2 Tesalonika2
1Parari tane Sen Yesus Kristusi riama wane kong tampandura kong I pa, antorewara we antoneta pa mia,2imbaro mendeo mesanekaeng wea pa pe. Mendeo mendoaoa parari arera we nyontaraipei doyo deduta na duainunungpei sopana pe, ete parari kawio we nabipa engkakera pa pe, ete parari nyontarai etoyo piana pa antotoi na weraung pei pararia to, topino Seni ne a we teweri ma pa piana kikeu to.3Topitotoi tato mendeo mendoao kawio we nyontarai embeangkari paya entopana toyana pa pe. Wo a yani riama wane wa, mana andi pitau nini pai kemang wo; aino nyontarai empau ingkai empika Kristusi kong Nyontarai Memuna we ingkai wemuna-munai pai ingkai denyawi netaraipai,4na anerarong tedai ingkai biateta Allai kong deparandini we andi tedai raweina warui nyombatangnai we nyontarai esomi weya pa kuira. Kong ria meyoi na Allai Ne Manu Mamarang pai na bendari Yerusalemi mae doyo denyawa we iwo Allai dina.5Mesaneaoa we piyana pa piana ekawiora pampang we mia to, na awe enai kong mia pa.6Mae nina ne mia mesaneoa parari pitoai dongwido nyontarai memuna yani pai, impaina i ingkai denyawa netaraipai ki na a we Allai kiutua wei pa.7Tutu na anyuing, Paya we nyari pimamuna pai piana meriwa to, mana nina ei riu widori. Topino Allai pika we riuwidori pai mamo,8na a yani pai di Nyontarai Memuna pai ingkai denyawi netaraipai ki, mana Sen Yesusi ingkai miuni na Ne aseng na worengpa kong nyari wemuna-munai na a we I ingkai riama pa.9Nyontarai Memuna yani pai ingkai riama na Nyombatang pai ne paya pa. I ingkai nyari pitantuma pa pitau kong pi aneaerai pitau we donung na angkakari pa.10I ingkai nyari pitau wemoyawa pa we weangkari nyontarai we ingkai emuna-munai paya tutu ya empikara kong esaneaoa wa anyau wetarai na Allai we kio pariri weya pa.11Aidonane Allai dong ya etadu kaeng pa, impaina dong ya endoao pi weangkari pa,12imbaro nyontarai paya kuira we endoaoa piwe taraipa wa kong esanewe pimamunapa ingkai etadu mambabati pa.13Toyana ki mana antoru andi antotopang piboki pampang wu Allai tutu mia, neta we Seni anewiwu miapa, wo Allai na retenangpa piana diri mia we metadu pariripa na Duainunung Mamarang we dong mia memamarang pa, kong na kawio wetarai mendoaoa pa.14We toyana pa Allai yau mia na Ne Arera Weweng we antobuwua we miapa, impaina mia tato metadu Yesus Kristusi, tane Seni ne wedea tedai pa.15Tutu yana pa, neta pa mia metoa maitui mae mendu na anyau we piana mentaraoa na antoru pa, na arera we antokawiora pa kong we antotoi pa.16Kong I tane Sen Yesus Kristusi, kong Allai, tantamami pai, we na ne weweng dona pinoma we tata kong piana dong riroi we woroi-woroi pa kong dong tata tasanesa ne weng we tata pa,17topino riroi tata kong dong tasanerarongnei paya na mariwa tanari kong kawio tantopana we mai pa.
The Seed Company