Nunei Reantenangfo28
1Mayeai Isaki sahu Yakupia, ainanaya mioangni tuti deretawangni deyo, “Wiro ka wiwing Kanani manei we nemu wiwing fanai.2Moinenang ro to Padan-Arami, to inamu Ribkai tamang Betueli, tufumuaifa ne munufoia. Na wanai ka inamu roromang Labani ne kamitung manei we nemu wiwing.3Kadono Allai Mano Wemambiriu Sewafoi mioang wau, niari wau bawing separai tuti niari wau nemu riria bitoya, donio ewe kaiwasa bitoya.4Kadono I dohong moang we wau tuti nemu ririanei kariri ne dohongnai we Abrahamifo, donio wau nemu katai nini, katai munohi nai we inontarai aisei, kataio Allai dohongni we Abrahami kawuruampa.”5Ainanaya Isaki sawing Yakupia, mayeai Yakupi da to Padan-Arami, da we Betueli inontarai Arami foi ne kaisung Labani, Yakupi tuti Esauwi uinami Ribkai roromangfoi.6Esauwi detio Isaki kawurua mioang Yakupi tuti sawingni da to Padan-Arami we kia wiwing na nanai. Na kutu mioang Yakupi fo deretawangni deyo, “Wiro ka kadawing Kanani manei we nemu wiwing fanai.”7Tuti Yakupi taraoai tuti niari kariri kaiwo tamanai tuti inanai umadurafo, tuti da to Padan-Arami.8Ampefe Esauwi deitawanai, weo tamang Isaki wiro eneo wiwing Kanani kaha.9Nanai wedaya Esauwi da we Ismaelia tuti kia Mahalati we ne wiwing, kiontaio ne wiwing fafongfo suru. Mahalati mani Abrahami ne kaisung Ismaeli ne kamitung dine, imani Nebayoti ne tahatui dine.10Mayeai Yakupi da weru Bersyeba tuti da to Harani.11Da paria sobu katai bei, tuti fiotourai na nanai, weo wofoi sawaia. I kia kamiei bei na katai nani tuti dohongni we airukang we deirukani, mayeai denawa.12Na kutu denafo, i demiei, deti tehi bei doari na nunei paria sobu rorafaisi, tuti deti Allai ne wewai fosa ebia etautai na tehifoi.13Na amiei rorongfo deti Yahwei doa rurangni mae medu wei deyo, “Yau mani Yahwei di Yau, Allai mano tufumu Abrahami tuti tamamu Isaki usomi wei foi di Yau. Kahofa katai watai nai nini ambori Yohongni we wau tuti we nemu ririafoi ki.14Nemu ririanei ambori ne bitoyafo toyario kangganang kahofa, esefarai to do wanang murang, to do wanang fui, do wanang ba tuti do wanang sai. Tuti na wau kontaio nemu ririanei, kaiwasa kiai na nunei ambori esobu moangfo.15Taramu ma, Yau ambori iweriria wau pampang tuti Yau ambori yeitawang wau to katai bodoni dino ro weifo. Yau ambori ika wau to katai nini aha ma, weo Yau wiro itawing wau kaha, Yau ambori yohong kariri fianai aino Yererai we wau kawuruampo.”16Na kutu Yakupi denawa doafo i medu deyo, “Tarai, antanafa Yahwei niayai na katai nini, tuti wiro iwaitawangnai kaha.”17Mitai tuti medu deyo, “Katai nini mirarebanai paria. Tarai, Allai ne munufoi di nini, rahutu fiabai waidani di nini.”18Kamiaia mani Yakupi kia kamieio deirukanifoi, tuti dohongni doa tirai we kamiei tugu we deinawi kariri fi nanai, tuti sari maning saitunifo to kamieifoi we somi we Allai.19Yakupi dohong katai nani wonong fino Beteli , fafongpa bendari nani wonong fino Lusi.20Mayeai Yakupi dohong kaiwo arera deyo, “Masino Allai ambori weriria yau tuti ambori Deitawang yau na rangbo iranai nini, tuti Dohong roti we yang tuti ansung we itatarai,21donio yarabera yau na mai to nehu dai ne munufoi aha, ampefe Wau terai Yahweh mano isomi we Wau.22Tuti kamieio yohongni doatirai we tugu nini ambori we katai we omi we Allai. Na fi kiaio Bohongni we yaunei ambori yohong sepersepuluh we wau pampang.”
The Seed Company