa̱ɗa̱ kudoku kumatsa ili i makara.Adama a na ta ɗe a̱ la̱nga̱sa̱i nra̱ga̱ mo osoji a utsura gbani,ma̱ra̱ga̱ ma Shawulu kpamu mo doku ma̱ ciya̱ maniꞋin ba.²²Utan u Janata u munuka u ɗa,kotokobi ka Shawulu ki n asuvayali ba,ka tsu una ta̱ osoji a utsura,kpamu ka tsu una ta̱ irala.

²³<<Shawulu n Janata ncigi n ɗa, mu usuɓi kpamu.A wuma i ta̱ koɓolo a̱ ukpa̱ kpamu i ta̱ koɓolo,a laꞋa ta̱ mashangi o moloko,a laꞋa ta̱ kawu utsura.

²⁴<<A̱ɗa̱ nkere mi Isaraila,shika̱i adama a Shawulu,a̱yi na u yaꞋankai ɗa̱ ntogu mi ikebea̱yi na u ukai ɗa̱ ntogu n tsuzogu ma azanariya.

²⁵<<Osoji a utsura a̱ kuwa̱ ta̱, una le ta̱ a̱ ubuta̱ u kuvon.Janata u vaku ta̱ ukpa̱ a nsasan.²⁶N na̱mgba̱ ta̱ ka̱tsuma̱ ka̱u adama a̱ nu, vuza va̱ Janata,macigi maꞋa vi wa̱ a va̱,ucigi u nu wa̱ va̱ u gbani u ɗa ba,u laꞋa ta̱ ucigi u maku ma vuka m mavali.

²⁷<<Ɗanna osoji a utsura a̱ yikpa̱i,kpamu ucanuku u kuvon u le u na̱mgba̱ ta̱.>>