Nunei Reantenangfo41
1Defuina boru kawurua mani Firauni demiei, i doari na waya Nili deraungfo.2Na tantuma detio sapi ituo ebeng tuti enetarai biriayai etariai na waya Nili rorongfoi, tuti etang ninoi na waya deraungfo.3Mayeaia mani deti sapi itu aha etariai na waya Nili rorongfoi. Sapi itufo eharira tuti ehawariroi, etoari rurang sapi ebiriaya fosa na waya Nili deraungfo.4Ainanaya sapi itu mano eharira tuti ehawariroi fosa etangno sapi itu mano ebeng tuti enetarai biriayai fo. Mayeaia Firauni doari weru denafo.5Ainanaya Firauni dena aha tuti demiei we berufo mani. Na tantuma detio potang nenggaing bei ne bong itu mamasa tuti netaraifo beng paria.Potang6Wape mayeaia mani, na tantuma detio potang bong itu biriaya kaha tuti samamorang, weo wanang murangno menggaponi sioaifa.7Mayeaia mani potang bong ebiriaya kahafo etong potang bong ituo ebeng tuti ebiriayafo. Ainanaya Firauni kipatetafi weru denafo tuti deitawanai weo manta demiei teraifa.8Na kutu kamiaifo mananufoi enerorong weansarai paria. Ampefe demi esahu inontarai mano eteitawang amiei ne werorongfo tuti inontarai mano esawai fosa kiai na Mesiri ma. Firauni deisaha ne amieifoi wesa, wape wiro manei medu bau amieifoi ne werorongfo wei kaha.9Ainanaya mano wenunggamiei we deitawang mananufoi ne fio dunungfo medu we Firauni deyo, “Rahida bonini yeisaha nehu sarawaio fafongpa inari ne.10Raminde nanai nehu mananune wau kosou paria we mano erufi we wau fosa. Donio ru aitamuo yau tuti mano wenunggamiei we deitawang wedua roti bangfo. Tuti woa auru to aitamu rorongfo, na mano wenunggamiei we inontarai mano ewaitawang wedua munu mananufoi, ne munufoi afui.11Na diru bei mani, yau tuti mano wenunggamiei we deitawang wedua roti bangne auramiei, tuti amieine suru une werorongfo mai kaha.12Na aitamu rorongfo mani, bariboai manei inontarai Iberani dine, mano wenunggamiei we deitawang munu mananufoi ne mangfata dine. Aureisaha aune amieifo suru wei, tuti deisaha bau amiei borufo ne werorong masi kahafo.13Tuti fi kiaio deisaharafo we tarai kaririai, yau bohong yau to nehu fi iru fafongfo aha, wape mano wenungkamiei we deitawang roti bangfo sobu aiboi mararehafo.”14Ainanaya Firauni demi ne inontarai fosa esahu Yusupi, ampefe na ahera ehari to boriei weru aitamu rorongfo. Yusupi dei derewawurufo tuti yiwang ne ansungfo, mayeai da wa doari na Firauni arongfo.15Firauni medu we Yusupi deyo, “Yemiei tuti wiro manei deisaha bau amieinei ne werorongfo kaha. Wape itarahuoai we wau mani taramuo amieifoi terai, tuti boisaha bau amieifoi ne werorongfo.”16Yusupi yoa we Firauni deyo, “Wiro yau kaha, mae Allai dino ambori deisaharai na mai we nehu mananune wau.”17Ainanaya Firauni medu we Yusupi deyo, “Na nehu amieinei mani, yoari na waya Nili deraungfo.18Mayeai na tantuma yeti na waya rorongno Nili sapi itu ene tarai biriayai tuti ebeng etariai, tuti etang ninoi na waya deraungfo.19Wape mayeai aha mani, na tantuma yeti sapi siai itu etariai aha, ehawariroi tuti eharira paria, wiro yeti sapi eharira tonina nesa na Mesiri tantenang kaha.20Sapi ituo ehawariroi fosa etangno sapi ituo ebiriayai yetisa reantenangfo.21Wape masino etang sapi ituo enetarai biriaya fosa to nanai ki, wiro enetarai biriaya kaha, mae enetarai karira toyari fafongne. Ainanaya yoari weru yenafoa.22Mayeai yena nariai aha tuti yemiei. Na tantuma yetio potang nenggaing bei ne bong itu mamasa tuti netaraifo beng paria.23Wape mayeaia mani, na tantuma yetio potang bong itu biriaya kaha, sarahiai tuti samamorang weo wanang murang sioaifa.24Potang bongno ehawariroifo etangno potang bong ituo emahikaifo. Yeisaha amiei ne suru kawurua we mano esawai nesa ehai. Wape wiro manei deisaha bau amiei ne werorongfo we yau kaha.”25Mayeai Yusupi medu we Firauni deyo, “Nehu mananu ne wau, nemu amiei boru ne mani umasi. Allai kawurua deisaharai we nehu mananune wau weo fianai aino ambori Niari ne.26Sapi ituo enetarai biriayai fo mani fuina itu, tuti potang bong itu mahikaifo mani fuina itu kontai, nana mani fuina itu fianang bitoya. Ampefe amiei ne suru umasi.27Sapi ituo ehawariroi tuti eharira, mano etariai aha mani, fuina itu. Tonanai kontai potang memasa tuti siamorang na wanang murang sioi foi. Nana mani, kahari foi miung fuina itu.28Ampefe fi antanafa imadurai we nehu mananu Firaune wau, weo Allai kawurua deinawiai we nehu mananu ne wau fianai aino ambori Niarifo.29Nehu mananune wau taramuma, fuina