Nunei Reantenangfo45
1Na kutu Yehudai medua kai nanafo, Yusupi wiro enerorong mitu ahang kahai, na inontarai mano etoa kefangni fosa earomifo. Ainanaya demi ne mangfata fosa deyo, “Mera kai to boriei weru ninaifa.” Ampefe wiro manei niayai ria Yusupi ahang kaha, na kutu Yusupi deisaharai we ne doroi fosa, we i mani mandoni dinefo.2Mayeaia mani Yusupi sai fuba paria, donio inontarai Mesiri fosa tuti Firauni ne munu mananu rorongfo etaramioaifa.3Tuti Yusupi medu we ne doroifosa deyo, “Yau mani Yusupi di yau! Tane dai darangfo ne?” Wape ne doroifosa wiro eroa wei kaha, weo ematai fefe emadu kaha.4Ainanaya Yusupi medu we ne doroifosa deyo, “Mera kefang ma.” Ampefe era kefang weia, medua aha deyo, “Yau mani Yusupi di yau, mene tahatuio raminde metawayangni to nu Mesiri foi.5Wape wiro mematai tuti metatua ahang fanai, weo metawayang yau to ninai ma ne. Allai mantauni dino demi yau ira foni mea, ambori inontarai nesa etarang pampang.6Weo fuina boru kawurua kaharinei miung nu Mesiri nini, tuti fuina ring aha mani, wiro inontarai enari romi ete eteting fi kaha.7Donio Allai demi yau kawurua ira foni mea, ambori na fitantuma ninai, dohong mea tuti mene ririanei ambori metarang na nunei.8Ampefe wiro meaino metami yau toninai ma kaha, wape Allai Andino dohong yau iwe mantainau we Firauni, tuti iwe dai we ne munu mananu rorongfo tuti iweparenta sau kahofa Mesiri foi sentenangne.9Ampefe metarabera mea ahera we daia tuti memadu wei meteyo, ‘Nemu kaisungno Yusupi medu toninaifa, Allai dohong yau kawurua iwemambiriu sau kahofa Mesirifoi sentenang. Wiro bomang fanai, ro ahera weia.10Wau ambori nayai na kahofa Gosyeni tuti ambori kefang we yau, wau tuti nemu arikang wasa tuti nemu tafuisa, nemu kambing, domba tuti sapi, tuti fi kiaio nemuni wai.11Na wanaifa yau yewawu wau, weo kahari nini niayai fuina ring aha. Fio inari ninaifa, ambori wau, nemu munurorongwa tuti inontarai mano era ria wau wasa, wiro ene pari fi fanai.’ ”12Yusupi medua aha, “Metarami ma, mantaung mea mewati terai na meuremife ampa. Manggatui Benyamini wau kontai boti terai na uremu ne ampa, weo Yusupi di yau, yauno imadu ria meane.13Ampefe meteisaharai we dai kariri nehu fi kiaio mehikai isobuai na nu Mesiri nini, tuti fi kiaio mewatioinei, tuti meha dai aherama.”14Ainanaya Yusupi fiaung ne tahatui Benyamini rahanangfo tuti sai weo firaise fefe. Benyamini kontaio fiaung Yusupi tuti sai na warabiawafo.15Yusupi fiaung ne tafuaisa tuti niunasa mae sai weo firaise fefe. Mayeaia mani arahio emadu riati.16Na kutu inontarai na Firauni ne munu mananu rorongfo etaramioai, weo Yusupi ne doroifosa era ma, ampefe Firauni tuti ne inontarai erufi wei fosa efaraise paria.17Ainanaya Firauni medu we Yusupi deyo, “Modu we nemu doroifosa boyo, Menari toninaifa, metainaungso mene keledai wasa na potang tuti metarabera mea to kahafo Kanania.18Meha mene dai tuti ne munurorongfo tuti mera we yau ma. Yau ambori yohong fianai aino mahikai paria na kahofa Mesiri nini, ambori mesobu fio mahikaifo na kahofa ninaifa.19Tuti wau, boisaharai wesa boyo, Menari toninaifa, meha kereta beiru teai na kahofa Mesiri nei, we meha mene arikang fosa, mene wiwing fosa tuti mene dai weru wanaifa, tuti mera to ninai ma.20Wiro menemitituai mene fianggeng fubao mera weruifoi fanai. Weo fi fubao mehikai na kahofa Mesiri nei mani mene fi fine.”21Ainanaya Israeli ne kaisung fosa enari kariri fianai aino mananu Firauni demisa weafo. Yusupi dohong kereta we ne doroifosa kariri Firauni demifo, kontai dohong fiang wesa na ene rang rorongfo.22Yusupi dohong ansung roantenang we mansiari-mansiari, wape we Benyamini mani dohong doi peraki piaring we betoru (300) tuti ansung ring.23Yusupi kontai denatu keledai mang sura, etaunaungsoai na fi mahikai sewa na Mesiri fo we tamangnaifa. Tuti keledai wiwing sura, etaunaungsoai na potang, roti tuti fiang we tamanai na rang rorongfo, na kutu da to Mesiri fo.24Ainanaya sawing ne doroifosa tuti medu wesa deyo, “Wiro mehasisou wawera mea na rang rorongwa fanai.”25Ampefe tonanaifa, Yusupi ne doroifosa era weru kahofa Mesiri tuti era to kahofa Kanani we etamami Yakupia.26Erawa sobu Kanani mani, eteisaharai we etamami Yakupi, weo Yusupi darang nendai, andino weinontarai fuba tuti wemambiriusau kahofa Mesirifoi sentenangne. Wape Yakupi nemboru terai, wiro yoaso ea kaha.27Wape na kutu eteisaharai wei, kariri fi kiaio Yusupi medurafo, tuti na kutu Yakupi deti kereta Yusupi denatui we kiari nai to Mesiri fo, arahio ene dai Yakupi firaise aha.28Mayeai Yakupi medu wesa deyo, “Tarai! Nehu kaisungno Yusupi darang nendai, ye irawa yetioi na wiro imereha kaharai.”
The Seed Company