Kaiwo Riwangsoai22
1Wonongmi bengne mani, mahikai sewa weru nemu ra bitoya,inontarai siai etato wau mani, mahikai sewa weru peraki tuti emasinei.2Inontarai mano ne ra bitoya tuti mano ne parifoi mani umasi,Yahwei Dino niari suru ne.3Inontarai mano nungkamiei wewu tofongfoi mani ambori dediwa, masino deti karirafo da wei ma,wape inontarai mano wiro deitawang turura kahafoi da pampang, ampefe sobu karirafo.4Inontarai mano enerorong tewawa, yoaso Yahwei tuti somi wei mani,ambori ne ra bitoya, wonongfo beng tuti darang na mai.5Inontarai kerirafoi mani, ne rangfoi sefangna ababo tuti waitepari,ampefe mandoni dino miaya we kiaharai weru dadirafo mani, wiro da ria inontarai nani ne rangfoi fanai.6Bounau arikang nesa we etiri rang mesifoi,ambori paria eweinongkutung mani, wiro era weru rang nani kaha.7Inontarai mano ne ra bitoyafoi weparenta sau inontarai mano ne pari fifoi,tuti inontarai mano kia fianggengno wiro biaita kaharai mani, inontarai mano dohong fianggeng weifoi wemambiriu sauwi.8Inontarai mano sanang neo karirafo mani, ambori deting neo karirafo kontai,tuti ne mambiriu we sahawatawang inontarai siaifo ambori werea.9Inontarai mano enerorong dentengfoi ambori sobu moang na Yahwei,weo deto ne fiangfo we inontarai mano ne pari fifoi.10Ata inontarai mano enerireuwafoi, ambori mamunafo nai,tuti fotou madu kahera wawerahai tuti kaiwo enemirireuwafo.11Inontarai mano miaya we enerorongfoi mirarebanai,tuti medu kaiwo bengfo mani, i ambori wemaniwowiri we mananufoi.12Yahwei urengfo nayai na inontarai mano medu waitawangnai werorongfo ambori nai fanai,wape I deiaya inontarai mano miaya we tetofafo.13Inontarai mano ureng marirafoi niayai na munufo terai,medu deyo, “Singa manei niayai na borieifo, dohonao kiri yau na rang rabungfe.”14Wiwing dirufoi borongfo mani toyario kamirei berorong,inontarai mano Yahwei kesouwi foi ambori saurarang kamireifoi.15Bonggoifo tataha na arikang fosa enemirorongfoi,wape aitatohi reafoi we aunausa ambori tawingsa weru ene bonggoifo.16Masino tahatawang inontarai mano ne pari fifoi ambori nemu ra bitoya,ete bohong fikahutu we inontarai mano ne ra bitoyafoi, nana mani mantaung wauno ambori weinontarai mano ne pari fi.17Taramu sauao kaiwo riwangsoai ninai na inontarai mano esawai,boti sauao nehu iwaitawangnai werorongno yeunauwai we waune.18Wau ambori furaise we kaiwo ninai, boraratai na enemurorongwai,ambori moinenang we boisaharai we inontarai siai.19Yeunau fininai kai we wau na kutu ninai,ambori roaso Yahwei.20Yau kawurua itoi kaiwo riwangsoai piareia sura ninai,neo werorongfo mani kaiwo aunau tuti waitawangnai werorongno bengfo.21Kaiwo ninai ambori dohong wau boitawangno maifo tuti tarai antufo,tuti kontai ambori boisaharai na mai we inontarai mano demi wau foi.22Wiro bowa inontarai ne pari fifoi fanai, weo finahang fefe,tuti na kutu inontaraifoi doa medu sawatutiri na inontarai mano ehutukaiwofosa earomifo mani, wiro tahatawangni fanai.23Weo Yahwei sawatutu ne kaiwofo,tuti kia inontarai mano dewarifoi nuanifoi.24Wiro furao inontarai mano ne rika menikapoifoi fanai,wiro furao inontarai mano kesou biriufoi fanai,25ambori wiro nemu tarai toyari i kaha,tuti wiro bapa waitepari we mantaung wau kaha.26Wiro borerai we inontarai siaiwe bai kutu ne fio kiafo fanai.27Weo masino wiro bai fio kiafo kaha mani, ambori eha nemu fianggengwa kai,tuti nemu fata benanaiwai.28Wiro ka ruareafoi weru kahofa mamo,neo kawurua wereng fosa etohongni wiatai na fafongpa fanai.29Boti mano sewai na yu fifo manei kawuru ampane?I ambori yufi fiata mananu fosa, wiro fiata inontarai batang fosa kaha.
The Seed Company