Kaiwo Riwangsoai12
1Mandoni dino eneo waitawangnai werorongfo mani, i kontai miaya we sobu kaiwo aunaufowape mandoni dino enerireu kaiwo uarafo mani, webonggoi.2Inontarai dentengfoi Yahwei eneoi,wape inontarai mano sang neo karirafo mani, Dohong aiboi wei.3Inontarai wiro doara pepaya kaha weo niari karirafo,wape inontarai mesifoi mani wenewara mitu wiro minihingna kaha.4Wiwing mano sewaifoi mani we sapewi mampofa we ne mangfoi,wape mano niari mamayafoi mani toyari maninangno niari ne mangfoi neina piro.5Inontarai mesifoi fio samafo mani, doa rahangnai,inontarai kerirafoi miaya we tetofa.6Kaiwo inontarai kerirafoi medurafo mani, miung inontarai siai,wape inontarai warang maifoi borongfo mani, sawing inontarai weru ne karirafo.7Inontarai kerirafoi sawai, donio wioru,wape inontarai mesifoi ne munurorongfo mani, nayai pampang.8Inontarai mano enetituai kariri neo maifo ambori efiai,wape inontarai mano enetituai bonggoifo ambori enemirireuwi.9Neo mahikai sewa mani, tawe inontarai batang, wape tarufi we mantaung tata,weru inontarai mano niariri fiabai, wape ne fiang wiro demoyara kaha.10Inontarai mesifoi deitawang saua ne fiahung fosa etarangfo,wape inontarai kerirafoi niari kanggani fiahung fosa.11Mandoni dino niari romi mani, ambori memosi na fiang,wape mandoni dino enerorong sopuayai mani, wiro enetituai kariri neo maifo kaha.12Inontarai kerirafoi enerorong sawai we inontarai mano wiro warang mai kahai, ne fio dewarafo,wape inontarai mesifoi netarai toyario aio wenewa tuti webong.13Inontarai kerirafoi sobu dadirafo na kaiwo karira medurai na mantauni borongfo,wape inontarai mesifoi kiaharai weru dadirafo.14Inontarai mano medu maifoi, ambori darang na mai,tuti inontarai mano yu fi na maifoi, ambori sobu fio mahikaifo na fio niari nanai.15Inontarai webonggoifoi mantauni deitarahio ne rangfoi mimoya,wape mandoni dino tarao aunau mani, sewai.16Na kutu inontarai webonggoifoi kesou mani, deinawi ne kasoufo ahera,wape mano nungkamiei wewu tofongfoi mani, wiro deto enemirirewifo kaha.17Mandoni dino medu kaiwo tarai kariri fio detioafo mani, doarahanai,wape mano wiro medu mai kariri fio detioafo kaha mani, tetofa.18Kaiwo karirao dariai na boromine mani, niari fari toyari umbe disang,wape inontarai mano sewaifoi, taperengfoi mani netarai toyario rawang dohong beng we mano meninangfoi.19Boromirawao madu maifo mani, ambori nayai pampang we fitawafa,wape taperemi tatofanei mani, manta ararafanai terai.20Tatofanei mani niayai na inontarai mano etang neo karirafo,wape inontarai mano deunau inontarai siai we etarang na mahikai mani, ambori sobu maifo.21Inontarai mano mesifoi wiro sodai neo karira fea kaha,wape inontarai mano kerirafoi ambori sodai ne karirafo pampang.22Inontarai mano bororawa tetofa mani Yahwei enerireuwi,wape inontarai mano enerorong pepayai we medu kaiwo bengfo mani, Piraise wei.23Inontarai mano nungkamiei wewu tofongfoi dediwa ne deitawangnai werorongfo,wape inontarai mano wiro miaya we aunauwi kahafoi sahu tuti ne bonggoifo.24Inontarai ureng mayafoi warangfo wedayari weinontarai fuba,wape inontarai ureng mariranei ambori we woming.25Aromikuayai we rahida da ma wana mani, wedaya inontarai enerorongfoi mirua,wape kaiwo bengfo mani niari nemirorong firaise.26Inontarai mesifoi wiwiaing ne maniwowirifoi na mai,wape inontarai kerirafoi wiwiaing to rang kerirafoi.27Inontarai ureng marirafoi wiro sobu fio dohong weafo kaha,wape inontarai ureng mayafoi ambori sobu ra.28Na rangbo mesifoi obu arangfo,wape rangbo kerirafoi da to mararehafoi.
The Seed Company