Kaiwo Riwangsoai1
1Kaiwo riwangsoai na Dauti antung Salomoi, mananu Israeli finina.2Kaiwo riwangsoai ninai we fiata inontarai ambori sewai, tuti ambori sobu aunau,kontaio tefu kaiwo werorongfo.3Kaiwo riwangsoai ninai we esobu aunau ambori esawai,tuti eminohi na mai, etoarahangnai tuti ewarami mai.4Na kaiwo riwangsoai ninai kontai, dohong inontarai mano wiro deitawang turura kahafoi ambori nungkamiei wewu tofong,tuti inontarai sowaworuafoi ambori enetituai kariri neo maifo tuti deitawangnafo werorong.5Na kaiwo yiwangsoi ninai, inontarai mano sewai kawurua we deitawang kariri ne maifoi ambori sewai nariai aha,tuti inontarai mano tefu kaiwo werorongfo ambori sobu wiwiaingfo aha.6Na tonanane ambori deitawangno kaiwo riwangsoai, tuti kaiwo deinawi kaririai,kontaio kaiwo aunau tuti netaweai na inontarai mano sewai.7Roaso Yahwei tuti omi wei mani, reantenang we inontarai ewaitawang werorongfo,wape inontarai mano webonggoifoi enerireu kaiwo aunaufo tuti awaifo.8Nehu arikang ne wau, bohong kariri kaiwo aunauo nemu dai deunauane,tuti wiro kobu taramu we fio inamuai deinauaifo fanai.9Weo une kaiwo aunaufo mani toyario sapewi mampofa na numukamieiwai,tuti toyario raori denteng na ramukanangwa.10Nehu arikang ne wau, masino inontarai mano emaya we enari sasarifo ewawori wau we nari karira mani,wiro roriasa fanai.11Masino emadu eteyo, “Ro ria amea, tatadiwa tuti tatamang we inontarai mano dana ninaifa ambori tawarami rikaoi.Roma tatuati na katai adiwa we tawarami rikao inontarai mano dohong sarawa kahafoi, manta we tafaraise teraifa.12Bento etarangte tatongsa, toyario raimeri songsa,ene tarai denteng tuti sentenangfoi te, tatongsa toyari mano ebiari to kamirei fafo foi.13Tata ambori taha ene fianggeng wewonongfo,ambori tane munune sefang na fio tatawarafo.14Roma ro ria amea kobi nemu ondene,ambori fi tahamananawane tatatorai mai we mansiari-mansiari na tata.”15Nehu arikang ne wau, wiro awemuwa daria inontarai tonana fosa fanai!Ro waroi weru sa.16Weo eawemifo mito we neo karirafo,tuti esahera we ewarami rika.17Romu mandoni dino waitepari tipari,masino deti mano dapa waiteparifoi?18Wape inontarai eharira fosa etapa waiteparifo etamang we ewarami rika mantaungsa,tuti ene waiteparifo na mamunggasai miung bera mantaungsa.19Tonanaifa, inontarai mano sera we ra na niari neo karirafo mani,ambori biaitai na mantauni nuaninufoi.20Awaifoi sahu na rawafui fiabai na rangfo,tuti na katai inontarai bitoya efanduhisa nayafo, bibe deisaha ne kaiwofo.21I sahu na rahutu baba bendari borongfo,tuti na katai mirising i medu deyo,22“Inontarai mano wiro meteitawang turura kaha ne meaine!Memaya we menayai mewebonggoi toninai pampangne?Kidoni wori inontarai mano menemirirewa ne mea, mefotou menemirirewa ne,tuti inontarai mano wiro memaya we aunau mea kahai, meteiaya we mewaitawangnai werorongfo ne?23Metaramio yau masino isua mea!Yau ambori yeisaha enehurorongnei we mea,tuti yeyo yeinau nehu yeitawangnai werorongne we mea.24Meteiaya yau na kutu isahu mea,tuti wiro inontarai manei miaya we detioa kaha, na kutu isi warahune we mea,25kontai, wiro metato nehu kaiwo aunau ne kaha,tuti isua mea mani, meteiayarai.26Ampefe nani kiai, yau ambori imiri na kutu karirafo da we mea,yau ambori yeikahera mea na kutu mataifo dawi mea,27na kutu mataifo da ma dawi mea toyari dedukai,tuti dadirafo wasau mea toyari aninau,na kutu dadira marabafo watawang mea mambiriu paria.28Na kutu nanafo mea ambori mesahu we yau, wape yau wiro iroa we mea kaha.Mea ambori mesera we yau towana-tonina, wape wiro mesobu yau kaha.29Wefianie? Weo mea wiro memaya we mewaitawang werorongfo kaha,tuti mea wiro meroaso Yahwei tuti mesomi wei kaha.30Mea wiro memaya we metaramio nehu kaiwo aunau ne kaha,tuti isua mea mani meteiayarai.31Nanai wedaya, mea ambori metang aibong na fi menari ne,tuti mea memamosi na fi karira metamane.32Inontarai mano wiro deitawang turura kahafoi ambori mireha, weo wiro miaya we tarao yau kaha,tuti inontarai mano wiro miaya we aunauwi kahafoi ambori mingganggung, weo wiro dohong kariria kaha.33Wape mandoni dino tarao yau mani, i ambori darang na mai,i ambori kiaharai weru dadira marabafo.”
The Seed Company