Nunei Reantenangfo33
1Na kutu Yakupi da fo, yuai ureng detia mani, na tantuma deti Esauwi tuti ne inontarai ewepiaring webea (400) era tutiri ma. Ampefe deto ne arikangfosa we bea amani, Leai tuti ne arikangfosa, Raheli tuti ne arikangfosa, kontai ne woming wiwingfo suru tuti une arikangfosa.2Dohongno ne woming wiwingfo suru tuti une arikangfosa era na fongfo, Leai tuti ne arikangfosa era na rabuangfo, mae Raheli tuti ne kaisungno Yusupi ura na fui parifo.3Mayeai Yakupi mantauni da na fongfo, da wa kefang we Esauwi nanai, disangkapa awebuka somi aweu ureng disangso kahofa wau we beitu.4Wape Esauwi mitoa fiaungni tuti niunahi, ainanaya usai ruhiaifa.5Mayeai Esauwi detia tofongna mani, deti wiwing fosa tuti arikangfosa, ampefe dutangnai deyo, “Mandoni saino era ria wau ninai?” Yakupi yoa deyo, “Arikangno Allai kawurua dohongsa we nemu mangfata ne yau.”6Ainanaya woming wiwingfo suru tuti une arikangfosa era kefangna, esomi we Esauwi.7Tonanai kontai Leai tuti ne arikangfosa, Yusupi tuti inangno Raheli, ea kontai era kefang Esauwia esomi wei.8Ainanaya Esauwi dutang Yakupi deyo, “Enemutituai fianie? Bomi nemu inontarai nesa tuti fiahung nesa era we rabuang ma ehanggung yau ninai?” Yakupi yoa wei deyo, “Ambori dai enemuwawu yau.”9Wape Esauwi medu wei deyo, “Nehu tahatuine waune, nehu fiahung bitoya kontai, ampefe ka nemu sara.”10Wape Yakupi medu wei deyo, “Nari tonana fanai, masino isobu enemuwawuwa kawuru ampa, ampefe ka fiembaitaio yohongnai nina. Weo iwati uremune mani toyario iwati Allai urengfo, tuti bomang we yau na mai.11Ampefe ka fianai aino yohongnai kawurua we wau nina. Weo Allai kawurua dohongno mahikaifo we yau, tuti fianggeng bitoya paria we yau ampa.” Ampefe Yakupi wewori Esauwi pampang, donio Esauwi yoa we fianai aino dohongnafo.12Ampefe Esauwi medu deyo, “Tonana mani merama tara ruhiai pari, yau ambori ira na fongfo”13Wape Yakupi medu we ne tahafuai deyo, “Daie boitawanai weo nehu arikangnesa wiro ene mambiriu feai kaha, tuti kambing, domba tuti sapio etohong uio ene arikangfosa kontai. Masino tara ahera na rahida boyari mani, fiahung fosa kiai ambori emarareha rai.14Ampefe bento ro fafongna, yau, nehu arikangnesa tuti nehu fiahungnesa ambori amera tua wau to Seiri.”15Ainanaya Esauwi medu deyo, “Tonana mani yohong nehu inontarai era ria yaune maneiru teai we efata wau.” Wape Yakupi deyo, “Nana fanai, weo kawurua demoyarai we isobu ne mahikaifo ria dai wau ampa.”16Ampefe na rahida bo nani kontaio Esauwi tuti ne inontarai fosa etaraberasa to Seiri aha.17Wape Yakupi da ria Esauwi kaha, mae da to Sukoti, na wanai biaung ne munufoi tuti niari warumai we ne fiahungfosa. Nanai wedaya katai nani esahui we Sukoti. 18Mayeaia mani Yakupi da weru Sukoti. Na Padan-Arami Yakupi da to Kanani, da na mai paria sobu Sikemi, mayeai biaung ne yawa tendafoi na bendari Sikemi do wanang murangfoi.19Mayeai wiori kahofa feai na nanai ria Sikemi tamangno Hemori ne ririafosa, na doi peraki piaring (100) we biaung ne yawa tendafoi nai.20I biaung mesba bei na nanai tuti dohongni wonong fino El, Allai mano Israeli somi wei.
The Seed Company