itu aha mani ambori nu Mesiri nei sentenang sefangna fianang bitoya paria.30Mayeai mani ambori kaharifoi da ahama miung fuina itu. Ampefe aromiporo fuina ituo obu fianang bitoya na nu Mesiri foi, weo kaharifoi dohong kataifoi sirahiai sentenang.31Na tonanafo wiro wati obu fitantanang bitoya na katai foi ahang kaha, weo kahari foi fiabai paria.32Nehu mananune wau, nemu amiei boti suru we beru wa mani, fi nanai Allai kiutuai kawuru ampa tuti ambori Niari kaririai ahera rai.33Ampefe neo mahikai mani, nehu mananune wau wera we inontarai mano sewai manei tuti ruasi ambori ne mambiriu we yuparenta nu Mesiri nei.34Kontaio nehu mananune wau nari tonina, ruai inontarai mano erufi siai manea we efanduhi potangno inontarai Mesiri etetingnafo. Ambori etato kutuai we ring tuti eha weaia etararatai, na fuina ituo fianang bitoya nina.35Efanduhi fi angnifoi kiai na fuina ituo fianang bitoya nina, tuti na nehu mananu ne mambiriufo efanduhi fiani foi kiai na bendarifo tantenang tuti ararati we fiang.36Na tonanafo fianangfoi kiai meinenang we nu Mesiri foi sentenang, na fuina ituo kaharifoi miungfo, ambori inontarai Mesiri fosa ewawisia emarareha kaha.”37Firauni tuti ne inontarai mano erufi wei fosa eroa we kaiwo Yusupi medurafo.38Mayeai Firauni medu wesa deyo, “Wiro inontarai manei sewai kariri inontarai nini kaha. I mani inontarai mano Allai Nuaninufoi sensoni dine.”39Firauni medu we Yusupi deyo, “Allai deisaha fi nini kiai we wau kawuru ampa, wiro inontarai manei sewai kariri wau kaha.40Ampefe iruai wau weinontarai fuba. Nemu mambiriu we weparenta nehu rai nei sentenang tuti etaramio wau teraifa. Wiro manei wemambiriu sewa wau kaha, manta mananune yauno iwemambiriu sewane.”41Mayeai mani Firauni medu we Yusupi aha deyo, “Rahida nini iruai wau we inontarai fuba wemambiriu sau nu Mesiri nei sentenang.”42Ainanaya Firauni fiating ne cincino wonongfo nayai nai foi weru wara kehafoi tuti satari na Yusupi wara kehafoi. Tuti sensung Yusupi na ansung mananu tuti sata raori emasi na rahanangfo.43Mayeai Firauni demi Yusupi dautai to kereta mananu bo borufoi, tuti etafai esahututiri, eteyo, “Mesomi wei!” Tonanaifa, Firauni yuai Yusupi we inontarai fuba, ne mambiriu we weparenta nu Mesiri foi sentenang.44Firauni medu we Yusupi deyo, “Yau mani Firauni, wape wiro inontarai manei na nu Mesiri nei sentenang niari fiea kaha, masino wiro roa wei kaha.”45Mayeai Firauni dohong Yusupi wonong Mesiri fino Safnat-Paneahi, tuti dohong Asnati, imami Potiferai na Oni ne kamitung dine we Yusupi ne wiwing. Tonanaifa Yusupi weinontarai fuba wemambiriu sau nu Mesiri foi sentenang.46Yusupi ne fuina piareia sura (30) fo mani, yu fi we Firauni mananu Mesiri foi. Mayeai Yusupi da weru Firauni tuti da wari nu Mesiri foi sentenang.47Kahofafo tifu fitantanang wetarai bitoya paria na fuina ituo dohong mahikaifo.48Ampefe Yusupi fianduhi fianangfoi kiai na fuina itu dohong mahikaifo na nu Mesiri foi. Ainanaya Yusupi derara fianangfoi na bendarifo, fianang etetingni na bendari bei mani etararatai na bendari nani kontai.49Potangno Yusupi fianduhi bitoya paria toyari ninuaing na nafareng, donio inontarai fosa efotou etatorifo, weo wiro atoafong soi kaha.50Wiro fuina kaharifoi da ma kaharai mae, Yusupi ne wiwing Asnati, imami Potiferai na Oni ne kamitungfoi minohituti kaisung mandu kawurua.51Yusupi dohong kaisung rentenangfoi wonong fino Manasyei, weo deyo, “Allai niari kawurua, awao arohuporo nehu dadirane tuti mano enayai na nehu dai ne munurorongfo.”52Tuti we ne kaisung mandufoi dohongni wonong fino Efraimi, weo medu deyo, “Allai niari yau isobu arikang na nu bo isobu dadira nai nei.”53Mayeai fuina itu dohong mahikai na nu Mesiri foi kaharai nanai,54fuina itu kaharifoi miungfo da ma, toyari fio Yusupi medurai kawuru ampo. Nunei sentenang sodai kaharifoi, wape na nu Mesiri foi sentenang andino ne fiangne.55Na kutu inontarai Mesiri fosa esodai kaharifoi, tuti etutang Firauni we fiang, Firauni medu we inontarai Mesiri foi sentenang deyo, “Mera we Yusupia, tuti menari kariri fianai aino medurai we meafo.”56Kaharifoi miung nu Mesiri foi. Ampefe Yusupi fiai munu baba efanduhi fianang naifoi tuti dewayang potongfoi we inontarai Mesiri fosa, weo kaharifoi fiabai paria na nu Mesiri foi sentenang.57Kontaio inontarai na nunei sentenang era to Mesiri we ewori potang ria Yusupi, we kaharifoi fiabai paria na nunei sentenang.
The Seed Company