Read Luka 17

Luka17

Yesu na tsar atu yi zup mbombom

¹Yesu nadi amun kop ma, “Kiki yami ti dung andishir ajira sher zup mbombom ya ti nyi. Anya awami tisi ni gir kiki yama nyimma.²Awami ati dung gin ming ku amumun abama aba roku, ni nang aba kor wu nkpang yi koˈ itoma tiba tok wu agyoˈ ming nyaˈ.³Ta sima gina bi to atumin ananan.
“Nden zumin na tara wa, wabi tsing wu. Nta kam san, wabi tsoˈ aguru ma.⁴Nta si na tara wa adza tangba arika gin, asi wa kam asan ta angaˈ ni wa adza tangba ta di, ‘Ngga ni tara wa.’ Ko wa ti kak, wa tsoˈ aguru ma.”

Amung kop na ben Yesu ba mme zupdidik man

⁵Asi abi tum na di wa Atikop, “Wabi mme kwara zup didik mbor.”

⁶Atikop na tayim bama tadi, “Mi gina tisi ni zup didik yami niti mi gyom ni mkpyeng masta, yami si tsap nang ming ku bibi boboˈ gina tidi nkukun kum nkpyaˈ kama, ‘Wabi tun tumi ayang nga, ti koma ti tip tumi ming nyaˈ.’ Kati dzip kiyami gina ni ban.”

Ndum ku gan

⁷“Aba di gin ming min asi ni gan, awami awum wu, ti aba aya akam wu awantam. Nga wa ming min, mi gan na ta ngaˈ ari ankwang, ati diwu, ‘Namma, ti ngaˈ ti jisong ti ri kiri’?⁸Ba ti diwu, ‘Nam ngga kiri yi rikagur aring, ti ngga bi ri ti so, aring wabi sin ri mi ti so sang yi?’⁹Ati nyer gan na mi na nam ndum ma kami na di aba nam?¹⁰Yi sema ne gina, gong kami gina ni nam boboˈ kiyami si ananan, gina bi di, ‘Kwara si agan abami ba kwara ni mar kinung baˈ. Kwara ni nak nam ndum mbor ankyaˈ.’ ”

Yesu na nam abi Ankpuk Awur

¹¹Arika anung nga ma Yesu atsin na koma Rushelima asi awa dzip wong ku mmi Samariya nebi mmi Galili.¹²Ati rir vin ntun nung ya, asi abi ankpuˈ mi awur siba amara akpa newu, ta tir shan.¹³Asi aba gi akor tadi, “Wa Yesu, Atikop, wabi kun kwara ma.”

¹⁴Mi Yesu na yik ba asi adi ba, “Koma ti tsar gin itumin ni abi tok ankpur tiba yik gina.” Siba si ming ku tsin tsir ankyaˈ asi nam ba.

¹⁵Gin ming mana na yik awa na wyer, asi awa akam akoma ni Yesu, ta dibi gbar Arik ni kor kpankpang.¹⁶Na nyi ta jido mmimi iti ku Yesu, ta nyer wu. Awa asi ndishir awuni Samariya.

¹⁷Yesu na rip, “Ndi asi andishir awur na nam ba? Mbir atiris ase?¹⁸Ani ni dung asi tsin awa ma ankyaˈ na kam ngaˈ te aba ti gbar saˈ Arik?”¹⁹Asi Yesu adi wu, “Gur koma kimi, zup didik mi ni dung wa ni wyer.”

Mi Song ku Arik ka nyi

²⁰Andishira abi Farisi anung bana rip Yesu nkpang kami song Arik kati nyi, siwa adi ba, “Nanam to, song Arik basi ne ayi ati yik ka baˈ.²¹Ba awami ati, di toka ayang, ko aba di toku amung. Ti song Arik kasi ming min.”

²²Yesu na adi amun kop ma, “Nkpang kati nyi kami gina ti gina bi yik arika gin ming nvi yi Zu Ndishir, nema ba gina ti yik baˈ.²³Andishir ba di gina, ‘To ka amung,’ ‘To ka ayang.’ Nema kɨr gina bi tsur dzip ba gin baˈ.²⁴Arik awami Zu Ndishir ati ya kam angaˈ, ati si mi nne ya der ri shu, ti sher tongter ku gong mmimi kika ti koma kuku.²⁵Nema se na vung ti je awowon aring, mi andishir abi nkpang kama ba kaˈ wu.

²⁶“Yi tisi mi, ni nam nkpang ku Nuhu, ti sima nkpang ku Zu ndishir.²⁷Andishir bana dibi ri ti so, anirum bana ta amba, ta nik amumun aman ngah, har arika awami Nuhu na rir gum, asi awur anpyaˈ agur ta dar mbir andishir boboˈ.

²⁸“Asima yani si nkpang ku Lot. Andishir ba ri ta so, aba rep ta vuu rep, aba tip kiki kankang, aba mme akop.²⁹Nema arika awami Lot na ru ntun Sidom, siba shur nkpang yi wur ari shu ti gbu mbir andishir, boboˈ.

³⁰“Yati si ama arika awami ati tsar Zu ndishir abum.³¹Arika ma, awami asi itu tar kɨr aba ji tadi awa nyi bi vuu kikima ming kop. Nema awami ta koma ankwang, kɨr aba ngaˈ bi tsoˈ kinung kop baˈ.³²Gina bi shum uwa Lot.³³Awami ati aba ta vɨr ma gyoˈ, ati wop ka rak akana, nema awami ata kak vɨrma, ati yik ka.³⁴Ngga ban gina, buu yami kiyama ti nam ati yik andishir awaa baku kur kikur gin, ati tsoˈ gin, ta dung gin.³⁵Amba awaa ati si baku koˈ gbu ndo, ati tsoˈ gin, ta dung gin.”³⁶(Andishir awaa bati si ankwang, ati tsoˈ gin ta dung gin.)

³⁷“Asi ani Atikop?” Ba rip Yesu. Se awa tayima ta di “Abum awami kum kasima, asi bama ankpang ba bing nga.”